Genesi

39 Yosefa o vha o iswa Egipita,+ Potifara muḓinḓa wa Farao,+ muhulwane wa vhalindi wa Muegipita, a mu renga kha Vhaishimaele+ vhe vha mu isa henengei. 2 Fhedzi Yehova o vha e na Yosefa.+ Nga zwenezwo, a vha a bvelelaho, a ṋewa vhuḓifhinduleli nḓuni ya muṋe wawe wa Muegipita. 3 Muṋe wawe a zwi vhona uri Yehova o vha e nae na uri Yehova o vha a tshi khou ita uri a bvelele kha zwithu zwoṱhe.

4 Yosefa a ḓi dzula a tshi takalelwa nga muṋe wawe, a vha muḓinḓa wa muṋe wawe. A mu vhea uri a vhe na vhuḓifhinduleli nḓuni yawe, a ita uri a lange zwoṱhe zwe zwa vha zwi zwawe. 5 U bva nga tshifhinga tshe Yosefa a vhewa uri a lange nnḓu ya muṋe wawe na u vha na vhuḓifhinduleli kha zwoṱhe zwe zwa vha zwi zwa muṋe wawe, Yehova a dzula a tshi fhaṱutshedza nnḓu ya onoyo Muegipita nga nṱhani ha Yosefa, Yehova a fhaṱutshedza zwoṱhe zwe a vha e nazwo nḓuni na masimuni.+ 6 Mafheleloni a kumedzela Yosefa zwithu zwawe zwoṱhe uri a zwi ṱhogomele, a si vhilaele nga tshithu nga nnḓa ha zwiḽiwa zwe a vha a tshi zwi ḽa. Yosefa o vha o vhumbea, o naka.

7 Nga murahu ha zwenezwo, mufumakadzi wa muṋe wawe a thoma u emula Yosefa, a ri: “Lala na nṋe.” 8 Fhedzi o vha a tshi hana, a tshi amba na mufumakadzi wa muṋe wawe a tshi ri: “Muṋe wanga ha vhilaeli nga tshithu tshine nda tshi ita fhano nḓuni, zwoṱhe zwine a vha nazwo o nṋea zwone uri ndi zwi ṱhogomele. 9 A hu na ane a vha na vhuimo vhuhulwane u mphira fhano nḓuni, ho ngo nthivhela u fara naho tshi tshini nga nnḓa ha iwe, ngauri u mufumakadzi wawe. Zwino ndi nga ita hani vhuvhi vhungafha nda tshinya phanḓa ha Mudzimu?”+

10 Misi yoṱhe o vha a tshi amba na Yosefa, fhedzi ho ngo vhuya a tenda u lala nae kana u dzula nae. 11 Fhedzi ḽiṅwe ḓuvha musi a tshi ya nḓuni u shuma mishumo yawe, a wana vhashumi vha nḓuni vhe siho henefho nḓuni. 12 Nga zwenezwo, a mu fara nga tshi⁠ambaro tshawe a ri: “Lala na nṋe!” Fhedzi Yosefa a shavha a sia onoyo mufumakadzi o fara tshiambaro tshawe a bvela nnḓa. 13 Musi a tshi tou vhona uri Yosefa o shavhela nnḓa, a sala o fara tshi⁠ambaro tshawe, 14 a thoma u vhidzelela vhanna vhane vha shuma nḓuni yawe, a amba navho a ri: “Vhonani! O ri ḓisela hoyu munna wa Muhevheru uri a ri seise nga vhathu. O vha a tshi khou ṱoḓa u lala na nṋe, fhedzi nṋe nda ṱavha mukosi. 15 A tshi tou pfa ndi tshi ṱavha mukosi ndi tshi vhidzelela, a bva a shavha a sia tshi⁠ambaro tshawe tsini na nṋe.” 16 Nga murahu ha zwenezwo, a vhea tshi⁠ambaro tsha Yosefa tsini nae u swika muṋe wawe a tshi vhuya nḓuni yawe.

17 A mu vhudza eneo mafhungo a ri: “Uḽa mushumeli wa Muhevheru we wa ri ḓisela ene u khou ṱoḓa u ntseisa nga vhathu. 18 Ndo ri ndi tshi tou ṱavha mukosi ndi tshi vhidzelela, a bva a shavha a sia tshiambaro tshawe tsini na nṋe.” 19 Musi a tshi tou pfa zwe mufumakadzi wawe a mu vhudza zwone, a tshi ri: “Hezwi ndi zwe mushumeli wau a nnyita zwone,” muṋe wawe a sinyuwa zwihulu. 20 Muṋe wa Yosefa a mu dzhia a mu isa dzhele, fhethu hune khosi ya valela hone vhafariwa, a dzula henefho dzhele.+

21 Fhedzi Yehova a bvela phanḓa a tshi vha na Yosefa na u dzula a tshi mu sumbedza lufuno lu sa shanduki, a ita uri muḓinḓa muhulwane wa dzhele+ a mu takalele. 22 Muḓinḓa muhulwane wa dzhele a kumedzela Yosefa vhafariwa vhoṱhe vha re dzhele uri a vha lange, Yosefa o vha a tshi vha vhudza zwine vha fanela u zwi ita.+ 23 Muḓinḓa wa dzhele o vha a si tsha ṱhogomela zwine zwa ṱhogomelwa ngae, ngauri Yehova o vha e na Yosefa. Yehova a ita uri zwoṱhe zwine a zwi ita zwi bvelele.+