Hesekiele

33 Yehova a amba na nṋe a ri: 2 “Murwa muthu, amba na vhathu vhahau,+ u ri,

“‘Kha ri ri ndi ḓisa banga shangoni,+ vhathu vha ḽeneḽo shango vha dzhia muthu vha mu ita mulindi wavho, 3 musi onoyo mulindi a tshi vhona banga ḽi tshi khou ḓa shangoni, a lidze luṋanga u itela u tsivhudza vhathu.+ 4 Arali muthu a pfa luṋanga lu tshi lila, fhedzi a si thetshelese tsivhudzo,+ banga ḽa ḓa ḽa mu vhulaya, malofha a ḓo vhilwa kha ṱhoho yawe.+ 5 O pfa luṋanga lu tshi lila, fhedzi a si thetshelese tsivhudzo. Malofha awe a ḓo vhilwa khae. Arali a vhe o thetshelesa tsivhudzo, o vha a tshi ḓo tshila.

6 “‘Fhedzi arali mulindi a vhona banga ḽi tshi khou ḓa, a si lidze luṋanga,+ vhathu vha si tsivhudzwe, banga ḽa ḓa ḽa vhulaya muṅwe wavho, onoyo muthu u ḓo fa nga nṱhani ha vhukhakhi hawe, fhedzi ndi ḓo vhila malofha awe kha mulindi.’*+

7 “Iwe murwa muthu, ndo u vhea uri u vhe mulindi wa vha nnḓu ya Isiraele; musi u tshi pfa zwine nda amba, u vha tsivhudze nga zwe nda u vhudza.+ 8 Musi ndi tshi amba na muvhi nda ri, ‘Iwe muvhi, u ḓo fa!’+ fhedzi iwe wa si ambe nae uri u mu tsivhudze uri a shandule nḓila yawe, onoyo muvhi u ḓo fela vhuvhi hawe nga nṱhani ha vhukhakhi hawe,+ fhedzi ndi ḓo vhila malofha awe kha iwe. 9 Arali wa tsivhudza muvhi uri a litshe nḓila dzawe, a hana u shandula nḓila dzawe, onoyo muvhi u ḓo fa nga nṱhani ha vhukhakhi hawe,+ fhedzi iwe u ḓo tshidza vhutshilo hau.+

10 “Iwe murwa muthu, amba na vha nnḓu ya Isiraele u ri, ‘No ri: “Vhushandukwa hashu na zwivhi zwashu zwi khou ri lemela nga maanḓa, zwi khou ri fhedza;+ ri ḓo bvela hani phanḓa ri tshi khou tshila?”’+ 11 U vha vhudze u ri, ‘“Ndi ana nga vhutshilo hanga,” u ralo Yehova Murena Muvhusahoṱhe, “a thi takaleli lufu lwa muvhi,+ fhedzi ndi takalela uri muvhi a shandule nḓila dzawe,+ a bvele phanḓa a tshi khou tshila.+ Rembuluwani, rembuluwani kha nḓila dzaṋu mmbi,+ inwi vha nnḓu ya Isiraele, ni felani?”’+

12 “Iwe murwa muthu, vhudza vhathu vhahau u ri, ‘Zwivhuya zwa o lugaho zwi nga si mu tshidze musi a tshi shanduka;+ na vhuvhi ha muvhi vhu nga si wise muṋe waho arali o vhu litsha;+ na muvhuya a nga si tshidzwe nga zwivhuya zwawe musi a tshi ita tshivhi.+ 13 Musi ndi tshi vhudza muthu o lugaho nda ri: “U ḓo tshila,” ene a fhulufhela u luga hawe, a ita zwo khakheaho,*+ zwivhuya zwawe a zwi nga humbulwi, fhedzi u ḓo fela vhukhakhi he a vhu ita.+

14 “‘Musi ndi tshi amba na muvhi nda ri: “U ḓo fa,” ene a litsha vhuvhi hawe, a ita zwo lugaho na zwivhuya,+ 15 onoyo muvhi a humisa zwe a vha o fariswa,+ a lifha zwe a dzhia nga vhufhura,+ a tshimbila nga maitele a vhutshilo nga u sa ita zwo khakheaho, u ḓo tshila.+ Ha nga fi. 16 Ha nga ḓo vhonwa mulandu kha zwivhi zwoṱhe zwe a zwi ita.+ Ngauri o ita zwo teaho na zwo lugaho, u ḓo bvela phanḓa a tshi khou tshila.’+

17 “Fhedzi inwi no ri, ‘Nḓila dza Yehova a dzo ngo luga,’ ngeno hu nḓila dzaṋu dzi songo lugaho.

