Genesi

1 U rangani* Mudzimu o sika ḽiṱaḓulu na ḽifhasi.+

2 Ḽifhasi ḽo vha ḽo ṱanganana ḽi si na tshithu, hu na swiswi dzivhani;+ maanḓa a Mudzimu*+ o vha a tshi ya phanḓa na murahu nṱha ha maḓi.+

3 Mudzimu a ri: “Nga hu vhe na tshedza.” Tshedza+ tsha vha hone. 4 Nga murahu ha zwenezwo, Mudzimu a vhona uri tshedza tsho vha tshi tshavhuḓi, Mudzimu a fhandekanya tshedza na swiswi. 5 Mudzimu a ri tshedza tshi pfi Masiari, fhedzi swiswi a ri ḽi pfi Vhusiku.+ Ḽa kovhela, ḽa tsha, ha vha ḓuvha ḽa u thoma.

6 Mudzimu a ri: “Nga hu vhe na tshikhala+ vhukati ha maḓi, tshi fhandekanye maḓi na maḓi.”+ 7 Mudzimu a ita tshikhala, a fhandekanya maḓi a re fhasi ha tshikhala na maḓi a re nṱha ha tshikhala.+ Zwa vha nga u ralo. 8 Mudzimu a ri tshikhala tshi pfi Ḽiṱaḓulu.* Ḽa kovhela, ḽa tsha, ha vha ḓuvha ḽa vhuvhili.

9 Mudzimu a ri: “Maḓi a re nga fhasi ha ḽiṱaḓulu nga a kuvhangane fhethu huthihi, hu vhe na shango.”+ Zwa vha nga u ralo. 10 Mudzimu a ri ho omaho hu pfi Ḽifhasi,+ fhedzi ho kuvhanganaho maḓi a ri hu pfi Lwanzhe.+ Mudzimu a vhona zwi zwavhuḓi.+ 11 Mudzimu a ri: “Ḽifhasi kha ḽi medze hatsi, zwimela zwine zwa aṋwa mbeu na miri ya mitshelo ine ya aṋwa mitshelo i re na mbeu u ya nga mifuda yayo kha ḽifhasi.” Zwa vha nga u ralo. 12 Ḽifhasi ḽa medza hatsi, zwimela+ zwine zwa aṋwa mbeu na miri ine ya aṋwa mitshelo i re na mbeu u ya nga mifuda yayo. Mudzimu a vhona zwi zwavhuḓi. 13 Ḽa kovhela, ḽa tsha, ha vha ḓuvha ḽa vhuraru.

14 Mudzimu a ri: “Nga hu vhe na zwivhonetsheli*+ tshikhalani tsha ḽiṱaḓulu zwa u fhandekanya masiari na vhusiku;+ zwine zwa ḓo shuma sa zwiga zwa dzikhalaṅwaha na maḓuvha na miṅwaha.+ 15 Zwi ḓo shuma sa zwivhonetsheli tshikhalani tsha ḽiṱaḓulu uri zwi vhonetshele ḽifhasi.” Zwa vha nga u ralo. 16 Mudzimu o ita zwivhonetsheli zwivhili zwihulwane, tshivhonetsheli tshihulwane tsha u vhonetshela nga masiari+ na tshivhonetsheli tshiṱuku tsha u vhonetshela vhusiku, a dovha a ita na dziṋaledzi.+ 17 Mudzimu a zwi vhea tshikhalani tsha ḽiṱaḓulu uri zwi vhonetshele ḽifhasi 18 na uri zwi vhonetshele masiari na vhusiku uri zwi fhandekanye tshedza na swiswi.+ Mudzimu a vhona zwi zwavhuḓi. 19 Ḽa kovhela, ḽa tsha, ha vha ḓuvha ḽa vhuṋa.

20 Mudzimu a ri: “Maḓini nga hu vhe na zwi tshilaho,* hu vhe na zwiṋoni zwi fhufhaho ḽifhasini zwi tshi ya tshikhalani tsha ḽiṱaḓulu.”*+ 21 Mudzimu a vhumba zwivhumbiwa* zwihulwane zwa lwanzheni na zwoṱhe zwi tshilaho, zwi tshatshamaho maḓini u ya nga mifuda yazwo na zwiṋoni zwi fhufhaho u ya nga mifuda yazwo. Mudzimu a vhona zwi zwavhuḓi. 22 Mudzimu a zwi fhaṱutshedza a ri: “Kha zwi bebe zwi vhe zwinzhi zwi ḓale maḓini a lwanzheni,+ zwiṋoni zwi vhe zwinzhi kha ḽifhasi.” 23 Ḽa kovhela, ḽa tsha, ha vha ḓuvha ḽa vhuṱanu.

24 Mudzimu a ri: “Ḽifhasi kha ḽi bveledze zwi tshilaho u ya nga mifuda yazwo, zwifuwo na zwikokovhi na phukha dza kha ḽifhasi u ya nga mifuda yadzo.”+ Zwa vha nga u ralo. 25 A dovha a ita phukha na zwifuwo kha ḽifhasi u ya nga mifuda yazwo na zwikokovhi zwoṱhe u ya nga mifuda yazwo. Mudzimu a vhona zwi zwavhuḓi.

26 Nga zwenezwo, Mudzimu a ri: “Kha ri+ ite vhathu ri tshi ḓifanyisa,+ uri vha fane na riṋe,+ vha vhuse khovhe dza lwanzhe, zwiṋoni, zwifuwo, ḽifhasi ḽoṱhe na zwikokovhi zwoṱhe.”+ 27 Mudzimu a sika muthu a tshi ḓifanyisa, a mu sika a tshi fana nae; a sika munna na mufumakadzi.+ 28 Zwiṅwe hafhu, Mudzimu a vha fhaṱutshedza a ri: “Bebani ni vhe vhanzhi ni ḓadze ḽifhasi+ ni ḽi vhuse,+ ni vhuse+ khovhe na zwiṋoni na zwivhumbiwa zwoṱhe zwi tshilaho zwi tshatshamaho kha ḽifhasi.”

29 Mudzimu a ri: “Ndo ni ṋea zwimela zwoṱhe zwine zwa aṋwa mbeu na miri yoṱhe ine ya aṋwa mitshelo i re na mbeu. Kha zwi vhe zwiḽiwa zwaṋu.+ 30 Ndo ṋea phukha dzoṱhe dza kha ḽifhasi na zwiṋoni zwoṱhe zwa ḽiṱaḓulu na zwoṱhe zwi tshatshamaho kha ḽifhasi zwi tshilaho uri zwi ḽe zwimela zwoṱhe zwidala.”+ Zwa vha nga u ralo.

31 Nga murahu Mudzimu a lavhelesa zwoṱhe zwe a ita, a vhona zwi zwavhuḓi vhukuma.+ Ḽa kovhela, ḽa tsha, ha vha ḓuvha ḽa vhurathi.