Daniele

11 “Nga ṅwaha wa u thoma musi hu tshi khou vhusa Dario+ wa Mumeda, nṋe ndo takuwa nda mu khwaṱhisa na u mu tsireledza. 2 Zwine nda ḓo u vhudza zwino ndi ngoho:

“Hu ḓo vha na dziṅwe khosi tharu Peresia, khosi ya vhuṋa i ḓo kuvhanganya lupfumo luhulu u fhira dziṅwe khosi dzoṱhe. Musi lupfumo lwayo lu tshi ita uri i vhe na maanḓa, i ḓo lwa na muvhuso wa Gerika+ nga zwoṱhe zwine ya vha nazwo.

3 “Hu ḓo vha na khosi i re na maanḓa ine ya ḓo vha na muvhuso muhulu,+ ya ita zwine ya funa. 4 Musi yo no vha hone, muvhuso wayo u ḓo vunḓekanywa na u fhandekanywa wa ya thungo dzoṱhe,+ fhedzi a u nga ṋewi vhana vhayo, wonoyo muvhuso u nga si fane na we ya u vhusa; ngauri muvhuso wayo u ḓo tupulwa wa ṋewa vhaṅwe.

5 “Khosi ya tshipembe ine ya vha muṅwe wa vhakololo* vhayo, i ḓo vha na maanḓa, fhedzi i ḓo kundwa nga muṅwe ane a ḓo vhusa nga maanḓa mahulu u fhira e ya* vha i nao.

6 “Musi ho no fhela miṅwaha, dzi ḓo konana, ṅwananyana wa khosi ya tshipembe u ḓo ḓa kha khosi ya devhula uri vha ite thendelano. Onoyo ṅwananyana a nga si dzule e na maanḓa; khosi i ḓo wa. I si tsha vha na maanḓa. Fhedzi ṅwananyana u ḓo kumedzelwa na vhe vha mu ḓisa na we a mu beba na we a mu khwaṱhisa nga tshenetsho tshifhinga. 7 Muṅwe wa shaka ḽa onoyo ṅwananyana u ḓo dzhia vhudzulo hawe,* fhedzi u ḓo ḓa a lwa na mmbi, a swika na vhushavheloni ha khosi ya devhula, a vha dzhiela vhukando a vha kunda. 8 U ḓo ya Egipita e na midzimu yavho, zwifanyiso zwavho zwa tsimbi, madzanga avho avhuḓi a siḽiva na a musuku na vhathu vho thubiwaho. Hu ḓo fhela miṅwaha yo vhalaho a sa lwi na khosi ya devhula, 9 ine* ya ḓo ḓa ya lwa na khosi ya muvhuso wa tshipembe, fhedzi i ḓo humela shangoni ḽayo.

10 “Vharwa vhayo vha ḓo ḓilugiselela u lwa, vha kuvhanganya mmbi khulu. Muṅwe wavho u ḓo bvelela a kumba shango sa maḓi mahulu. A humela murahu dzhavheloni ḽawe a tshi khou lwa.

11 “Khosi ya tshipembe i ḓo sinyuwa, ya yo lwa na khosi ya devhula; i ḓo kuvhanganya gogo ḽihulu, fhedzi ḽeneḽo gogo ḽi ḓo kumedzelwa tshanḓani tshayo.* 12 Gogo ḽi ḓo thubiwa. Ya ḓihudza mbiluni yayo, ya ita uri vha zwigidi na zwigidi vha we; fhedzi i nga si shumise maanḓa ayo nga hu bvelelaho.

13 “Khosi ya devhula i ḓo huma ya kuvhanganya gogo ḽihulu ḽine ḽa fhira ḽa u thoma; musi ho no fhela tshifhinga, nga murahu ha miṅwaha yo vhalaho, i ḓo ḓa na mmbi khulu yo ḓiṱamaho. 14 Nga tshenetsho tshifhinga, vhathu vhanzhi vha ḓo lwa na khosi ya tshipembe.

“Vhathu vha khakhathi* vha re vhukati ha vhathu vhau vha ḓo thubiwa vha tshi lingedza u ita uri hu itee zwe zwa vhonwa kha bono; fhedzi vha ḓo kundelwa.

