Bugu Ya Vhuvhili Ya Koronika

16 Nga ṅwaha wa vhu 36 wa vhuhosi ha Asa, Khosi Baasha+ wa Isiraele a ḓa a lwa na Yuda, a fhaṱa* Rama+ uri a thivhele vhathu uri vha si dzhene kana u bva shangoni ḽa Khosi Asa wa Yuda.+ 2 Asa a dzhia siḽiva na musuku mbulungeloni dza nḓuni ya Yehova+ na nḓuni* ya khosi, a zwi rumela kha Khosi Benihadada wa Siria+ a dzulaho Damaseko, a ri: 3 “Hu na thendelano* vhukati hanga na iwe na vhukati ha khotsi anga na khotsi au. Ndi khou u rumela siḽiva na musuku. Iḓa u fhelise thendelano* ye wa i ita na Khosi Baasha wa Isiraele uri a nnditshe.”

4 Benihadada a thetshelesa Khosi Asa, a ruma vhalangammbi vhawe uri vha ye vha lwe na miḓi ya Isiraele, vha kunda muḓi wa Iyoni,+ Dani,+ Abele-mayimi, fhethu hoṱhe ha u vhulungela zwithu miḓini ya Nafutali.+ 5 Musi Baasha a tshi zwi pfa, a ṱavhanya a litsha u fhaṱa Rama, a ṱutshela mushumo wawe. 6 Khosi Asa a ṱuwa na Vhayuda vhoṱhe, vha hwala matombo na matanda a ngei Rama+ zwe Baasha a vha a tshi khou fhaṱa ngazwo,+ a fhaṱa* ngazwo Geba+ na Mitsipa.+

7 Nga tshenetsho tshifhinga Henani+ muvhoni a ya ha Asa khosi ya Yuda a amba nae a ri: “Ngauri wo fhulufhela khosi ya Siria, u si fhulufhele Yehova Mudzimu wau, mmbi ya khosi ya Siria yo ponyoka zwanḓani zwau.+ 8 Naa Vhaetopia na Vhalibia vho vha vhe si mmbi khulu i re na gariki nnzhi na vhaṋameli vha bere? Fhedzi ngauri wo fhulufhela Yehova, o vha kumedzela zwanḓani zwau.+ 9 Ngauri maṱo a Yehova o lavhelesa hoṱhe-hoṱhe ḽifhasini+ ḽoṱhe uri a sumbedze nungo dzawe* a tshi itela vhe mbilu dzavho dza ḓikumedzela tshoṱhe khae.+ Wo ita zwa vhutsilu kha enea mafhungo; u bva zwino u ḓo vutshelwa nga dzinndwa.”+

10 Naho zwo ralo, Asa a sinyutshela muvhoni, a mu posa dzhele ngauri o vha o sinyuwa. Asa a thoma u fara vhaṅwe vhathu luvhi nga tshenetsho tshifhinga. 11 Mafhungo a Asa, u bva mathomoni u swika magumoni, o ṅwaliwa Buguni ya Mahosi a Yuda na a Isiraele.+

12 Nga ṅwaha wa vhu 39 wa vhuhosi hawe, Asa a farwa nga vhulwadze ha milenzhe a lwala nga maanḓa; na musi a tshi khou lwala, ho ngo ṱoḓa Yehova, fhedzi o ṱoḓa dziṅanga. 13 Asa a vhulungwa na vhomakhulukuku wawe;+ o fa nga ṅwaha wa vhu 41 musi a tshi khou vhusa. 14 Ngauralo, vha mu vhulunga vhiḓani ḽawe ḽihulu ḽe a vha o ḓikorela ḽone Muḓini wa Davida,+ vha mu ladza bogisini ḽo shelwa mapfura a baḽisamu na zwilungi* zwo fhambanaho zwo vanganywaho zwa vha mapfura o khetheaho.+ Vha dovha vha mu vhasela mulilo muhulu mbulungoni yawe.*