Yesaya
63 Ndi nnyi uyo ane a ḓa a tshi bva Edomo,+
A tshi bva Bosira+ o ambara zwiambaro zwi penyaho,*
O ambara zwavhuḓi,
Ane a tshimbila a tshi ita mitsindo mihulu?
“Ndi nṋe Ane a khou amba nga zwivhuya,
Ane a vha na maanḓa mahulu a u tshidza.”
2 Ndi ngani zwiambaro zwau zwi zwitswuku,
Zwi tshi fana na zwa vhane vha khou suka nḓirivhe?+
3 “Ndo suka nḓirivhe ndi ndoṱhe.
Ho vha hu si na lushaka lwe lwa vha lu na nṋe.
Ndo bvela phanḓa ndi tshi vha suka ndo sinyuwa,
Ndo bvela phanḓa ndi tshi vha kandekanya ndo halifha.+
Zwiambaro zwanga zwo hashiwa nga malofha avho,
Ndo tswukisa zwiambaro zwanga zwoṱhe.
4 Ngauri ḓuvha ḽa ndifhedzo ḽi mbiluni yanga,+
Na ṅwaha wa vhathu vhanga vho rengululwaho wo swika.
5 Ndo sedza, fhedzi hu si vhe na we a nthusa;
Zwo mmangadza uri a ho ngo vha na we a ntikedza.
6 Ndo kandekanya dzitshaka ndo sinyuwa,
Ndo ita uri dzi kambiwe nga mbiti dzanga+
Malofha adzo ndo a shululela fhasi.”
7 Ndi ḓo amba nga ha mishumo ya Yehova ya lufuno lu sa shanduki,
Nga ha mishumo ya Yehova i khoḓeaho,
Nga nṱhani ha zwoṱhe zwe Yehova a ri itela zwone,+
Zwithu zwinzhi zwavhuḓi zwe a zwi itela vha nnḓu ya Isiraele,
U ya nga khathutshelo yawe na lufuno lwawe luhulu lu sa shanduki.
8 Ngauri o ri: “Ngangoho ndi vhathu vhanga, ndi vharwa vhanga vhane vha ḓo fhulufhedzea.”+
Nga zwenezwo, o vha Mutshidzi wavho.+
9 Tshifhingani tsha u tsikeledzea havho hoṱhe o vha a tshi tsikeledzea.+
O vha tshidza nga muḓinḓa* wawe.+
O vha rengulula nga lufuno na u vha pfela vhuṱungu,+
O vha takula na u vha hwala misi yoṱhe ya kale.+
10 Fhedzi vha mu shandukela+ na u ṱungufhadza muya wawe mukhethwa.+
11 Vha humbula misi ya kale,
Misi ya Mushe mushumeli wawe, vha ri:
“U ngafhi Uḽa we a vha bvisa lwanzheni+ na vhalisa vha sambi ḽawe?+
U ngafhi Uḽa we a mu ṋea muya Wawe mukhethwa,+
12 Uḽa we a ita uri tshanḓa Tshawe tsha vhugala tshi tshimbile na tshanḓa tsha u ḽa tsha Mushe,+
Uḽa we a fhandekanya maḓi phanḓa havho+
Uri a ḓiitele dzina ḽa lini na lini,+
13 Uḽa we a ita uri vha tshimbile vhukati ha magabelo,*
Uri vha tshimbile vha sa khukhulwi,
Sa bere i mudavhini?*
14 Vhunga zwifuwo musi zwi tshi tsela govhani,
Muya wa Yehova wo ita uri vha awele.”+
15 Lavhelesa u ngei ṱaḓulu, u vhone
U fhethu hau ha nṱha hukhethwa na ha vhugala.*
Ndo dzhielwa zwone.
16 Ngauri iwe u Khotsi ashu;+
Naho Abrahamu a sa ri ḓivhi
Na Isiraele a sa ri ḓivhi,
Iwe Yehova u Khotsi ashu.
Murengululi washu wa kale na kale ndi dzina ḽau.+
17 Iwe Yehova, ndi ngani u tshi ri litsha ri tshi* pambuwa nḓilani dzau?
Ndi ngani u tshi litsha ri tshi* rindidza mbilu dzashu uri ri si tsha u ofha?+
Vhuya u tshi itela vhashumeli vhau,
Tshaka dza ifa ḽau.+
18 Vhathu vhau vhakhethwa vho dzula khaḽo lwa tshifhinganyana.
Maswina ashu o kandekanya nnḓu yau khethwa.+
19 Ro no fhedza tshifhinga tshilapfu ri tshi nga vhathu vhe u si vhuye wa vha vhusa,
Ri tshi nga vhathu vhe vha si vhuye vha vhidzwa nga dzina ḽau.