18 “Musi muvhuya a tshi litsha zwivhuya zwawe a ita zwo khakheaho, u ḓo fela zwenezwo zwivhi.+ 19 Musi muvhi a tshi litsha vhuvhi hawe, a ita zwo lugaho na zwivhuya, u ḓo tshila nga u ita zwenezwo zwivhuya.+

20 “Fhedzi no ri, ‘Nḓila dza Yehova a dzo ngo luga.’+ Inwi vha nnḓu ya Isiraele, ndi ḓo haṱula muṅwe na muṅwe u ya nga nḓila dzawe.”

21 Nga murahu ha tshifhinga nga ṅwaha wa vhu 12, nga ṅwedzi wa vhufumi, nga ḓuvha ḽa vhuṱanu ḽa wonoyo ṅwedzi ri vhuthubwani, ho ḓa muṅwe munna we a ponyoka Yerusalema a amba na nṋe+ a ri: “Muḓi wo fheliswa!”+

22 Nga madekwana a musi munna we a ponyoka a sa athu u ḓa, tshanḓa tsha Yehova tsho vha tshi kha nṋe, o vula mulomo wanga musi onoyo munna a sa athu u ḓa nga matsheloni. Mulomo wanga wa vulea, nda thoma u amba.+

23 Yehova a amba na nṋe a ri: 24 “Murwa muthu, vhadzulapo vha enea mashubi+ vha khou amba nga ha shango ḽa Isiraele vha ri, ‘Abrahamu o vha e eṱhe, fhedzi o dzhia shango.+ Fhedzi riṋe ri vhanzhi; ngangoho ḽeneḽi shango ro ḽi ṋewa uri ḽi vhe ḽashu.’

25 “Nga zwenezwo, amba navho u ri, ‘Yehova Murena Muvhusahoṱhe u ri: “Ni khou ḽa ṋama i re na malofha,+ ni lavhelesa midzimu yaṋu ya zwifanyiso i nengisaho,* ni dzula ni tshi shulula malofha.+ Zwino ndi ngani ni tshi fanela u dzula kha ḽeneḽo shango? 26 No ḓitika nga banga ḽaṋu,+ no ita zwithu zwi nengisaho, muṅwe na muṅwe waṋu o tshikafhadza mufumakadzi wa muhura wawe.+ Ndi ngani ni tshi fanela u dzula kha ḽeneḽo shango?”’+

27 “U ambe navho u ri, ‘Zwe Yehova Murena Muvhusahoṱhe a zwi amba ndi hezwi: “Ndi ana nga vhutshilo hanga, vhoṱhe vhane vha dzula mashubini vha ḓo vhulawa nga banga; vha re midavhini ndi ḓo ita uri vha ḽiwe nga zwivhanda; na vha re madzhavheloni na mabakoni vha ḓo fa nga malwadze.+ 28 Ndi ḓo ita uri ḽeneḽo shango ḽi vhe shubi,+ u ḓikukumusa haḽo hu ḓo fheliswa, a hu nga vhi na tshithu thavhani dza Isiraele,+ a hu nga vhi na muthu ane a ḓo fhira nga henefho. 29 Vha ḓo ḓivha uri ndi nṋe Yehova musi ndi tshi ita uri ḽeneḽo shango ḽi vhe shubi+ nga nṱhani ha zwithu zwoṱhe zwi nengisaho zwe vha zwi ita.”’+

30 “Iwe murwa muthu, vhathu vhahau vha khou amba nga ha iwe vhe murahu ha mbondo na miṋangoni ya dzinnḓu.+ Vha khou amba nga tshavho, muṅwe na muṅwe a tshi amba na wahawe a tshi ri, ‘Iḓani ni thetshelese zwine Yehova a zwi amba.’ 31 Vha ḓo kuvhangana vha dzula phanḓa hau sa vhathu vhanga; vha thetshelesa zwine wa amba, fhedzi vha nga si zwi tevhedze.+ Vha u takadza nga zwine vha amba, fhedzi mbiluni dzavho vha ḓivhuyedza nga vhufhura. 32 Khavho u nga muthu a re na ipfi ḽavhuḓi, ane a lidza zwavhuḓi zwilidzo zwi re na ṱhale, ane a khou imba nga ha lufuno. Vha ḓo pfa zwine wa amba, fhedzi a hu na ane a ḓo zwi ita. 33 Musi zwi tshi itea, ngauri zwi ḓo itea, vha ḓo zwi ḓivha uri muporofita o vha e vhukati havho.”+