15 “Khosi ya devhula i ḓo ḓa ya fhaṱa mutsheṱo wa u tanga na u thuba muḓi wo tsireledzwaho nga mbondo. Mmbi ya tshipembe i ḓo kundwa na vhanna ye ya vha nanga; a vha nga vhi na maanḓa a u lwa. 16 Ane a ḓa u lwa na khosi ya tshipembe u ḓo ita zwine a funa, a hu na ane a ḓo mu thivhela. U ḓo ima shangoni ḽa Lunako,+ e na maanḓa a u fhelisa. 17 U ḓo ḓa o ḓiimisela na muvhuso wawe woṱhe, a tendelana na yeneyo khosi; a dzhia vhukando. U ḓo tendelwa u fhelisa ṅwananyana. Onoyo ṅwananyana ha nga koni u zwi konḓelela, ha tsha ḓo vha wawe. 18 U ḓo lavhelesa murahu kha mashango a re tsini na lwanzhe, a thuba manzhi. Fhedzi mulangammbi u ḓo fhelisa u nyadziwa he ha itwa ngae. Honoho u nyadziwa hu ḓo fhela, ngauri hu ḓo nyadziwa we a nyadza. 19 A kona u lavhelesa murahu dzhavheloni ḽawe ngei shangoni ḽawe, a khukhulwa a wa, a si tsha wanala.

20 “Vhudzuloni hawe hu ḓo ima ane a ḓo ita uri muthelisi* a pfukekanye muvhusoni woṱhe wa vhugala, fhedzi u ḓo vunḓekanywa nga murahu ha maḓuvha a si gathi, hu si nga mbiti kana nndwa.

21 “U ḓo dzhielwa vhudzulo nga ane a vhengiwa,* vha nga si mu ṋee vhugala ha muvhuso; u ḓo ḓa tshifhingani tsha musi ho tsireledzea,* a dzhia muvhuso nga vhufhura. 22 U ḓo kunda na u fhelisa mmbi dzi ngaho maḓi mahulu, u katela na Murangaphanḓa+ wa mulanga.+ 23 Nga nṱhani ha uri vho tendelana nae, u ḓo bvela phanḓa na vhufhura hawe a vha na maanḓa naho e na lushaka luṱuku. 24 Nga tshifhinga tsha musi ho tsireledzea,* u ḓo ḓa zwipiḓani zwo pfumesaho zwa vundu* a ita zwe vhokhotsi awe na vhokhotsi avho vha si zwi ite. A vha thuba na u vha dzhiela thundu na u vha kovhela dzone; a shumisa vhukwila hawe u itela u lwa na fhethu ho tsireledzwaho nga mbondo, fhedzi u ḓo zwi ita lwa tshifhinganyana.

25 “U ḓo ḓikhwaṱhisa, a vha na tshivhindi tsha u lwa na khosi ya tshipembe e na mmbi khulu, na khosi ya tshipembe i ḓo ḓilugiselela u lwa i na mmbi yayo khulu-khulu i re na maanḓa. U ḓo kundwa ngauri vha ḓo mu itela vhukwila. 26 U ḓo wiswa nga vhane vha ḽa zwiḽiwa zwawe zwavhuḓi.

“Mmbi yawe i ḓo kumbiwa, vhanzhi vha vhulawa.

27 “Dzenedzi khosi mbili dzi ḓo vha dzo ḓiimisela mbiluni dzadzo u ita zwo vhifhaho, dzi ḓo dzula ṱafulani dza zwifhelana. Fhedzi zwithu a zwi nga tshimbili nga nḓila ye dza vha dzo lavhelela, ngauri vhufhelo vhu ḓo swika nga tshifhinga tsho vhewaho.+

28 “Khosi ya devhula i ḓo vhuyelela shangoni ḽayo i na thundu nnzhi, i ḓo humbula u lwa na mulanga mukhethwa. Ya dzhia vhukando, ya vhuyelela shangoni ḽayo.

29 “Nga tshifhinga tsho vhewaho i ḓo vhuyelela u lwa na khosi ya tshipembe. Fhedzi a zwi nga fani na tshifhingani tsho fhiraho, 30 ngauri zwikepe zwa Khithimi+ zwi ḓo ḓa zwa lwa nayo, ya ṱukufhadzwa.

