Kha Vhakolosa

4 Inwi vha re na vhalanda, ni vha fare zwavhuḓi nga nḓila yo teaho, ni tshi ḓivha uri na inwi ni na Muṋe ngei ṱaḓulu.+

2 Ni dzule ni tshi rabela,+ ni zwi ite no fhaṱuwa, ni tshi livhuwa.+ 3 Ni ri rabelele+ uri Mudzimu a ri vulele nḓila ya u huwelela ipfi ḽawe, uri ri ḓivhadze tshiphiri tshikhethwa nga ha Kristo, tshe nda farelwa tshone,+ 4 uri ndi tshi ḓivhadze nga nḓila yo teaho.

5 Dzulani ni tshi tshila na vha sa tendiho nga vhuṱali, ni shumise tshifhinga tshaṋu nga vhuṱali.+ 6 Zwine na amba tshifhinga tshoṱhe, ni zwi ambe nga vhuthu, zwi nge zwo shelwa muṋo,+ uri ni kone u ḓivha nḓila ine na ḓo fhindula ngayo vhathu vhoṱhe.+

7 Wahashu Tixiko+ a funwaho, ane a shumela Murena nga u fhulufhedzea u fana na riṋe, u ḓo ni vhudza zwoṱhe nga ha nṋe. 8 Ndi ngazwo ndi tshi khou mu ruma, uri ni ḓivhe nga ha riṋe na uri a ni khuthadze. 9 U khou ḓa na wahashu Onesimo+ a fhulufhedzeaho, ane nda mu funa, we a vha a tshi dzula na inwi; vha ḓo ni vhudza zwoṱhe zwine zwa khou itea ngeno.

10 Aristariko+ ane nda vha nae fhano dzhele u a ni lumelisa, na Marko+ shaka ḽa Baranaba (we na vhudzwa u pfi ni mu ṱanganedze a tshi ḓa),+ 11 na Yesu ane a pfi Yusto, vhenevha ndi vhaṅwe vho fumbaho. Ndi vhone vhane vha tikedza Muvhuso wa Mudzimu, na u nkhuthadza vhukuma. 12 Epafra+ mulanda wa Kristo Yesu we a vha a tshi dzula na inwi, u a ni lumelisa. U dzula a tshi ni rabelela zwi tshi bva mbiluni, uri ni ime no khwaṱha ni vhe vho vhibvaho kha u tenda zwoṱhe zwine Mudzimu a ḓo zwi ita. 13 Ndi a ni khwaṱhisedza uri o shuma nga maanḓa a tshi itela inwi na vha re Laodikea na vha re Hierapoli.

14 Luka+ wa dokotela, ane a funwa u a ni lumelisa, na Dema u a ni lumelisa.+ 15 Ni lumelise vhahashu vha ngei Laodikea na wahashu Nimfa na tshivhidzo tshine tsha kuvhangana nḓuni yawe.+ 16 Musi no no vhala honovhu vhurifhi, ni vhu ise tshivhidzoni tsha Laodikea uri vha vhu vhale,+ na inwi ni vhale vhu bvaho Laodikea. 17 Zwiṅwe hafhu, ni vhudze Arakipo+ uri: “Dzula u tshi ita zwoṱhe zwine wa nga kona uri u ite mushumo* we wa ṋewa nga Murena nga vhuḓalo.”

18 Nṋe Paulo, ndi khou ni lumelisa.*+ Ni dzule ni tshi humbula uri ndo vhofhiwa nga ngeḓane.+ Vhuthu vhuhulu vhu vhe na inwi.