Mishumo Ya Vhaapostola

3 Ḽiṅwe ḓuvha Petro na Yohane vha tshi khou ya thembeleni nga tshifhinga tsha u rabela nga awara ya vhuṱahe,* 2 vha ṱangana na muṅwe munna o bebiwaho o holefhala a tshi khou iswa thembeleni. Onoyo munna o vha a tshi dzudzwa tsini na khoro ya thembele, ine ya pfi Khoro Yavhuḓi ḓuvha ḽiṅwe na ḽiṅwe, uri a humbele tshelede kha vhane vha khou dzhena thembeleni. 3 Musi a tshi vhona Petro na Yohane vha tshi khou dzhena thembeleni, a vha humbela tshelede. 4 Fhedzi Petro na Yohane vha mu lavhelesa vha amba nae vha ri: “Ri lavhelese.” 5 A vha lavhelesa a tshi khou humbula uri vha ḓo mu ṋea tshelede. 6 Fhedzi Petro a ri: “Siḽiva na musuku a thi na, ndi ḓo u ṋea zwine nda vha nazwo. Dzinani ḽa Yesu Kristo wa Nazaretha ndi ri, takuwa u tshimbile.”+ 7 A mu fara nga tshanḓa tsha u ḽa a mu takusa.+ Nga u ṱavhanya milenzhe yawe ya fhola;+ 8 musi a tshi tou ima nga milenzhe,+ a thoma u tshimbila. A dzhena navho thembeleni, a tshi khou tshimbila, a tshi khou fhufha-fhufha, a tshi renda Mudzimu. 9 Vhathu vhoṱhe vha mu vhona a tshi khou tshimbila, a tshi khou renda Mudzimu. 10 Vha zwi vhona uri ndi uḽa munna we a vha a tshi humbela tshelede o dzula tsini na khoro ya thembele, ine ya pfi Khoro Yavhuḓi,+ vha mangala na u takala zwihulu vha tshi vhona zwe zwa itea khae.

11 Musi onoyo munna a tshi kha ḓi vha o fara Petro na Yohane nga zwanḓa, vhathu vha vha gidimela vha swika vha kuvhangana Phasedzhini ya Salomo,+ vho mangadzwa nga zwe vha zwi vhona. 12 Musi Petro a tshi zwi vhona, a amba na vhenevho vhathu a ri: “Vhathu vha Isiraele, ndi ngani ni tshi mangadzwa nga izwi zwithu? Ndi ngani no ri sedza zwa tou nga ro ita uri a tshimbile nga maanḓa ashu kana nga u ḓikumedzela hashu kha Mudzimu? 13 Mudzimu wa Abrahamu, Isaka na Yakobo,+ Mudzimu wa vhomakhulukuku washu, o hulisa Mushumeli+ wawe Yesu,+ we na mu landula na u mu kumedzela uri a vhulawe+ naho Pilato o vha a tshi khou ṱoḓa u mu vhofholola. 14 No landula onoyo ane a vha mukhethwa na o lugaho, na humbela uri hu vhofhololwe munna we a vha e muvhulayi,+ 15 ngeno no vhulaya Murangaphanḓa Muhulwane wa vhutshilo.+ Fhedzi Mudzimu o mu vusa vhafuni, ri ṱhanzi dza eneo mafhungo.+ 16 Onoyu munna ane na khou mu vhona na ane na mu ḓivha o fhodzwa milenzhe dzinani ḽa Yesu na ngauri ri tenda kha dzina ḽa Yesu, hoyu munna o fhola ni tshi zwi vhona ngauri ri tenda Yesu. 17 Vhahashu, ndi a zwi ḓivha uri inwi na vhavhusi+ vhaṋu no zwi ita nga u sa ḓivha.+ 18 Mudzimu o tendela zwenezwi zwi tshi itea uri hu itee zwe a vha o no zwi amba a tshi shumisa vhaporofita vhoṱhe, uri Kristo u ḓo tambula.+

19 “Rembuluwani,+ ni vhuyelele+ kha Mudzimu uri ni hangwelwe zwivhi,*+ Yehova* a ni homolose, 20 uri a rumele Kristo ane a vha Yesu we a vhewa hu tshi itelwa inwi. 21 Onoyo u fanela u dzula ṱaḓulu u swika tshifhinga tshine Mudzimu a ḓo vusulusa ngatsho zwithu zwoṱhe zwe a zwi amba a tshi shumisa vhaporofita vhawe vhakhethwa vha kale. 22 Na Mushe o ri: ‘Yehova* Mudzimu waṋu u ḓo ni vusela muporofita ane a nga nṋe vhukati ha vhahaṋu.+ Ni thetshelese zwoṱhe zwine a ni vhudza zwone.+ 23 Mudzimu u ḓo fhelisa ane a si thetshelese onoyo Muporofita.’+ 24 Na vhaporofita vhoṱhe vho amba nga ha enea maḓuvha,+ u thoma nga muporofita Samuele. 25 Vhenevho vhaporofita vho amba nga ha mulanga we Mudzimu a u vhofha na vhomakhulukuku waṋu.+ Wonoyo mulanga wo itelwa na inwi ngauri Mudzimu o fhulufhedzisa Abrahamu uri: ‘Miṱa yoṱhe ya shangoni i ḓo fhaṱutshedzwa nga nṱhani ha vhana* vhau.’+ 26 Musi Mudzimu o no vusa Mushumeli wawe, o mu ruma kha inwi u thoma+ uri a ni fhaṱutshedze nga u ni thusa uri ni rembuluwe kha mishumo yaṋu mivhi.”