Mishumo Ya Vhaapostola

8 Saulo o takalela u vhulawa ha Stefano.+

U bva nga tshenetsho tshifhinga, tshivhidzo tsha Yerusalema tsha tovholwa zwihulu; vhoṱhe vha balangana vha ya madzinguni a Yudea na Samaria nga nnḓa ha vhaapostola.+ 2 Fhedzi vhanna vha ofhaho Mudzimu vha dzhia Stefano vha mu vhulunga, vha mu lilela zwihulu. 3 Naho zwo ralo, Saulo o vha a tshi tambudza tshivhidzo. A tshi bva kha iṅwe nnḓu a tshi ya kha iṅwe, a tshi kokodza vhanna na vhafumakadzi, a tshi vha isa dzhele.+

4 Fhedzi vhe vha balangana vho tshimbila vha tshi ḓivhadza mafhungo maḓifha a ipfi ḽa Mudzimu.+ 5 Filipo o ya muḓini wa Samaria+ a vha funza nga ha Kristo. 6 Vhathu vhoṱhe vha thetshelesa nga vhuronwane zwe Filipo a vha a tshi khou zwi amba na u sedza vhuṱolo he a vha a tshi khou vhu ita. 7 Ngauri ho vha hu na vhathu vhanzhi vha re na madimoni. O vha a tshi bva khavho a tshi khou ṱavha mukosi.+ Ha fhodzwa na vhathu vhanzhi vho omaho lurumbu na vho holefhalaho. 8 Vhathu vha wonoyo muḓi vha takala zwihulu.

9 Kha wonoyo muḓi ho vha hu na muṅwe munna we a vha a tshi pfi Simoni, we a vha a tshi ita manditi, a tshi mangadza lushaka lwa Samaria, a tshi amba uri u muthu wa ndeme. 10 Vhathu vhoṱhe, u bva kha muṱuku u swika kha muhulwane, vho vha vha tshi mu thetshelesa, vha tshi ri: “Hoyu munna u na maanḓa mahulu a bvaho kha Mudzimu.” 11 Vho vha vha tshi mu thetshelesa ngauri ho vha hu kale a tshi vha mangadza nga u ita manditi. 12 Fhedzi musi vho no tenda Filipo, we a vha a tshi khou ḓivhadza mafhungo maḓifha a Muvhuso wa Mudzimu+ na a dzina ḽa Yesu Kristo, vhanna na vhafumakadzi vha lovhedzwa.+ 13 Musi Simoni o no vha mutendi, a lovhedzwa, a dzula e na Filipo;+ a mangala musi a tshi vhona vhuṱolo na mishumo mihulu ine ya khou itwa.

14 Musi vhaapostola vha Yerusalema vha tshi pfa uri vhathu vha Samaria vho ṱanganedza ipfi ḽa Mudzimu,+ vha ruma Petro na Yohane uri vha ye khavho. 15 Vhenevho vha ya henengei vha vha rabelela uri vha wane muya mukhethwa.+ 16 Ngauri vho vha vho lovhedzwa dzinani ḽa Murena Yesu,+ fhedzi vha sa athu u wana muya mukhethwa. 17 Vha vha vhea zwanḓa,+ vha kona u wana muya mukhethwa.

18 Musi Simoni a tshi vhona uri vhathu vhane vha khou vhewa zwanḓa nga vhaapostola vha khou wana muya mukhethwa, a vha fhulufhedzisa u vha ṋea tshelede, 19 a ri: “Nṋeeni enea maanḓa, uri ane nda mu vhea zwanḓa a wane muya mukhethwa.” 20 Petro a ri: “Ngavhe u tshi lovha na tshelede yau, ngauri u humbula uri u nga renga tshifhiwa tsha Mudzimu nga tshelede.+ 21 Kha enea mafhungo a u na mukovhe, ngauri a u fhulufhedzei phanḓa ha Mudzimu. 22 Rembuluwa u laṱe vhuvhi hau, u rabele Yehova* uri u shandule mihumbulo yau mivhi uri a kone u u hangwela; 23 ngauri ndo zwi vhona uri u na vivho, tshifhinga tshoṱhe u ṱoḓa u ita zwithu zwivhi.” 24 Simoni a ri: “Ndi a ni humbela uri ni nthabelele kha Yehova* uri zwoṱhe zwe na zwi amba zwi si itee kha nṋe.”

25 Musi vho no ṱanziela nga vhuḓalo na u amba nga ha ipfi ḽa Yehova,* vha fara lwendo lwa u ya Yerusalema, vha tshimbila vha tshi ḓivhadza mafhungo maḓifha miḓanani minzhi ya Vhasamaria.+

26 Muruṅwa+ wa Yehova* a amba na Filipo a ri: “Takuwa u ye thungo ya tshipembe nḓilani ine ya bva Yerusalema i tshi ya Gaza.” (Yeneyi ndi nḓila i re sogani.) 27 Filipo a ya uri a ṱangane na munna wa Muetopia, we a vha e muḓinḓa wa Kandatse, khosi ya mufumakadzi wa Vhaetopia. Onoyo munna o vha a tshi ṱhogomela lupfumo lwoṱhe lwa onoyo mufumakadzi. O vha o ya Yerusalema u rabela,+ 28 fhedzi o vha a tshi khou humela murahu, o dzula garikini yawe a tshi khou vhalela nṱha bugu ya muporofita Yesaya. 29 Mudzimu a amba na Filipo a tshi shumisa muya mukhethwa, a ri: “Iya tsini na yeneyo gariki.” 30 Filipo a gidima a sendela tsini na yeneyo gariki, a pfa a tshi khou vhala bugu ya muporofita Yesaya, a mu vhudzisa a ri: “Naa u khou pfesesa zwine wa khou zwi vhala?” 31 Ene a ri: “Ndi ḓo zwi pfesesa hani hu si na ane a nga mpfunza?” A humbela Filipo uri a ṋamele a dzule nae. 32 O vha a tshi khou vhala ndimana ya Luṅwalo ine ya ri: “O vha a tshi nga nngu ine ya khou ya u ṱhavhiwa, a tshi nga ngwana i sa lili musi i tshi vheulwa, a si ambe tshithu.+ 33 Tshifhingani tsha u nyadziwa hawe ho ngo haṱulwa nga nḓila yo teaho.+ Ndi nnyi ane a nga ri vhudza uri ndi ṅwana wa nnyi? Ngauri u ḓo vhulawa fhano kha ḽifhasi.”+

34 Muḓinḓa a amba na Filipo a ri: “Ndi a u humbela, mmbudze uri muporofita o vha a tshi khou amba nga ha nnyi? O vha a tshi khou amba nga ha ene muṋe kana nga ha muṅwe muthu?” 35 Filipo a thoma u amba nga ha lwonolwu luṅwalo, a mu ḓivhadza mafhungo maḓifha nga ha Yesu. 36 Musi vhe nḓilani, vha vhona tivha ḽa maḓi, muḓinḓa a ri: “Kheḽi tivha ḽa maḓi; ndi ngani ndi sa lovhedzwi?” 37* —— 38 A imisa gariki, ene na Filipo vha dzhena maḓini; Filipo a mu lovhedza. 39 Musi vha tshi bva maḓini, muya mukhethwa wa Yehova* wa ṱuwisa Filipo nga u ṱavhanya, muḓinḓa a si tsha mu vhona, a ṱuwa o takala. 40 Filipo a ya Asidodo, a bvela phanḓa a tshi ḓivhadza mafhungo maḓifha miḓini yoṱhe u swika Kesarea.+