Kha Vhahevheru
12 Samusi ri na gole ḽingafha ḽa ṱhanzi dzo ri tangaho, kha ri laṱe mihwalo yoṱhe na tshivhi tshine tsha ri piringedza nga hu leluwaho,+ ri gidime nga u konḓelela mbambe ye ra vhetshelwa yone,+ 2 musi ro sedza Yesu ane a vha Murangaphanḓa Muhulwane na Muvuledzi wa lutendo lwashu.+ Nga nṱhani ha dakalo ḽe a vha o vhetshelwa ḽone, o konḓelela danda,* a si shone, a dzula thungo ya tshanḓa tsha u ḽa tsha khuluṋoni ya Mudzimu.+ 3 Humbulisisani nga tsumbo ya onoyo we a konḓelela musi a tshi semiwa nga vhaitazwivhi+ vhane vha ḓihuvhadza, uri ni si nete na vho kulea nungo.+
4 Inwi a ni athu u lwa na tshivhi, u swika malofha aṋu a tshi shululwa. 5 No hangwa tshoṱhe zwe Mudzimu a ni ṱuṱuwedza zwone sa vharwa vhawe, musi a tshi ri: “Ṅwananga, u songo nyadza ndayo i bvaho kha Yehova* kana wa kulea nungo musi a tshi u khakhulula; 6 ngauri Yehova* u kaidza vhane a vha funa, u rwa vhane a vha dzhia sa vharwa.”+
7 Konḓelelani musi ni tshi tambula, ni zwi dzhie sa iṅwe nḓila ya u kaidzwa.* Ndi nḓila ine Mudzimu a fara ngayo vhana vhawe.+ Ndi ufhio murwa ane khotsi awe a sa mu kaidze?+ 8 Arali Mudzimu a sa ni kaidza nga nḓila ine a kaidza ngayo vhaṅwe, a ni vhana vhawe, ni vhana vha muṅwe muthu. 9 Zwiṅwe hafhu, vhokhotsi ashu vho vha vha tshi ri kaidza, ri tshi vha ṱhonifha. Ri nga litsha hani u ḓiṱukufhadza kha Khotsi we a ri nanga nga muya wawe mukhethwa uri ri tshile?+ 10 Ngauri vhokhotsi ashu vho ri kaidza lwa tshifhinganyana vha tshi tevhedza zwe vha vha vha tshi vhona zwo luga, fhedzi Mudzimu u zwi itela u ri vhuyedza, uri ri vhe vhakhethwa u fana nae.+ 11 Ndi ngoho uri u kaidzwa a zwi takadzi, zwi a vhavha;* fhedzi nga murahu zwi ita uri vhe vha guda musi vha tshi kaidzwa vha vhe na mulalo, vha ite zwivhuya.
12 Khwaṱhisani zwanḓa na magona a si na nungo,+ 13 ni dzule ni tshi tshimbila nḓilani yo lugaho,+ uri o huvhalaho a fhole nṱhani ha u ṋaṋa u huvhala. 14 Ivhani na mulalo na vhathu vhoṱhe+ na u vha vhakhethwa,+ ngauri muthu a nga si kone u vhona Murena arali e si mukhethwa. 15 Ni ṱhogomele uri hu si vhe na ane a kundwa u wana vhuthu vhuhulu ha Mudzimu, uri hu si vhe na mudzi u re na mulimo une wa ḓo vhanga thaidzo, wa tshikafhadza vhanzhi.+ 16 Ni ṱhogomele uri hu si vhe na ane a ḓifara luvhi nga zwa vhudzekani* kana ane a nyadza zwithu zwikhethwa u fana na Esau, we a rengisa ndugelo ya vhutanzhe nga tshigoḓelo tshithihi tsha zwiḽiwa.+ 17 Ni a zwi ḓivha uri o landulwa musi a tshi vho ṱoḓa u fhaṱutshedzwa, fhedzi a zwo ngo thusa tshithu naho o lila+ uri khotsi awe a shandule phetho.
18 Ngauri a no ngo sendela tsini na thavha+ i dugaho mulilo,+ i re na gole ḽitswu, swiswi na ḓumbu ḽihulu,+ 19 na phalaphala i lilaho+ na maipfi+ e musi vhathu vha tshi a pfa vha humbela uri vha songo tsha vhudzwa zwiṅwe.+ 20 Ngauri vho tshuwa musi vha tshi vhudzwa uri: “Arali tshipuka tsha kanda yeneyo thavha, tshi fanela u kanḓwa nga matombo.”+ 21 Zwiṅwe hafhu, zwe vha zwi vhona zwo vha zwi tshi ofhisa lwe Mushe a ri: “Ndi khou tetemela nga nyofho.”+ 22 Fhedzi inwi no sendela Thavhani ya Tsioni+ na muḓini wa Mudzimu a tshilaho, Yerusalema+ wa ṱaḓulu hune ha vha na mavhuthu a vharuṅwa 23 vho kuvhanganaho,+ na sendela na tsini na Mudzimu ane a vha Muhaṱuli wa vhoṱhe,+ tshivhidzo tsha matanzhe o ṱanganedzwaho ṱaḓulu,+ vho lugaho vho ḓodzwaho nga muya mukhethwa na u itwa vho fhelelaho,+ 24 na Yesu ane a vha mupfumedzanyi+ wa mulanga muswa+ na malofha e a ri shasha ngao, ane a fhira a Abele.+
25 Ni thetshelese ane a khou amba. Ngauri vhe vha si thetshelese zwe Mudzimu a amba, vho pfiswa vhuṱungu. Na riṋe ri ḓo pfiswa vhuṱungu vhuhulu arali ra sa thetshelesa ane a amba e ṱaḓulu.+ 26 Nga tshenetsho tshifhinga ipfi ḽawe ḽo dzinginyisa ḽifhasi,+ fhedzi zwino o fhulufhedzisa a ri: “Musi ndi tshi dovha nda dzinginyisa ḽifhasi, ndi ḓo dzinginyisa na ḽiṱaḓulu.”+ 27 Maipfi ane a ri “ndi tshi dovha,” a sumbedza uri Mudzimu u ḓo bvisa zwithu zwo dzinginyiswaho, zwenezwi ndi zwe Mudzimu a si zwi sike, uri hu sale zwi songo dzinginyiswaho. 28 Samusi ri tshi ḓo wana Muvhuso une wa sa ḓo dzinginyiswa, kha ri dzule ri tshi vhuyelwa nga vhuthu vhuhulu, vhune ha ḓo ita uri ri ofhe Mudzimu na u mu hulisa musi ri tshi mu itela mushumo mukhethwa. 29 Ngauri Mudzimu washu u nga mulilo u tshinyadzaho.+