Evangeli Ya Luka

22 Tshifhinga tsho vha tshi tsini+ tsha Vhuṱambo ha Paseka ha Vhurotho vhu si na Mbiliso.+ 2 Vhamaṅwalo na vhahulwane vha vhotshifhe vho vha vha tshi khou ṱoḓa nḓila ine vha nga fara ngayo Yesu uri vha mu vhulaye,+ fhedzi vho vha vha tshi ofha vhathu.+ 3 Saṱhane a ṱuṱuwedza Yudasi, ane a pfi Iskariote, we a vha e muṅwe wa vhaapostola vha 12,+ 4 a ya kha vhahulwane vha vhotshifhe na vhalangi vha vhalindi vha thembele a amba navho nga ha u fheṱa Yesu.+ 5 Vha takala vha fhulufhedzisa u mu ṋea tshelede ya siḽiva.+ 6 A tendelana navho, a ṱoḓa tshibuli tshavhuḓi tsha u mu fheṱa vhathu vha sa zwi ḓivhi.

7 Ha swika ḓuvha ḽa Vhuṱambo ha Vhurotho vhu si na Mbiliso, ḽine ha tea u ṱhavhiwa ngwana ya Paseka;+ 8 Yesu a ruma Petro na Yohane, a ri: “Tshimbilani ni ri lugiselele Paseka ri ḽe.”+ 9 Vha ri: “U ṱoḓa ri tshi i lugiselela ngafhi?” 10 Ene a ri: “Musi ni tshi dzhena muḓini, ni ḓo ṱangana na munna o hwala mudzio wa maḓi. Ni mu tevhele nḓuni ine a ḓo dzhena khayo.+ 11 Ni vhudze muṋe wa nnḓu ni ri, ‘Mufunzi u ri: “I ngafhi kamara ya vhaeni ine nda ḓo ḽela khayo Paseka na vhafunziwa vhanga?”’ 12 Onoyo munna u ḓo ni sumbedza kamara khulwane ya nṱha yo dzudzanywaho. Ni lugiselele Paseka henefho.” 13 Vha ya vha wana zwi nga nḓila ye a vha vhudza ngayo, vha lugiselela Paseka.

14 Musi tshifhinga tshi tshi swika, a dzula ṱafulani na vhaapostola vhawe.+ 15 A amba navho a ri: “Ndi kale ndo lindela uri Paseka i swike, uri ndi i ḽe na inwi ndi sa athu u tambudzwa; 16 ngauri ndi a ni vhudza ndi ri, a thi tsha ḓo dovha nda i ḽa u swikela hu tshi itea zwine ya imela zwone Muvhusoni wa Mudzimu.” 17 A dzhia tshinwelo, a livhuwa a ri: “Dzhiani ni nwe ni tshi tou sielisana, 18 ngauri ndi a ni vhudza ndi ri, u bva zwino, a thi tsha ḓo dovha nda nwa waini u swikela Muvhuso wa Mudzimu u tshi swika.”

19 A dzhia vhurotho,+ a livhuwa, a vhu ṅwata, a vha ṋea a ri: “Vhu imela muvhili wanga,+ une wa ḓo ṋekedzwa u itela inwi.+ Dzulani ni tshi ita zwenezwi u itela u nkhumbula.”+ 20 Musi vho no ḽa tshilalelo, a dzhia tshinwelo a ita zwi fanaho, a ri: “Hetshi tshinwelo tshi imela mulanga muswa+ une wa ḓo vha hone nga nṱhani ha malofha anga+ ane a ḓo shululelwa inwi.+

21 “Fhedzi ane a ḓo mpheṱa u khou ḽa zwiḽiwa na nṋe.+ 22 Ngauri zwoṱhe zwe zwa ṅwaliwa nga ha Murwa muthu zwi ḓo itea.+ Khombo kha onoyo ane a ḓo mu fheṱa!”+ 23 Vha vhudzisana uri ndi nnyi khavho ane a ḓo ita zwenezwo zwithu.+

