Evangeli Ya Yohane

2 Nga ḓuvha ḽa vhuraru ho vha hu na munyanya wa mbingano ngei Kana kha ḽa Galilea, na mme a Yesu o vha e henefho. 2 Yesu na vhafunziwa vhawe na vhone vho vha vho rambiwa kha wonoyo munyanya.

3 Musi waini i tshi fhela, mme a Yesu a amba nae a ri: “A vha tshee na waini.” 4 Fhedzi Yesu a ri: “Zwi ri kwama hani riṋe? Tshifhinga tshanga a tshi athu u swika.” 5 Mme awe a amba na vhane vha khou shuma henefho, a ri: “Ni ite zwine a ni vhudza.” 6 Henefho ho vha hu na nkho dza maḓi dza rathi dza matombo samusi zwo vha zwi tshi ṱoḓiwa nga milayo ya u ḓikunakisa ya Vhayuda,+ dzenedzo nkho dzo vha dzi tshi ḓala nga ḽithara dzi ṱoḓaho u vha 44 kana dza 66. 7 Yesu a amba navho a ri: “Ḓadzani dzinkho nga maḓi.” Vhone vha dzi ḓadza dza tou pha! 8 A amba navho a ri: “Ikani maṅwe ni a ise kha mulanguli wa munyanya.” Vhone vha ka, vha a isa. 9 Mulanguli wa munyanya o thetshela maḓi e a vha o shandulwa a vha waini. Fhedzi o vha a sa ḓivhi uri waini i bva ngafhi (naho vhashumi vho kaho maḓi vho vha vha tshi zwi ḓivha). Mulanguli wa munyanya a vhidza mukwasha 10 a ri: “Vhaṅwe vha thoma nga u ṋea vhaeni waini yavhuḓi, musi vho no kambiwa vha vha ṋea i si yavhuḓi. Fhedzi iwe ndi hone u tshi khou ṋea vhaeni waini yavhuḓi zwino.” 11 Honoho ndi hone vhuṱolo ha u thoma he Yesu a vhu ita ngei Kana kha ḽa Galilea, a sumbedza vhugala hawe;+ vhafunziwa vhawe vha mu tenda.

12 Nga murahu ha zwenezwo, ene na mme awe na vharathu vhawe+ na vhafunziwa vhawe vha tsela Kapernaume,+ fhedzi a vho ngo dzula maḓuvha manzhi henefho.

13 Tshifhinga tsha Paseka+ ya Vhayuda tsho vha tshi tsini, Yesu a gonya Yerusalema. 14 A wana thembeleni ho dzula vhatshintshi vha tshelede na vharengisi vha kholomo, nngu na maivha.+ 15 Musi o no ita tshimebi nga thambo, a pandela vhoṱhe vha re na nngu na kholomo thembeleni, a shulula tshelede ya vhatshintshi vha tshelede na u thudzekanya maṱafula avho.+ 16 A amba na vharengisi vha maivha a ri: “Bviselani kule zwithu zwaṋu! Litshani u ita nnḓu ya Khotsi anga fhethu ha mabindu.”*+ 17 Vhafunziwa vhawe vha humbula uri ho ṅwaliwa u pfi: “Ndi ḓo fhisetshela nnḓu yau.”+

18 Vhayuda vha ri: “Ndi vhuṱolo vhufhio vhune wa nga ri sumbedza hone,+ samusi u tshi khou ita zwenezwi zwithu?” 19 Yesu a ri: “Thuthani heyi thembele, ndi ḓo i fhaṱulula nga maḓuvha mararu.”+ 20 Vhayuda vha ri: “Heyi thembele yo fhaṱiwa nga miṅwaha ya 46, naa iwe u nga i fhaṱulula nga maḓuvha mararu?” 21 Musi a tshi amba nga ha thembele o vha a tshi khou amba nga ha muvhili wawe.+ 22 Musi a tshi vuswa vhafuni, vhafunziwa vhawe vha humbula zwe a vha a tshi zwi amba,+ vha tenda maṅwalo na zwe Yesu a zwi amba.

23 Musi e Yerusalema vhuṱamboni ha Paseka, vhathu vhanzhi vha vha na lutendo dzinani ḽawe, nga nṱhani ha u vhona vhuṱolo he a vha a tshi khou vhu ita. 24 Fhedzi Yesu o vha a sa vha fhulufheli tshoṱhe, ngauri o vha a tshi vha ḓivha vhoṱhe, 25 a sa ṱoḓi u vhudzwa nḓila ine muthu a humbula ngayo, ngauri o vha a tshi ḓivha zwi re mbiluni ya muthu.+