“I ḓo humela murahu ya sinyutshela mulanga mukhethwa+ ya dzhia vhukando; ya livhisa ṱhogomelo kha vhane vha khou ṱutshela mulanga mukhethwa. 31 Mmbi dzi ḓo ḓa dzi tshi bva khae, dza tshikafhadza nnḓu khethwa,+ dzhavhelo na u bvisa tshiṱhavhelo tsha ḓuvha ḽiṅwe na ḽiṅwe.+

“Dza vhea tshithu tshi nengisaho tshine tsha tshinyadza.+

32 “U ḓo fhura vhane vha vunḓa mulanga, a ita uri vha vhe vhagunei. Fhedzi vhane vha ḓivha Mudzimu wavho, vha ḓo ima vho khwaṱha vha bvelela. 33 Vha re na ṱhalukanyo+ vha ḓo thusa vhanzhi uri vha pfesese. Vha ḓo wiswa nga banga na mulilo, nga u thubiwa na u dzhielwa thundu, lwa maḓuvha o vhalaho. 34 Vha ḓo wananyana thuso musi vha tshi wiswa; vhanzhi vha ḓo vha vhathihi navho nga vhufhura. 35 Vhaṅwe vha vhane vha vha na ṱhalukanyo vha ḓo itwa uri vha khukhulwe, u itela u ita mushumo wa u kunakisa na u ṱanzwa na u tshenisa+ u swikela tshifhingani tsha vhufhelo; ngauri ndi zwa tshifhinga tsho vhewaho.

36 “Khosi i ḓo ita zwine ya funa, i ḓo ḓikukumusa na u ḓihudza kha midzimu yoṱhe; i ḓo amba zwithu zwi ofhisaho nga ha Mudzimu wa midzimu.+ I ḓo bvelela kha zwenezwo u swikela honoho u goḓa hu tshi fhela; ngauri zwo dzudzanywaho uri zwi itee zwi ḓo itea. 37 A i nga ṱhonifhi Mudzimu wa vhokhotsi ayo; kana u ṱhonifha zwine vhafumakadzi vha ṱoḓa kana miṅwe midzimu, fhedzi i ḓo ḓihudza kha vhoṱhe. 38 Nṱhani hazwo i ḓo hulisa mudzimu wa dzhavhelo; mudzimu we vhokhotsi ayo vha vha vha sa mu ḓivhi, i ḓo mu hulisa nga musuku na siḽiva na matombo a mutengo muhulu na nga zwithu zwi tamisaho.* 39 I ḓo dzhiela vhukando fhethu ha vhushavhelo ho tsireledzeaho i na* mudzimu wa mazwifhi. Vhane vha i ṱhonifha* i ḓo vha ṋea vhugala vhuhulu, ya ita uri vha vhuse vhukati ha vhanzhi; i ḓo kovha shango nga u ḽi rengisa.

40 “Tshifhingani tsha vhufhelo, khosi ya tshipembe i ḓo lwa nayo, na khosi ya devhula ya ḓa ya lwa nayo i na gariki na vhaṋameli vha bere na zwikepe zwinzhi; i* ḓo dzhena kha mashango sa maḓi mahulu ya kumba. 41 I ḓo dzhena na shangoni ḽa Lunako,+ na mashango manzhi a ḓo kundwa. Fhedzi mashango ane a ḓo ponyoka ndi haya: Edomo, Moaba na tshipiḓa tshihulwane tsha Vhaamoni. 42 I ḓo bvela phanḓa i tshi lwa na mashango; na shango ḽa Egipita a ḽi nga ponyoki. 43 I ḓo langa lupfumo lwo dzumbiwaho lwa musuku na siḽiva na zwithu zwoṱhe zwi tamisaho* zwa Egipita. Vhalibia na Vhaetopia vha ḓo ita zwine ya amba.*

44 “Fhedzi muvhigo u bvaho vhubvaḓuvha na u bvaho devhula u ḓo i tshuwisa, ya ṱuwa yo halifha zwihulu i tshi ya u fhelisa na u tshinyadza vhanzhi. 45 I ḓo atha madennde ayo a vhuhosi vhukati ha lwanzhe luhulu na thavha khethwa ya Lunako;+ ya kona u fheliswa, a hu nga ḓo vha na ane a ḓo i thusa.