Bugu Ya Vhuvhili Ya Dzikhosi

6 Vharwa vha vhaporofita+ vha amba na Elisha vha ri: “Vhona! Afha fhethu hune ra khou dzula hone na iwe a hu ri eḓani. 2 Ri khou humbela uri ri ye Mulamboni wa Yorodane. Muṅwe na muṅwe a reme danda henengei, ri fhaṱe fhethu hune ra nga dzula hone.” A ri: “Tshimbilani.” 3 Muṅwe wavho a ri: “Ndi khou humbela uri u ḓe na vhashumeli vhau.” A fhindula a ri: “Ndi ḓo ḓa.” 4 A ṱuwa navho, vha swika Mulamboni wa Yorodane vha thoma u rema miri. 5 Musi muṅwe wavho a tshi khou rema muri, mbaḓo ya ṱomowa ya wela maḓini, a vhidzelela a ri: “Yowee muṋe wanga, ndo tou i hadzima!” 6 Mushumeli wa Mudzimu wa ngoho a ri: “Yo wela ngafhi?” A mu sumbedza he ya wela hone. Elisha a rema thanda a i posa henefho a ita uri mbaḓo i papamale. 7 A ri: “I bvise.” A isa tshanḓa a i bvisa.

8 Khosi ya Siria ya ya u lwa na Isiraele.+ Ya ambedzana na vhashumeli vhayo ya ri: “Ndi ḓo atha na inwi madennde huṅwe fhethu.” 9 Mushumeli wa Mudzimu wa ngoho+ a rumela mulaedza kha khosi ya Isiraele a ri: “U ṱhogomele uri u songo fhira nga henefho fhethu, ngauri Vhasiria vha khou tsela nga henefho.” 10 Khosi ya Isiraele ya rumela vhathu fhethu he mushumeli wa Mudzimu wa ngoho a hu amba a tshi i eletshedza. A bvela phanḓa a tshi eletshedza khosi, ya si ye henefho lwo vhalaho.*+

11 Zwenezwo zwa sinyusa khosi* ya Siria, ya vhidza vhashumeli vhayo ya amba navho ya ri: “Mmbudzeni uri ndi nnyi kha riṋe ane a ima na khosi ya Isiraele?” 12 Muṅwe wa vhashumeli vhayo a ri: “Thovhela muṋe wanga, a hu na na muthihi kha riṋe! Ndi muporofita wa Isiraele ane a vhudza khosi ya Isiraele zwithu zwine iwe wa zwi amba u kamarani yau ya u eḓela.”+ 13 Khosi ya ri: “Tshimbilani ni ye u mu ṱoḓa, uri ndi rumele vhathu vha mu fare.” Nga murahu ya vhigelwa uri: “U ngei Dothani.”+ 14 Ya ṱavhanya ya rumela bere na gariki dza nndwa henefho, khathihi na mmbi khulwane; vha swika vhusiku, vha tanga wonoyo muḓi.

15 Musi muḓinḓa wa mushumeli wa Mudzimu wa ngoho a tshi vuwa nga matsheloni-tsheloni, a tshi bvela nnḓa, a vhona mmbi i re na bere na gariki dza nndwa yo tanga wonoyo muḓi. Nga khathihi muḓinḓa a amba na Elisha a ri: “Yowee, muṋe wanga! Ri ḓo ita mini?” 16 Fhedzi Elisha a ri: “U songo ofha!+ Ngauri vhane vha vha na riṋe ndi vhanzhi u fhira vhane vha vha navho.”+ 17 Elisha a thoma u rabela a ri: “Iwe Yehova, ndi khou humbela uri u mu vule maṱo uri a vhone.”+ Yehova a ṱavhanya a mu vula maṱo, muḓinḓa a kona u vhona, musi a tshi lavhelesa a vhona dzinguni ḽa dzithavhani ho ḓala bere na gariki dza nndwa dza mulilo+ dzo tanga Elisha.+

18 Musi Vhasiria vha tshi mu ḓela, Elisha a rabela Yehova a ri: “Ita uri ulu lushaka lu si tsha vhona.”+ Ngauralo, a ita uri vha si tsha vhona, sa zwe Elisha a vha o humbela. 19 Elisha a amba navho a ri: “No xela nḓila na muḓi a si wone. Ntevheleni, ndi ḓo ni isa kha munna ane na khou u mu ṱoḓa.” Naho zwo ralo, a vha isa Samaria.+

