Bugu Ya Vhuvhili Ya Dzikhosi
22 Yosia+ o vha e na miṅwaha ya malo musi a tshi vha khosi, o vhusa miṅwaha ya 31 e Yerusalema.+ Mme awe o vha a tshi pfi Yedida ṅwana wa Adaya wa ngei Bosokati.+ 2 O ita zwo lugaho phanḓa ha Yehova, a tshimbila nḓilani dzoṱhe dza Davida makhulukuku wawe,+ ho ngo pambutshela thungo ya tsha u ḽa kana ya tsha monde.
3 Nga ṅwaha wa vhu 18 hu tshi khou vhusa Khosi Yosia, khosi yo ruma Shafani muṅwaleli, murwa wa Atsalia murwa wa Meshulamu, nḓuni ya Yehova+ ya ri: 4 “Gonya kha tshifhe muhulu Hilikia,+ u mu vhudze uri a kuvhanganye tshelede yoṱhe ine ya khou ḓiswa nḓuni ya Yehova,+ ine vhalindi vha miṋango vha khou i kuvhanganya kha vhathu.+ 5 Vha i ṋee vho vhewaho uri vha ṱhogomele mushumo une wa itwa nḓuni ya Yehova, uri vha kone u i ṋea vhashumi vha nḓuni ya Yehova vhane vha ḓo lugisa fhethu ho tshinyalaho* nḓuni,+ 6 vhane vha vha vhanna vha re na vhutsila, vhafhaṱi, vhatsheṱi vha matombo; vha fanela u i shumisa u renga matanda na matombo o tsheṱiwaho uri vha lugise nnḓu.+ 7 Fhedzi hu songo ṱoḓwa vhuṱanzi khavho nga ha tshelede ye vha ṋewa, ngauri vha a fhulufhedzea.”+
8 Nga murahu tshifhe muhulu Hilikia a amba na Shafani muṅwaleli+ a ri: “Ndo wana bugu ya Mulayo+ nḓuni ya Yehova.” Hilikia a i ṋea Shafani, a thoma u i vhala.+ 9 Shafani muṅwaleli a ya kha khosi a amba nayo a ri: “Vhashumeli vhau vho dzhia tshelede ye vha i wana nḓuni, vha i ṋea vho vhewaho uri vha ṱhogomele mushumo une wa itwa nḓuni ya Yehova.”+ 10 Shafani muṅwaleli a dovha a amba na khosi a ri: “Hu na bugu+ ye tshifhe Hilikia a nṋea yone.” Shafani a thoma u i vhala phanḓa ha khosi.
11 Musi khosi i tshi tou pfa mafhungo a re kha bugu ya Mulayo, ya kherukanya zwiambaro zwayo.+ 12 Khosi ya laya tshifhe Hilikia, Ahikamu+ murwa wa Shafani, Akiboro murwa wa Mikaya, Shafani muṅwaleli na Asaya mushumeli wa khosi ya ri: 13 “Iyani ni mmbudzisele kha Yehova, ni vhudzisele na vhathu khathihi na Vhayuda vhoṱhe nga ha mafhungo a yeneyi bugu ye ya wanala; ngauri Yehova o ri sinyutshela vhukuma+ nge vhomakhulukuku washu vha si thetshelese mafhungo o ṅwaliwaho kha yeneyi bugu, vha si tevhedze zwoṱhe zwo ṅwaliwaho khayo nga ha riṋe.”
14 Tshifhe Hilikia, Ahikamu, Akiboro, Shafani na Asaya vha ya kha muporofita Huluda+ mufumakadzi wa Shalumu murwa wa Thikiva murwa wa Hasara. Shalumu a ṱhogomelaho kamara ya u vhea zwiambaro. Huluda o vha a tshi dzula kha Tshiṱiriki Tshiswa tsha Yerusalema; vha amba nae henefho.+ 15 A amba navho a ri: “Zwe Yehova Mudzimu wa Isiraele a zwi amba ndi hezwi: ‘Vhudza munna o u rumaho kha nṋe u ri: 16 “Yehova u ri: ‘Ndi ḓo ḓisa maṱungu henefha fhethu na kha vhadzulapo vhaho, u ya nga mafhungo oṱhe a re kha bugu ye khosi ya Yuda ya i vhala.+ 17 Ngauri vho nṱutshela, vha dubisela miṅwe midzimu zwiṱhavhelo+ uri vha ntsinyuse nga mishumo yoṱhe ya zwanḓa zwavho,+ mbiti dzanga dzi ḓo dugela henefha fhethu, a dzi nga dzimiwi.’”+ 18 Fhedzi khosi ya Yuda ye ya ni ruma u vhudzisa Yehova, ni i vhudze uri, “Yehova Mudzimu wa Isiraele u ri: ‘Kha mafhungo e wa a pfa, 19 ngauri wo ṱavhanya wa ḓisola, wa ḓiṱukufhadza+ phanḓa ha Yehova musi u tshi pfa zwe nda zwi amba nga ha henefha fhethu na vhadzulapo vhaho, musi ndi tshi ri vha ḓo tshuwa, vha semiwa. Iwe wa kherukanya zwiambaro zwau+ wa lila phanḓa hanga. Na thabelo yau ndo i pfa, u ralo Yehova. 20 Ndi ngazwo u tshi ḓo fa wa vhulungwa na vhomakhulukuku wau, u ḓo vhulungwa ḽo lala, a u nga vhoni maṱungu oṱhe ane nda ḓo a ḓisa fhano.’”’” Vha ḓivhadza khosi eneo mafhungo.