Kha Vharoma
15 Riṋe vha re na lutendo lwo khwaṱhaho+ ri songo ḓitakadza,+ fhedzi kha ri konḓelele vha si na lutendo lwo khwaṱhaho. 2 Kha ri itele vhaṅwe zwivhuya uri ri vha khwaṱhise.+ 3 Ngauri na Kristo ho ngo ḓitakadza,+ samusi ho ṅwaliwa u pfi: “Vhe vha u sema vha vho sema na nṋe.”+ 4 Ngauri zwithu zwoṱhe zwo ṅwaliwaho kale zwo ṅwalelwa u ri funza,+ uri nga u konḓelela hashu+ na nga u khuthadzwa nga Maṅwalo ri vhe na fhulufhelo.+ 5 Ngavhe Mudzimu ane a ni thusa u konḓelela na u ni khuthadza a tshi ita uri ni vhe na muhumbulo u fanaho na we Kristo Yesu a vha e nawo, 6 uri noṱhe ni vhe na vhuthihi,+ ni hulise Mudzimu ane a vha Khotsi a Murena washu Yesu Kristo.
7 Ni ṱanganedzane+ vhunga na Kristo o ni ṱanganedza,+ uri Mudzimu a huliswe. 8 Ngauri ndi a ni vhudza uri Kristo o vha muḓinḓa wa vhane vha fumbiswa+ uri a sumbedze uri Mudzimu u amba ngoho, na u khwaṱhisedza zwe zwa fhulufhedziswa vhomakhulukuku wavho,+ 9 na uri tshaka dzi hulise Mudzimu nga u vha hawe na khathutshelo.+ Samusi ho ṅwaliwa u pfi: “Ngauri ndi ḓo u renda vhukati ha dzitshaka, ndi ḓo renda dzina ḽau nga nyimbo.”+ 10 A dovha a ri: “Inwi vha dzitshaka, takalani na vhathu vhawe.”+ 11 Luṅwe luṅwalo lu ri: “Inwi tshaka dzoṱhe, rendani Yehova,* vhathu vhoṱhe kha vha mu rende.”+ 12 Yesaya o dovha a ri: “Hu ḓo vha na mudzi wa Isai,+ une wa ḓo vhusa dzitshaka;+ tshaka dzi ḓo fhulufhela wone.”+ 13 Ngavhe Mudzimu ane a ṋea fhulufhelo a tshi ni ṋea dakalo na mulalo ngauri ni a mu fhulufhela, uri muya mukhethwa u kone u khwaṱhisa fhulufhelo ḽaṋu nga vhuḓalo.+
14 Vhahashu, ndi a tenda uri ni ita mishumo mivhuya, ngauri ni na nḓivho, na uri ni a kona u eletshedzana.* 15 Naho zwo ralo, ndi khou ni ṅwalela uri ndi bvisele khagala dziṅwe mbuno, uri ndi ni humbudze, ngauri ndo sumbedzwa vhuthu vhuhulu nga Mudzimu 16 uri ndi vhe mushumeli wa Kristo Yesu, ndi ḓivhadze mafhungo maḓifha kha dzitshaka,+ wonoyu ndi mushumo mukhethwa. Ndi khou ita wonoyu mushumo uri vhathu vha dzenedzi tshaka vha itwe vhakhethwa nga muya mukhethwa,+ vha ṋekedzwe sa tshifhiwa tshi ṱanganedzwaho nga Mudzimu.
17 Ndo takala ngauri ndi mufunziwa wa Kristo Yesu na uri ndi khou ita mushumo wa Mudzimu. 18 Ndi ḓo amba fhedzi nga ha zwe Kristo a zwi ita a tshi shumisa nṋe uri tshaka dzi mu thetshelese, nga zwine nda amba na u ita, 19 nga vhuṱolo, nga zwithu zwi mangadzaho+ na nga muya mukhethwa, ndi ngazwo ndo kona u huwelela mafhungo maḓifha nga vhuḓalo nga ha Kristo u bva Yerusalema u swika na Eḽiriko.+ 20 Ndo ḓiimisela u huwelela mafhungo maḓifha fhethu hune dzina ḽa Kristo a ḽi athu u ḓivhadzwa, uri ndi si bvele phanḓa na mushumo we wa thomiwa nga muṅwe muthu; 21 samusi ho ṅwaliwa u pfi: “Vhe vha si vhudzwe nga hae vha ḓo vhona, na vhe vha si pfe vha ḓo pfesesa.”+
22 Ndi ngazwo ndi songo kona u ḓa kha inwi, naho ndo lingedza lunzhi. 23 Ndo huwelela fhethu hoṱhe kha enea madzingu, nahone ndi kale ndi tshi ṱoḓa u ḓa kha inwi. 24 Ndi ngazwo ndo humbula u fhira ndi tshi ni vhona musi ndi tshi ya Sipania. Musi ro no fhedza tshifhinga roṱhe, ni ḓo kona u mphelekedza ndi tshi ya henengei. 25 Zwino ndi khou ya Yerusalema u thusa vhakhethwa.+ 26 Vhahashu vha ngei Makedonia na Axaya vho takalela u thusa vhakhethwa vha ngei Yerusalema nga u vha ṋea zwine vha shaya.+ 27 Vho zwi ita vho takala, vha tshi vhona zwo tea uri vha zwi ite; Vhayuda vho vhudza dzitshaka zwithu zwavhuḓi zwi bvaho kha Mudzimu, ndi ngazwo vha dzitshaka vho vha thusa nga zwine vha shaya.+ 28 Ndi khou isa zwithu Yerusalema zwe nda ṋewa nga vhahashu, uri ndi zwi ṋee vhakhethwa. Ndi ḓo fhira ndi tshi ni vhona musi ndi tshi ya Sipania. 29 Zwiṅwe hafhu, ndi a zwi ḓivha uri musi ndi tshi ḓa kha inwi ndi ḓo ḓa na phaṱhutshedzo nnzhi dzi bvaho kha Kristo.
30 Vhahashu, samusi muya wa Mudzimu wo ita uri ri funane, ri tshi tenda Murena washu Yesu Kristo, ni nthabelele kha Mudzimu ni sa neti, samusi na nṋe ndi tshi khou rabela,+ 31 uri ndi kone u tsireledzwa+ kha vha sa tendi ngei Yudea na uri vhakhethwa vha ngei Yerusalema vha ṱanganedze zwine nda khou vha isela zwone,+ 32 uri ndi ḓe kha inwi ndo takala arali Mudzimu a tshi zwi funa, uri ri ṱuṱuwedzane. 33 Ngavhe Mudzimu ane a ṋea mulalo a tshi vha na inwi noṱhe.+ Amen.