Evangeli Ya Yohane
5 Nga murahu ha zwenezwo, ha vha na vhuṱambo+ ha Vhayuda, Yesu a gonya Yerusalema. 2 Ho vha hu na isha* ḽine nga Tshihevheru ḽa pfi Bethesda, ḽe ḽa vha ḽi na phasedzhi yo tangiwaho nga phuphu Khoroni ya Nngu+ ngei Yerusalema. 3 Henefho ho vha ho eḓela vhathu vhanzhi vha lwalaho, vha sa vhoni, vho holefhalaho na vho omaho miraḓo. 4* —— 5 Ho vha hu na muṅwe munna we a fhedza miṅwaha ya 38 a tshi khou lwala. 6 Musi Yesu a tshi vhona onoyo munna o eḓela, a tshi ḓivha uri ho vha hu kale a tshi khou lwala, a ri: “Naa u a ṱoḓa u fhola?”+ 7 Onoyo munna a ri: “Muṋe wanga, a hu na ane a nga ndzhenisa ishani* musi maḓi a tshi seluwa; fhedzi musi ndi tshi ri ndi a dzhena, muṅwe u a dzhena phanḓa hanga.” 8 Yesu a ri: “Takuwa, u hwale vhulalo hau u tshimbile.”+ 9 Onoyo munna a fhola nga u ṱavhanya, a hwala vhulalo hawe a tshimbila.
Ho vha hu ḓuvha ḽa Savhatha. 10 Vhayuda vha amba na onoyo munna vha ri: “Ndi Savhatha, a zwo ngo tendelwa uri u hwale vhulalo hau.”+ 11 Ene a ri: “We a mphodza o ri, ‘Hwala vhulalo hau u tshimbile.’” 12 Vhone vha ri: “Ndi nnyi onoyo we a ri, ‘Hwala vhulalo hau u tshimbile’?” 13 Fhedzi onoyo munna o vha a sa ḓivhi we a mu fhodza, ngauri Yesu o vha o dzhena vhukati ha gogo.
14 Nga murahu ha zwenezwo, Yesu a mu wana thembeleni a amba nae a ri: “Vhona zwino wo fhola. U songo tsha ita tshivhi, uri hu sa itee zwi fhiraho zwiḽa.” 15 Onoyo munna a ya a vhudza Vhayuda uri o fhodzwa nga Yesu. 16 Zwenezwo zwa ita uri Vhayuda vha tovhole Yesu, ngauri o vha a tshi khou ita zwenezwi zwithu zwoṱhe nga Savhatha. 17 Yesu a vha fhindula a ri: “Khotsi anga u kha ḓi shuma na zwino, na nṋe ndi kha ḓi shuma.”+ 18 Ndi ngazwo Vhayuda vho tou ṋaṋa u ṱoḓa u mu vhulaya, ngauri o vha a tshi khou pfuka mulayo wa Savhatha, a tshi khou amba uri Mudzimu ndi Khotsi awe,+ a tshi ḓiita u nga u lingana na Mudzimu.+
19 Yesu a ri: “Ngoho ndi a ni vhudza ndi ri, Murwa ha koni u ita tshithu na tshithihi nga eṱhe, fhedzi u ita zwine a vhona Khotsi a tshi zwi ita.+ Ngauri zwoṱhe zwine Khotsi a zwi ita, na Murwa u ita zwenezwo. 20 Ngauri Khotsi u funa Murwa,+ u a mu sumbedza zwithu zwoṱhe zwine a zwi ita, u ḓo mu sumbedza mishumo mihulwane u fhira yeneyi, uri ni mangale.+ 21 Samusi Khotsi a tshi vusa vhafu,+ na Murwa u vusa ane a funa.+ 22 Ngauri Khotsi ha haṱuli muthu, fhedzi o kumedzela u haṱula hoṱhe kha Murwa,+ 23 uri vhoṱhe vha hulise Murwa samusi vha tshi hulisa Khotsi. Ane a si hulise Murwa u nyadza Khotsi we a mu ruma.+ 24 Ngoho ndi a ni vhudza ndi ri, ane a pfa zwine nda zwi amba, a tenda uri ndo rumiwa nga Khotsi, u ḓo wana vhutshilo vhu sa fheli,+ ha nga haṱulwi, fhedzi u ḓo nga muthu we a vha o fa ane zwino a vho tshila.+
