Hesekiele

34 Yehova a dovha a amba na nṋe a ri: 2 “Murwa muthu, porofita nga ha vhalisa vha Isiraele. Porofita, u ambe na vhalisa u ri, ‘Yehova Murena Muvhusahoṱhe u ri: “Khombo kha vhalisa vha Isiraele,+ vhane vha fusha vhone vhaṋe! Naa vhalisa a vho ngo fanela u fulisa sambi?+ 3 Ni ḽa mapfura, na ambara zwiambaro zwo itwaho nga wuḽu, na ṱhavha dzo nonaho,+ fhedzi a ni fulisi sambi.+ 4 A no ngo khwaṱhisa dzi si na nungo kana u fhodza dzi lwalaho kana u banditsha dzo huvhalaho kana u ṱoḓa na u vhuisa dzo xelaho;+ nṱhani hazwo no dzi lisa nga tshiṱuhu.+ 5 Dzo balangana ngauri dzo vha dzi si na mulisa; dzo balangana, dza ḽiwa nga zwivhanda zwoṱhe.+ 6 Nngu dzanga dzo xela thavhani dzoṱhe na zwikwarani zwoṱhe; nngu dzanga dzo balangana ḽifhasini ḽoṱhe, a hu na ane a dzi ṱoḓa.

7 “‘“Nga zwenezwo, ipfani zwine Yehova a amba inwi vhalisa: 8 ‘“Ndi ana nga vhutshilo hanga,” u ralo Yehova Murena Muvhusahoṱhe, “ngauri nngu dzanga dzo no vha dza u vhulawa, dzo no vha zwiḽiwa zwa zwivhanda zwoṱhe, ngauri ho vha hu si na mulisa, vhalisa vhanga a vho ngo ṱoḓa nngu dzanga; nṱhani hazwo, vho bvela phanḓa vha tshi fusha vhone vhaṋe, vha sa fulisi nngu dzanga,”’ 9 nga zwenezwo, ipfani zwine Yehova a amba inwi vhalisa. 10 Yehova Murena Muvhusahoṱhe u ri: ‘Ndi khou lwa na vhalisa, ndi ḓo vha sengisela nngu dzanga,* nda vha pandela uri vha si tsha dzi fulisa,*+ na vhalisa a vha tsha ḓo ḓifusha. Ndi ḓo tshidza nngu dzanga khavho, a vha tsha ḓo dzi ḽa.’”

11 “‘Zwe Yehova Murena Muvhusahoṱhe a zwi amba ndi hezwi: “Nṋe muṋe ndi ḓo ṱoḓa nngu dzanga, ndi ḓo dzi ṱhogomela.+ 12 Ndi ḓo ṱhogomela nngu dzanga sa mulisa musi a tshi wana nngu dzawe dzo balanganaho, a dzi fulisa.+ Ndi ḓo dzi tshidza nda dzi bvisa fhethu hoṱhe he dza balanganela hone musi hu na makole na swiswi.+ 13 Ndi ḓo dzi bvisa kha dzitshaka, nda dzi kuvhanganya dzi tshi bva kha mashango nda dzi vhuisa shangoni ḽadzo, nda dzi fulisa thavhani dza Isiraele,+ milamboni na hune ha dzula vhathu. 14 Ndi ḓo dzi fulisa mafuloni avhuḓi, dzi ḓo fula thavhani ndapfu dza Isiraele.+ Dzi ḓo eḓela henefho mafuloni avhuḓi,+ dzi ḓo fula mafuloni avhuḓi thavhani dza Isiraele.”

15 “‘“Ndi ḓo fulisa nngu dzanga,+ nda dzi ladza fhasi,”+ u ralo Yehova Murena Muvhusahoṱhe. 16 “Dzo xelaho ndi ḓo dzi ṱoḓa+ nda dzi vhuisa, dzo vhaisalaho ndi ḓo dzi banditsha, dzi si na nungo ndi ḓo dzi khwaṱhisa; fhedzi ndi ḓo fhelisa dzo nonaho na dzi re na maanḓa. Ndi ḓo dzi haṱula, nda dzi pfisa vhuṱungu.”

17 “‘Kha inwi nngu dzanga, Yehova Murena Muvhusahoṱhe u ri: “Ndi ḓo haṱula nngu dzanga, ndi ḓo haṱula thutha na zwibokoṱo.+ 18 Naa u fula mafuloni avhuḓi a zwo ngo ni eḓana? Naa ni fanela u kandekanya na maṅwe mafulo aṋu? Musi no no nwa maḓi o kunaho, naa ni fanela u a tshikafhadza nga u a dzikusa nga milenzhe yaṋu? 19 Naa nngu dzanga dzi fanela u fula hatsi he na vhu kandekanya na u nwa maḓi e na a tshikafhadza nga u a dzikusa nga milenzhe yaṋu?”

20 “‘Nga zwenezwo, Yehova Murena Muvhusahoṱhe u amba nadzo a ri: “Ndi ḓo haṱula nngu yo nonaho na yo ondaho, 21 ngauri wo sukumedza dziṅwe nga thumbu yau na nga voho, wa runga dzoṱhe dzi lwalaho nga ṋanga dzau u swika u tshi dzi balanganyela kule. 22 Ndi ḓo tshidza nngu dzanga, a dzi tsha ḓo vhulawa;+ ndi ḓo haṱula nngu. 23 Ndi ḓo dzi ṋea mulisa,+ ane a vha mushumeli wanga Davida,+ u ḓo dzi fulisa. Ene muṋe u ḓo dzi fulisa, a vha mulisa wadzo.+ 24 Nṋe Yehova ndi ḓo vha Mudzimu wadzo,+ mushumeli wanga Davida a vha murangaphanḓa wadzo.+ Ho amba nṋe Yehova.

25 “‘“Ndi ḓo vhofha nadzo mulanga wa mulalo,+ nda fhelisa zwivhanda zwoṱhe zwi re shangoni,+ uri dzi dzule dzo tsireledzea sogani na uri dzi eḓele ḓakani.+ 26 Ndi ḓo ita uri dzone na fhethu hu re tsini na tshikwara hu vhe phaṱhutshedzo,+ ndi ḓo ita uri mvula i ne nga tshifhinga tshayo. Phaṱhutshedzo dzi ḓo na sa mvula.+ 27 Miri ya ḓaka i ḓo aṋwa mitshelo, shango ḽa bveledza zwimela zwaḽo;+ dza dzula nga u tsireledzea shangoni. Ndi hone dzi tshi ḓo ḓivha uri ndi nṋe Yehova musi ndi tshi vunḓa dzhogo+ nda dzi tshidza kha vhe vha dzi thuba. 28 A dzi tsha ḓo zwimiwa nga dzitshaka, na zwivhanda a zwi tsha ḓo dzi ḽa, dzi ḓo dzula dzo tsireledzea, a hu na ane a ḓo dzi tshuwisa.+

29 “‘“Ndi ḓo dzi ṱavhela mafulo a bvumo, a dzi tsha ḓo fa nga nḓala,+ a dzi tsha ḓo nyadziwa nga dzitshaka.+ 30 ‘Ndi hone dzi tshi ḓo zwi ḓivha uri nṋe Yehova Mudzimu wadzo, ndi nadzo na uri vha nnḓu ya Isiraele, ndi vhathu vhanga,’+ u ralo Yehova Murena Muvhusahoṱhe.”’

31 “‘Inwi nngu+ dzanga dzine nda dzi ṱhogomela, ni vhathu, nṋe ndi Mudzimu waṋu,’ u ralo Yehova Murena Muvhusahoṱhe.”