Bugu Ya U Thoma Ya Samuele
16 Yehova a amba na Samuele a ri: “U ḓo lilela Saulo u swika lini+ ngeno nṋe ndo mu landula uri a si tsha vha khosi kha ḽa Isiraele?+ Ḓadza luṋanga lwau nga mapfura+ u ṱuwe. Ndi ḓo u ruma ha Isai+ wa Betlehema, ngauri ndo nanga muṅwe wa vharwa vhawe uri a vhe khosi.”+ 2 Fhedzi Samuele a ri: “Ndi ḓo ya hani? Musi Saulo a tshi zwi pfa u ḓo mmbulaya.”+ Yehova a mu fhindula a ri: “Ṱuwa na tshiṋamana, u swike u ri: ‘Ndo ḓa u itela Yehova tshiṱhavhelo.’ 3 U vhidze Isai uri a ḓe henefho hune wa khou ita hone tshiṱhavhelo; ndi ḓo u vhudza zwine wa ḓo ita zwone. U ḓodze ane nda ḓo mu nanga.”+
4 Ngauralo, Samuele a ita zwe Yehova a amba. Musi a tshi swika Betlehema,+ vhahulwane vha wonoyo muḓi vha mu ṱanganedza vho tshuwa, vha ri: “Naa wo ḓa nga ḽa mulalo?” 5 Samuele a fhindula a ri: “Ndo ḓa nga mulalo. Ndo ḓa u ṋekedza Yehova tshiṱhavhelo. Ḓikhetheni, ni ṱuwe na nṋe ri ye u ṋekedza tshiṱhavhelo.” A nanga Isai na vharwa vhawe, nga murahu a vha vhidza musi a tshi ṋekedza tshiṱhavhelo. 6 Musi vha tshi swika, Samuele a vhona Eliaba,+ a ri: “Vhukuma hoyu ndi ene muḓodzwa wa Yehova.” 7 Fhedzi Yehova a amba na Samuele a ri: “U songo sedza mbonalo na vhulapfu hawe,+ onoyo a tho ngo mu nanga. Ngauri nḓila ine muthu a vhona ngayo a si ine Mudzimu a vhona ngayo, muthu u vhona zwa nga nnḓa, fhedzi Yehova u vhona zwi re mbiluni.”+ 8 Nga zwenezwo, Isai a vhidza Abinadaba+ uri a fhire phanḓa ha Samuele, fhedzi Samuele a ri: “Na onoyu Yehova ho ngo mu nanga.” 9 Nga murahu Isai a ḓisa Shamaha,+ fhedzi Samuele a ri: “Na onoyu Yehova ho ngo mu nanga.” 10 Isai a ita uri vharwa vhawe vha sumbe vha fhire phanḓa ha Samuele; fhedzi Samuele a amba na Isai a ri: “Yehova ho ngo nanga na muthihi wa vhenevho.”
11 Mafheleloni Samuele a amba na Isai a ri: “Naa vhana vhau ndi vhenevha fhedzi?” Isai a ri: “Muṱukusa+ haho fhano; u khou lisa nngu.”+ Samuele a amba na Isai a ri: “Ruma muthu a ye a mu vhidze, ngauri ri nga si ḽe a sa athu u swika.” 12 A ruma muthu uri a ye u mu vhidza. Onoyo muṱhannga o vha o naka e na maṱo avhuḓi.+ Yehova a ri: “Takuwa u mu ḓodze, ngauri ndi onoyo!”+ 13 Samuele a dzhia luṋanga lu re na mapfura+ a mu ḓodza phanḓa ha vhakomana vhawe. Muya wa Yehova wa thoma u ṋea Davida maanḓa u bva nga ḽeneḽo ḓuvha u ya phanḓa.+ Nga murahu Samuele a takuwa a humela Rama.+
14 Muya wa Yehova wa ṱuwa kha Saulo.+ Yehova a tendela uri muya muvhi u mu tambudze.+ 15 Vhashumeli vha Saulo vha amba nae vha ri: “Muya muvhi we Mudzimu a u tendela u khou u tambudza. 16 Ri khou humbela uri muṋe washu a rume riṋe vhashumeli vhawe uri ri ṱoḓe muthu a re na vhutsila ha u lidza haripa.+ Musi muya muvhi we Mudzimu a u tendela u tshi ḓa, onoyo u ḓo i lidza, iwe u ḓo ḓipfa u khwine.” 17 Saulo a amba na vhashumeli vhawe a ri: “Ndi khou humbela uri ni nṱoḓele muthu ane a kona u i lidza zwavhuḓi, ni mu ḓise kha nṋe.”
18 Muṅwe muḓinḓa wawe a ri: “Ndo vhona murwa wa Isai wa Betlehema a tshi khou i lidza zwavhuḓi, u na tshivhindi a dovha a vha muhali.+ Ndi muambi makone, o naka,+ Yehova u nae.”+ 19 Saulo a ruma vhaḓinḓa ha Isai a ri: “Rumela murwa wau Davida ane a vha na sambi uri a ḓe kha nṋe.”+ 20 Isai a dzhia donngi na vhurotho, mukhwama wa waini na tshibudzana a zwi ṋea murwa wawe Davida uri a ṱuwe nazwo ha Saulo. 21 Ngauralo, Davida a swika ha Saulo a thoma u mu shumela.+ Saulo o vha a tshi mu funa nga maanḓa, a vha muhwali wa zwiṱhavhane zwawe. 22 Saulo a ruma muḓinḓa ha Isai a ri: “Ndi khou humbela uri u tendele Davida uri a ntshumele ngauri ndi a mu takalela.” 23 Musi muya muvhi we Mudzimu a u tendela u tshi ḓa kha Saulo, Davida o vha a tshi dzhia haripa a i lidza, Saulo o vha a tshi dzivhuluwa a vha khwine, muya muvhi wo vha u tshi mu ṱutshela.+