Dziphisalema
Kha mulangi; lu imbiwe na zwilidzo zwi re na ṱhale, zwi tshi lidzwa nga kulidzele kwa Sheminithi.* Luimbo lwa Davida.
12 Iwe Yehova, ntshidze ngauri a hu tshee na muvhuya;
Vhathu vha fhulufhedzeaho a vha tsheeho vhathuni.
2 Vha a zwifhelana;
Vha amba zwa u ḓifha nga milomo yavho na zwa vhufhura zwi bvaho mbiluni.+
3 Yehova u ḓo tumula milomo yoṱhe i ambaho zwa u ḓifha
Na lulimi lune lwa zuwa nga maanḓa,+
4 Vhane vha ri: “Ri ḓo kunda nga ndimi dzashu.
Ri amba zwine ra funa nga milomo yashu;
Ndi nnyi ane a nga ri vhusa?”+
5 Yehova u ri: “Ndi ḓo takuwa nda dzhia vhukando
Ngauri vha tambulaho vha khou tsikeledzwa,+
Ndi pfa vhashai vha tshi fhihamelwa.”
“Ndi ḓo vha lamulela kha vhane vha vha nyadza.”
6 Zwine Yehova a amba zwo kuna;+
Zwi nga siḽiva yo kunakiswaho ṋanḓoni lwa sumbe.
7 Iwe Yehova, u ḓo vha linda;+
U ḓo tsireledza muṅwe na muṅwe wavho kha wonoyu murafho nga hu sa fheli.
8 Vhavhi vha tshimbila vho vhofholowa
Ngauri vhana vha vhathu vha ṱuṱuwedza u ḓifara luvhi.+