Bugu Ya U Thoma Ya Koronika
28 Davida a kuvhanganya vhakololo vhoṱhe vha Isiraele ngei Yerusalema: vhakololo vha dzitshaka, vharangaphanḓa vha zwigwada+ zwi shumelaho khosi, vhane vha ranga phanḓa vha zwigidi na vha maḓana,+ vharangaphanḓa vhane vha ṱhogomela thundu yoṱhe na zwifuwo zwa khosi+ na vharwa vhawe+ na vhaḓinḓa na munna muṅwe na muṅwe a re na maanḓa na vhukoni.+ 2 Ngauralo, Khosi Davida a takuwa a amba a ri:
“Inwi vhahashu na inwi vhathu vhanga, nthetsheleseni. Lwo vha lu lutamo lwanga uri ndi fhaṱele mbulungelo ya mulanga wa Yehova nnḓu ya vhuawelo na fhethu hune Mudzimu washu a ḓo kanda hone,+ ndo ita ndugiselelo dza u i fhaṱa.+ 3 Fhedzi Mudzimu wa ngoho a mmbudza a ri: ‘A u nga ḓo fhaṱela dzina ḽanga nnḓu,+ ngauri u munna wa u lwa dzinndwa, wo shulula malofha.’+ 4 Naho zwo ralo, Yehova Mudzimu wa Isiraele o nanga nṋe kha muṱa woṱhe wa khotsi anga uri ndi vhe khosi kha ḽa Isiraele lini na lini,+ o nanga Yuda uri a vhe murangaphanḓa,+ kha nnḓu ya Yuda, a nanga nnḓu ya khotsi anga,+ kha vharwa vha khotsi anga, a nanga nṋe we a vha a tshi ntakalela, uri ndi vhe khosi kha ḽoṱhe ḽa Isiraele.+ 5 Kha vharwa vhanga vhoṱhe vhanzhi+ vhe Yehova a nṋea vhone, o nanga murwa wanga Salomo+ uri a dzule kha khuluṋoni ya vhuhosi ha Yehova kha ḽa Isiraele.+
6 “A amba na nṋe a ri: ‘Murwa wau Salomo ndi ene ane a ḓo mphaṱela nnḓu yanga na miṱa yanga, ngauri ndo nanga ene sa murwa wanga, nṋe ndi ḓo vha khotsi awe.+ 7 Ndi ḓo khwaṱhisa vhuhosi hawe lini na lini+ arali a ḓiimisela u thetshelesa ndaela dzanga na mahaṱulele anga,+ sa zwine a khou zwi ita zwino.’ 8 Zwino ndi amba phanḓa ha Vhaisiraele vhoṱhe, vhane vha vha tshivhidzo tsha Yehova, na Mudzimu washu a tshi zwi pfa ndi ri: Tevhedzani nga vhuronwane na u ṱoḓa ndaela dzoṱhe dza Yehova Mudzimu waṋu, uri ni wane shango ḽavhuḓi,+ ni ḽi fhirisele kha vharwa vhaṋu vhane na ḓo vha beba uri ḽi vhe ifa ḽa lini na lini kha vharwa vhaṋu.
9 “Iwe Salomo murwa wanga, ḓivha Mudzimu wa khotsi au u mu shumele nga mbilu yau yoṱhe*+ wo takala, ngauri Yehova u ṱolisisa mbilu dzoṱhe+ na zwiṱuṱuwedzi.+ Arali wa mu ṱoḓa, ene u ḓo ita uri u mu wane,+ arali wa mu ṱutshela, u ḓo u laṱa lwa tshoṱhe.+ 10 Elekanya zwino ngauri Yehova o u nanga uri u fhaṱe nnḓu khethwa. U vhe na tshivhindi, u ite wonoyo mushumo.”
11 Davida a ṋea murwa wawe Salomo pulane+ ya vurannḓa,+ dzinnḓu, kamara dzayo dza u vhulungela zwithu, kamara dza nṱha, kamara khulwane dzayo dza nga ngomu na nnḓu ya u pfumedzana.*+ 12 A mu ṋea pulane ya zwoṱhe zwe a vhudzwa zwone a tshi hevhedzwa* nga ha miṱa+ ya nnḓu ya Yehova, na ya kamara dzoṱhe dza u ḽela u mona nayo, na ya mbulungelo dza nḓuni ya Mudzimu wa ngoho, na ya mbulungelo dza zwithu zwo itwaho zwikhethwa;*+ 13 a dovha a mu ṋea na ndaela dza zwigwada zwa vhotshifhe+ na Vhalevi, dza mishumo yoṱhe ya nḓuni ya Yehova na dza thundu dzoṱhe dzi shumiswaho nḓuni ya Yehova; 14 a dovha a mu ṋea na tshileme tsha musuku une wa ḓo shumiswa kha thundu dzoṱhe dza mishumo yo fhambanaho na tshileme tsha siḽiva ine ya ḓo shumiswa kha thundu dzoṱhe dzo fhambanaho; 15 na tshileme tsha zwiṱomambone+ zwa musuku na mbone dza hone dza musuku, tshileme tsha zwiṱomambone zwo fhambanaho na mbone dzazwo, na tshileme tsha zwiṱomambone zwa siḽiva, zwi tshi ya nga kushumisele kwa tshiṱomambone tshiṅwe na tshiṅwe; 16 na tshileme tsha musuku wa u ita ṱafula dza vhurotho ha ṱano,+ tsha ṱafula iṅwe na iṅwe, khathihi na siḽiva na ṱafula dza siḽiva, 17 musuku une wa ḓo shumiswa kha forogo, zwigoḓelo, nkho dza musuku vhukuma na tshileme tsha zwigoḓelo+ zwiṱuku zwa musuku, musuku wa tshigoḓelo tshiṱuku tshiṅwe na tshiṅwe, na tshileme tsha zwigoḓelo zwiṱuku zwa siḽiva na siḽiva ya tshigoḓelo tshiṱuku tshiṅwe na tshiṅwe. 18 A dovha a mu ṋea na musuku wo kunakiswaho wa u ita aḽeṱare+ ya zwioro na zwifanyiso zwa gariki+ zwine zwa vha zwa vhakerube+ vha musuku vhane vha ṱharamudza phapha dzavho, vha tsireledza mbulungelo ya mulanga wa Yehova. 19 Davida a ri: “Yehova o vha e na nṋe, a nṋea ṱhalukanyo ya uri ndi kone u ṅwala+ zwidodombedzwa zwoṱhe zwa pulane.”+
20 Davida a amba na murwa wawe Salomo a ri: “Ivha na tshivhindi na maanḓa, u shume wonoyu mushumo. U songo ofha kana u tshuwa, ngauri Yehova Mudzimu, ane a vha Mudzimu wanga, u na iwe.+ A nga si u laṱe kana u u ṱutshela,+ fhedzi u ḓo vha na iwe u swika mushumo woṱhe wa nḓuni ya Yehova u tshi fhela. 21 Khezwo zwigwada zwa vhotshifhe+ na Vhalevi+ zwine zwa shuma mishumo yoṱhe ya nnḓu ya Mudzimu wa ngoho. U na vhashumi vho ḓiimiselaho vha re na vhutsila ha u ita mishumo yo fhambanaho,+ khathihi na vhakololo+ na vhathu vhoṱhe vhane vha ḓo ita zwoṱhe zwine wa laya.”