Evangeli Ya Mateo

25 “Muvhuso wa ṱaḓulu u nga fanyiswa na vhasidzana vha fumi vhe vha bva na mbone dzavho+ vha ya u ṱanganedza mukwasha.+ 2 Vhaṱanu vho vha vhe matsilu, vhaṱanu vho ṱalifha.+ 3 Musi vha matsilu vha tshi dzhia mbone dzavho, a vho ngo dzhia na midzio ya mapfura, 4 ngeno vho ṱalifhaho vho dzhia mbone dzavho na midzio ya mapfura. 5 Vhoṱhe vha kumedza vha eḓela ngauri mukwasha o vha a tshi khou lenga u swika. 6 Vhukati ha vhusiku, ha ṱavhiwa mukosi ha pfi: ‘Mukwasha o swika! Ibvani ni mu ṱanganedze.’ 7 Vhenevho vhasidzana vha fumi vha vuwa vha funga mbone dzavho.+ 8 Vha matsilu vha amba na vho ṱalifhaho vha ri, ‘Ri khou humbela u shelelwa mapfura ngauri mbone dzashu dzi tsini na u dzima.’ 9 Vho ṱalifhaho vha fhindula vha ri: ‘A nga si ri eḓane roṱhe. Ndi khwine ni tshi ya na renga aṋu kha vharengisi.’ 10 Musi vha tshee vho ya u renga, mukwasha a swika, vhasidzana vho ḓilugisaho vha dzhena nae munyanyani wa mbingano,+ vothi ḽa valiwa. 11 Nga murahu ha zwenezwo, vhasidzana vha matsilu vha vhuya vha ri, ‘Mukwasha, mukwasha, ri vulele!’+ 12 A vha fhindula a ri, ‘Ngoho ndi a ni vhudza, a thi ni ḓivhi.’

13 “Ngauralo, dzulani no fhaṱuwa+ ngauri a ni ḓivhi ḓuvha na tshifhinga.+

14 “Zwi fana na muthu a tshi ṱoḓa u fara lwendo lwa u ya shangoni ḽa kule, a vhidza vhalanda vhawe a vha ṋea thundu yawe uri vha i ṱhogomele.+ 15 A ṋea muṅwe talente* ṱhanu, muṅwe mbili, muṅwe nthihi, vhoṱhe a vha ṋea zwi tshi ya nga vhukoni havho, a ya shangoni ḽa kule. 16 Nga u ṱavhanya we a ṋewa talente ṱhanu a ya a bindulisa dziṅwe ṱhanu. 17 Na uḽa we a ṋewa talente mbili a bindulisa dziṅwe mbili. 18 Fhedzi mulanda we a ṋewa talente nthihi, a ya a i bwela fhasi, a dzumba iḽa tshelede* ya muṋe wawe.

19 “Musi ho no fhela tshifhinga tshilapfu, muṋe wa vhenevho vhalanda a vhuya uri a dzudzanye navho mafhungo a tshelede.+ 20 We a ṋewa talente ṱhanu a ḓisa na dziṅwe talente ṱhanu, a ri, ‘Muṋe wanga, wo nṋea talente ṱhanu; ndo bindulisa dziṅwe ṱhanu.’+ 21 Muṋe wawe a amba nae a ri: ‘Wo shuma, mulanda wavhuḓi a fhulufhedzeaho! Wo fhulufhedzea kha zwiṱuku. Ndi ḓo ita uri u ṱhogomele zwinzhi.+ Iḓa u takale na nṋe.’+ 22 Ha ḓa we a ṋewa talente mbili a ri, ‘Muṋe wanga, wo nṋea talente mbili, ndo bindulisa dziṅwe mbili.’+ 23 Muṋe wawe a amba nae a ri: ‘Wo shuma, mulanda wavhuḓi a fhulufhedzeaho! Wo fhulufhedzea kha zwiṱuku. Ndi ḓo ita uri u ṱhogomele zwinzhi. Iḓa u takale na nṋe.’