24 Ha vha na khani vhukati havho ya uri ndi nnyi muhulwane khavho.+ 25 Yesu a ri: “Mahosi a dzitshaka a vhusa vhathu nga nḓila ine a funa, vhane vha langa vhathu vha ḓivhiwa sa vhane vha itela vhaṅwe zwivhuya.*+ 26 Inwi a no ngo fanela u ita nga u ralo.+ Fhedzi ane a ṱoḓa u vha muhulwane vhukati haṋu u fanela u vha muṱuku,+ ane a ṱoḓa u ranga phanḓa a vhe ane a shumela vhaṅwe. 27 Ndi nnyi ane a vha muhulwane, naa ndi ane a khou ḽa zwiḽiwa kana ndi ane a khou ḓisa zwiḽiwa? Naa a si ane a khou ḽa zwiḽiwa? Fhedzi nṋe ndi nga ane a khou ni shumela.+

28 “Naho zwo ralo, ndi inwi vhe na konḓelela na nṋe+ milingoni;+ 29 ndi vhofha mulanga na inwi, samusi na Khotsi anga o vhofha mulanga wa muvhuso na nṋe,+ 30 uri ni ḽe ni nwe ṱafulani ḽanga Muvhusoni wanga,+ ni dzule kha dzikhuluṋoni+ u itela u haṱula tshaka dza 12 dza Isiraele.+

31 “Simoni, Simoni, Saṱhane o ri u khou ṱoḓa u ni sefa noṱhe sa goroi.+ 32 Fhedzi ndo u rabelela uri lutendo lwau lu si fhele,+ musi wo no rembuluwa, u khwaṱhise vharathu vhau.”+ 33 Simoni a ri: “Murena, ndo ḓiimisela u ya na iwe dzhele na u fa na iwe.”+ 34 Yesu a amba na Petro a ri: “Ndi a u vhudza ndi ri, ṋamusi mukukulume u sa athu u lila, u ḓo vha wo no nndandula luraru wa ri a u nḓivhi.”+

35 A vha vhudzisa a ri: “Musi ndi tshi ni ruma ni si na tshelede na mukhwama wa zwiḽiwa na thovho,*+ naa no vhuya na shaya tshithu?” Vha fhindula vha ri: “Hai!” 36 A amba navho a ri: “Fhedzi zwino ane a vha na tshelede nga a bve nayo, na a re na mukhwama wa zwiḽiwa a ite nga u ralo, a si na banga nga a rengise tshiambaro tshawe a ḽi renge. 37 Ndi a ni vhudza ndi ri, kha nṋe hu fanela u itea zwi re kha luṅwalo lune lwa ri, ‘O farwa sa vhaitazwivhi.’+ Zwo ṅwaliwaho nga ha nṋe zwi khou itea.”+ 38 Vhone vha ri: “Murena, mabanga mavhili khea.” Ene a ri: “O lingana.”

39 A ya Thavhani ya Miṱwari sa nga misi, vhafunziwa vhawe vha mu tevhela.+ 40 Musi a tshi swika henefho, a ri: “Bvelani phanḓa ni tshi rabela uri ni si dzhene mulingoni.”+ 41 A vha sia a fhirela phanḓanyana, a gwadama a rabela, 42 a ri: “Khotsi, arali u tshi funa, bvisa tshinwelo itshi kha nṋe. Naho zwo ralo, hu songo itwa zwine nṋe nda zwi funa, fhedzi nga hu itwe zwi funwaho nga iwe.”+ 43 Ha ḓa muruṅwa a tshi bva ṱaḓulu a mu khwaṱhisa.+ 44 Fhedzi o vha a tshi khou pfa vhuṱungu lwe a bvela phanḓa a tshi rabela zwi tshi bva mbiluni,+ biko ḽawe ḽa rothela fhasi sa marotha a malofha. 45 Musi o no rabela, a ya kha vhafunziwa vhawe a wana vho eḓela nga u ṱungufhala.+ 46 A amba navho a ri: “Ndi ngani no eḓela? Vuwani ni bvele phanḓa ni tshi rabela, uri ni si dzhene mulingoni.”+