25 “Ngoho ndi a ni vhudza ndi ri, hu khou ḓa tshifhinga, na zwino tsho no ḓi swika, tshine ngatsho vhafu vha ḓo pfa ipfi ḽa Murwa wa Mudzimu, vhoṱhe vhe vha thetshelesa vha ḓo tshila. 26 Samusi Khotsi e na maanḓa a u ṋea vhutshilo,+ o ṋea na Murwa maanḓa a u ṋea vhutshilo.+ 27 O mu ṋea maanḓa a u haṱula,+ ngauri ndi Murwa muthu.+ 28 Ni songo mangadzwa nga zwenezwi, ngauri hu ḓa tshifhinga tshine vhoṱhe vha re mavhiḓani vha ḓo pfa ipfi ḽawe+ 29 vha bva, vhe vha ita zwivhuya vha ḓo vuswa uri vha tshile, vhe vha ita zwivhi vha ḓo vuswa uri vha haṱulwe.+ 30 A thi koni u ita tshithu na tshithihi nga nṋe muṋe. Ndi haṱula u ya nga zwine nda zwi pfa; ndi haṱula nga nḓila yo lugaho,+ ngauri a thi ṱoḓi u ita zwine nda funa, fhedzi ndi ita zwi funwaho nga o nthumaho.+
31 “Arali ndi tshi tou ḓiambela kha vhathu, vha nga si tende zwine nda zwi amba.+ 32 Hu na muṅwe ane a vhudza vhathu nga ha nṋe. Ndi a zwi ḓivha uri zwine a zwi amba nga ha nṋe ndi ngoho.+ 33 No rumela vhanna uri vha ye kha Yohane, o amba ngoho nga ha nṋe.+ 34 A si uri ndi ṱoḓa muthu a tshi nnyambela, fhedzi ndi amba zwenezwi zwithu uri ni tshidzwe. 35 Onoyo munna o vha a tshi nga luvhone lu dugaho lu vhonetshelaho, no takalela tshedza tshawe lwa tshifhinganyana.+ 36 Yohane o vhudza vhathu uri ndi bva kha Khotsi. Fhedzi ndi na vhuṱanzi vhunzhi vhune ha sumbedza uri ndo rumiwa nga Khotsi. Ngauri ndi ita mishumo ye a nṋea uri ndi i ite.+ 37 Zwiṅwe hafhu, Khotsi we a nthuma o amba uri ndi Murwa wawe.+ A ni athu u vhuya na mu pfa a tshi amba kana u vhona tshifhaṱuwo tshawe,+ 38 na ipfi ḽawe a ni ḽi vhulungi mbiluni dzaṋu, ngauri a ni tendi we a mu ruma.
39 “Ni khou vhala Maṅwalo,+ ngauri ni humbula uri ni ḓo wana vhutshilo vhu sa fheli ngao; fhedzi ndi one* ane a amba nga ha nṋe.+ 40 Naho zwo ralo, a ni ṱoḓi u ḓa kha nṋe+ uri ni wane vhutshilo. 41 A thi ṱoḓi u khoḓwa nga vhathu, 42 fhedzi ndi a zwi ḓivha uri a ni funi Mudzimu. 43 Ndo ḓa dzinani ḽa Khotsi anga, fhedzi a ni ntendi; arali muṅwe muthu a vhe o ḓa nga dzina ḽawe, no vha ni tshi ḓo vha no mu tenda. 44 Ni nga si ntende ngauri ni funa u khoḓwa nga vhathu, nṱhani ha u takadza Mudzimu uri a ni khoḓe.+ 45 Ni songo humbula uri ndi ḓo ita uri ni vhonwe mulandu nga Khotsi; u hone ane a ḓo ita uri ni vhonwe mulandu, ndi Mushe+ we na mu fhulufhela. 46 Arali ni vhe no tenda Mushe, no vha ni tshi ḓo ntenda, ngauri onoyo o ṅwala nga ha nṋe.+ 47 Arali ni sa tendi zwe a zwi ṅwala, ni ḓo tenda hani zwine nda zwi amba?”