24 “Mafheleloni ha ḓa mulanda we a vha o ṋewa talente nthihi, a ri: ‘Muṋe wanga, ndo vha ndi tshi zwi ḓivha uri u munna wa tshiṱuhu, ane a kaṋa zwe a si zwale na u kuvhanganya zwe a si fhefhere.+ 25 Ndi ngazwo ndo ofha nda bwela talente yau mavuni. Talente yau kheyi, dzhia zwi re zwau.’ 26 Muṋe wawe a mu fhindula a ri: ‘U mulanda muvhi wa mubva, samusi wo vha u tshi zwi ḓivha uri ndi kaṋa zwe ndi si zwale na u kuvhanganya zwe ndi si fhefhere, 27 ndi ngani u songo vhea tshelede* yanga banngani? Ndo vha ndi tshi ḓo wana tshelede yanga i na nzwalelo musi ndi tshi vhuya.

28 “‘Mu dzhieleni talente yawe ni i ṋee a re na talente dza fumi.+ 29 Ngauri ane a vha nazwo, u ḓo ṋewa zwiṅwe uri a vhe na zwinzhi. A si na u ḓo dzhielwa na zwiṱuku-ṱuku zwine a vha nazwo.+ 30 Onoyo mulanda a si na mushumo ni mu posele nnḓa swiswini. Henefho ndi hune a ḓo lila na u shenganya maṋo.’

31 “Musi Murwa muthu+ a tshi ḓa e kha vhugala hawe e na vharuṅwa vhoṱhe,+ ndi hone a tshi ḓo dzula kha khuluṋoni yawe ya vhugala. 32 Tshaka dzoṱhe dzi ḓo kuvhanganywa phanḓa hawe, a khethekanya vhathu sa mulisa a tshi khethekanya nngu na mbudzi. 33 Nngu+ u ḓo dzi vhea thungo ya tsha u ḽa, mbudzi a dzi vhea thungo ya tsha monde.+

34 “Ndi hone Khosi i tshi ḓo amba na vha re thungo ya tsha u ḽa ya ri: ‘Iḓani inwi no fhaṱutshedzwaho nga Khotsi anga, iḽani ifa ḽa Muvhuso we na lugiselelwa u bva tshee shango ḽa sikwa. 35 Ngauri ndo farwa nga nḓala na nṋea zwiḽiwa; ndo farwa nga ḓora na nṋea maḓi. Ndo vha ndi mutsinda na nṱanganedza;+ 36 ndo vha ndi si na zwiambaro* na nnyambadza.+ Ndo lwala na nṱhogomela. Ndo vha ndi dzhele na ḓa na nṱolela.’+ 37 Vho lugaho vha ḓo ri: ‘Murena, ro u vhona lini u na nḓala ra u ṋea zwiḽiwa kana u na ḓora ra u ṋea maḓi?+ 38 Ro u vhona lini u mutsinda ra u ṱanganedza kana u si na zwiambaro ra u ambadza? 39 Ro u vhona lini u tshi khou lwala kana u dzhele ra ḓa ra u ṱolela?’ 40 Khosi i ḓo vha fhindula ya ri, ‘Ngoho ndi a ni vhudza uri, zwe na itela muṅwe wa vhenevha vharathu vhanga vha vhuimo ha fhasi, no zwi itela nṋe.’+

41 “A kona u amba na vha re thungo ya tsha monde a ri: ‘Nṱutsheleni+ inwi no semiwaho, ni ye muliloni u sa dzimiho+ wo lugiselelwaho Diabolo na vharuṅwa vhawe.+ 42 Ngauri ndo farwa nga nḓala, ni si nṋee zwiḽiwa; nda farwa nga ḓora, ni si nṋee maḓi. 43 Ndo vha ndi mutsinda, ni si nṱanganedze; ndi si na zwiambaro, ni si nnyambadze; ni si nṱhogomele musi ndi tshi lwala na musi ndi dzhele.’ 44 Vhone vha ḓo ri: ‘Murena, ro u vhona lini u na nḓala, u na ḓora, u mutsinda, u si na zwiambaro, u tshi khou lwala kana u dzhele ri si u itele tshithu?’ 45 Ene u ḓo vha fhindula a ri: ‘Ngoho ndi a ni vhudza uri, zwe na si itele muṅwe wa vhenevha vha vhuimo ha fhasi, na nṋe a no ngo nnyitela.’+ 46 Vhenevho vha ḓo fheliswa tshoṱhe,+ fhedzi vho lugaho vha ḓo wana vhutshilo vhu sa fheli.”+