20 Musi vha tshi swika Samaria, Elisha a ri: “Yowee, Yehova vha vule maṱo uri vha vhone.” Ngauralo, Yehova a vha vula maṱo, vha vhona vhe vhukati ha muḓi wa Samaria. 21 Musi khosi ya Isiraele i tshi vha vhona, ya amba na Elisha ya ri: “Muṋe wanga, ndi vha vhulaye?” 22 Fhedzi a ri: “U songo vha vhulaya. Naa u nga vhulaya vhathu vhe wa lwa navho wa vha thuba? Vha ṋee vhurotho na maḓi uri vha ḽe, vha nwe+ vha humele ha muṋe wavho.” 23 A vha itela tshimima tshihulu, vha ḽa vha nwa, nga murahu a ri vha ṱuwe vha ye ha muṋe wavho. Tshigwada tsha mavemu tsha Vhasiria+ a tsho ngo tsha dovha tsha ḓa shangoni ḽa Isiraele.

24 Nga murahu Benihadada khosi ya Siria a kuvhanganya mmbi yawe yoṱhe a gonya a tanga muḓi wa Samaria.+ 25 Ho vha hu na nḓala khulu+ ngei Samaria, vha u tanga u vhuya u swika ṱhoho ya donngi+ i tshi rengwa nga shekele* dza 80 dza siḽiva, tshipiḓa tshithihi kha zwiṋa tsha muelo wa khabu* tsho ḓala mupfudze wa maivha tsho vha tshi tshi rengwa nga shekele dza 5 dza siḽiva. 26 Musi khosi ya Isiraele i tshi khou tshimbila tsini ha luvhondo, muṅwe mufumakadzi a i vhidzelela a ri: “Thovhela muṋe wanga, ri thuse!” 27 Ya fhindula ya ri: “Arali Yehova a sa ni thusi, nṋe thuso ndi ḓo i wana ngafhi? Naa ndi nga i wana fhethu hune ha fhefherwa hone?* Kana hune ha itwa waini kana mapfura?” 28 Khosi ya mu vhudzisa ya ri: “Mulandu ndi mini?” Onoyo mufumakadzi a fhindula a ri: “Hoyu mufumakadzi o amba na nṋe a ri: ‘Ḓisa ṅwana wau wa mutukana ri mu ḽe ṋamusi, matshelo ri ḓo ḽa wanga.’+ 29 Ra bika ṅwananga ra mu ḽa.+ Nga ḓuvha ḽi tevhelaho nda amba nae nda ri: ‘Ḓisa ṅwana wau ri mu ḽe.’ Fhedzi ene a dzumba ṅwana wawe.”

30 Musi khosi i tshi tou pfa zwe zwa ambiwa nga onoyo mufumakadzi, ya kherukanya zwiambaro zwayo.+ Musi i tshi khou fhira nga henefho luvhondoni, vhathu vha vhona uri khosi yo ambara madzanganda nga ngomu ha zwiambaro zwayo. 31 Khosi ya ri: “Ngavhe Mudzimu a tshi nnyita zwa uri na zwa uri a dovhe a engedze arali ṋamusi ṱhoho ya Elisha murwa wa Shafati ya sa tumulwa!”+

32 Elisha o vha o dzula nḓuni yawe e na vhahulwane. Khosi ya ruma muḓinḓa uri a i range phanḓa, fhedzi musi muḓinḓa a sa athu u swika, Elisha a amba na vhahulwane a ri: “Naa a ni zwi vhoni uri uḽa murwa wa muvhulayi+ o ruma muḓinḓa uri a ntumule ṱhoho? Musi muḓinḓa a tshi swika ni vale vothi uri muḓinḓa a si dzhene. Naa a hu khou pfala mitsindo ya muṋe wawe ane a khou mu tevhela?” 33 Musi a tshi kha ḓi amba navho, muḓinḓa a ḓa khae, khosi ya ri: “Heyi khombo i bva ha Yehova. Ndi ngani ndi tshi fanela u lindela Yehova?”