47 Musi a tshi kha ḓi amba, ha swika Yudasi muṅwe wa vhaapostola vha 12, o ranga phanḓa gogo, a ya kha Yesu a mu khisa.+ 48 Fhedzi Yesu a amba nae a ri: “Yudasi, naa u khou fheṱa Murwa muthu nga khisi?” 49 Musi vhane a vha navho vha tshi vhona zwine zwa ḓo itea, vha ri: “Murena, naa ri vha reme nga banga?” 50 Muṅwe wavho a tumula nḓevhe ya tsha u ḽa ya mulanda wa tshifhe muhulu.+ 51 Fhedzi Yesu a ri: “Litsha zwine wa khou ita.” A kwama nḓevhe ya onoyo mulanda a mu fhodza. 52 Yesu a amba na vhahulwane vha vhotshifhe, vhalangi vha vhalindi vha thembele na vhahulwane vho ḓaho u mu fara, a ri: “Naa no bva no fara mabanga na thonga zwa tou nga ni khou ḓa u fara ḽivemu?+ 53 Ndo vha ndi tshi ṱwa thembeleni ḓuvha ḽiṅwe na ḽiṅwe,+ fhedzi a no ngo mpfara.+ Fhedzi zwino ndi tshifhinga tshaṋu na tsha uri swiswi ḽi vhuse.”+

54 Vha mu fara vha mu isa+ nḓuni ya tshifhe muhulu; fhedzi Petro o vha a tshi khou tevhela nga kule.+ 55 Petro o vha o dzula navho musi vha tshi vhasa mulilo vhukati ha muṱa.+ 56 Fhedzi mushumeli wa mufumakadzi a mu vhona a tshi khou ora mulilo a mu lavhelesa a ri: “Hoyu munna o vha a tshi tshimbila na Yesu.” 57 Fhedzi Petro a hanedza a ri: “Hoyo munna a thi mu ḓivhi.” 58 Nga murahu ha tshifhinganyana, muṅwe muthu a mu vhona a ri: “Na iwe u muṅwe wavho.” Petro a ri: “A thi muṅwe wavho.”+ 59 Ho no fhela tshifhinga tshi ṱoḓaho u vha awara, muṅwe munna a ri: “Hoyu munna o vha a tshi tshimbila nae, ndi Mugalilea!” 60 Fhedzi Petro a ri: “Zwine wa khou zwi amba a thi zwi ḓivhi.” Nga u ṱavhanya musi a tshi kha ḓi amba, mukukulume wa lila. 61 Murena a rembuluwa a lavhelesa Petro, Petro a humbula zwe Murena a zwi amba a tshi ri: “Musi mukukulume u sa athu u lila ṋamusi, u ḓo vha wo no nndandula luraru.”+ 62 Petro a bvela nnḓa a lila lu ṱungufhadzaho.

63 Yesu a rwiwa na u goḓiwa+ nga vhanna vho mu faraho,+ 64 vha mu thivha tshifhaṱuwo vha mu vhudzisa vha ri: “Porofita! Wo rwiwa nga nnyi?” 65 Vha mu sema na nga maṅwe maṱamba manzhi.

66 Nga matsheloni, ha kuvhangana vhahulwane vha vhathu, vhamaṅwalo na vhahulwane vha vhotshifhe,+ vha mu isa holoni yavho ya Sanihedrini,* vha ri: 67 “Ri vhudze arali u Kristo.”+ Fhedzi ene a ri: “Naho nda ni vhudza, a ni nga tendi. 68 Naho nda ni vhudzisa, a ni nga fhinduli. 69 Naho zwo ralo, u bva zwino Murwa muthu+ u ḓo vha o dzula thungo ya tshanḓa tsha u ḽa tsha maanḓa tsha Mudzimu.”+ 70 Vha tshi pfa zwenezwo vha ri: “Naa u Murwa wa Mudzimu?” Ene a ri: “Ndi inwi vhane na khou amba nga u ralo.” 71 Vha ri: “Ri kha ḓi ṱoḓa vhuṅwe vhuṱanzi ha mini? Ngauri roṱhe ro pfa zwe a zwi amba.”+