Vhurifhi Ha Vhuvhili Vhu Yaho Kha Timotheo

1 Nṋe Paulo, ane nga u funa ha Mudzimu nda vha muapostola wa Kristo Yesu uri ndi ḓivhadze nga ha vhutshilo he ha fhulufhedziswa vha re na vhuthihi na Kristo Yesu,+ 2 ndi ṅwalela Timotheo, ṅwananga ane nda mu funa,+ ndi ri:

Ngavhe Mudzimu Khotsi ashu na Kristo Yesu Murena washu vha tshi u sumbedza vhuthu vhuhulu, vha u khathutshela na u ita uri u vhe na mulalo.

3 Ndi livhuwa Mudzimu, ane nda mu itela mushumo mukhethwa u fana na zwe zwa itwa nga vhomakhulukuku wanga, ndi na luvalo lwo kunaho. Ndi dzula ndi tshi u humbula kha zwine nda zwi humbela vhusiku na masiari. 4 Musi ndi tshi humbula miṱodzi yau, zwi ita uri ndi tame u u vhona uri ndi takale. 5 Ngauri ndi humbula lutendo lwau lu si na muhoyo,+ lwe lwa thoma u vha na Loisa makhulu wau na Yunisi mme au, fhedzi ndi na fhulufhelo ḽa uri na kha iwe zwo tou ralo.

6 Ndi ngazwo ndi tshi khou u humbudza uri tshifhiwa tshiḽa tshe Mudzimu a u ṋea tshone musi ndi tshi u vhea zwanḓa, u tshi khuṱhedze uri tshi dzule tshi tshi duga.+ 7 Ngauri muya une Mudzimu a ri ṋea wone a u iti uri ri vhe magoswi,+ fhedzi u ita uri ri vhe na maanḓa,+ lufuno na u tsha muhumbuloni. 8 Ngauralo, u songo shona u huwelela nga ha Murena washu+ kana nga ha nṋe ndi re dzhele nga nṱhani hawe, fhedzi u ḓiimisele u tambudzelwa+ mafhungo maḓifha nga u ḓitika nga maanḓa a Mudzimu.+ 9 O ri tshidza na u ri vhidza uri ri vhe vhakhethwa,+ hu si nga mishumo yashu, fhedzi ngauri o vha a tshi zwi funa, a tshi ṱoḓa u ri sumbedza vhuthu vhuhulu+ nga Kristo Yesu u bva kale, 10 honoho vhuthu vhuhulu ho vhonala musi hu tshi dzumbululwa Kristo Yesu, Mutshidzi washu,+ we a fhelisa lufu+ na u ri dzumbululela+ nga mafhungo maḓifha+ nḓila ine ra nga wana ngayo vhutshilo na muvhili u sa sini.+ 11 Ndo nangiwa uri ndi vhe muapostola, ndi huwelele na u funza eneo mafhungo maḓifha.+

12 Ndi ngazwo ndi tshi khou tambudzelwa wonoyu mushumo,+ fhedzi a thi shoni.+ Ngauri ndi a ḓivha We nda mu tenda, ndi fhulufhela uri u a kona u tsireledza zwoṱhe zwe nda mu ṋea u swika nga ḽeneḽo ḓuvha.+ 13 Dzula wo farelela pfunzo ya ngoho*+ ye wa i pfa kha nṋe, u tshi sumbedza lutendo na lufuno zwine wa vha nazwo nga nṱhani ha u vha na vhuthihi na Kristo Yesu. 14 Tsireledza zwenezwo zwithu zwa ndeme zwe wa ṋewa zwone nga muya mukhethwa une ra vha nawo.+

15 U a zwi ḓivha uri vhathu vhoṱhe vha vunduni ḽa Asia+ vho ntshandukela, vhaṅwe vhavho ndi Figelo na Herimogene. 16 Ngavhe Murena a tshi khathutshela muṱa wa Onesiforo,+ ngauri o vha a tshi nkhwaṱhisa tshifhinga tshoṱhe, ho ngo shona naho ndo vhofhiwa nga ngeḓane. 17 Nṱhani hazwo, musi e Roma, o nṱoḓa hoṱhe u swika a tshi nngwana. 18 Ngavhe Murena a tshi ita uri a khathutshelwe nga Yehova* nga ḽeneḽo ḓuvha. Iwe u a ḓivha zwavhuḓi na mishumo yoṱhe ye a i ita ngei Efesa.