Bugu Ya U Thoma Ya Dzikhosi

11 Fhedzi Khosi Salomo o funa vhafumakadzi vhanzhi vha vhatsinda,+ nga nnḓa ha ṅwana wa Farao:+ O vha e na vhafumakadzi vha Vhamoaba,+ vha Vhaamoni,+ vha Vhaedomo, vha Vhasidoni+ na vha Vhahethe.+ 2 Vho vha vha tshi bva kha tshaka dze Yehova a amba na Vhaisiraele a ri: “A no ngo tea u ḓiṱanganya navho,* a vho ngo tea u ḓiṱanganya na inwi, ngauri vha ḓo khelusa mbilu dzaṋu na tevhela midzimu yavho.”+ Fhedzi Salomo a vha nambatela na u vha funa. 3 O vha e na vhafumakadzi vha 700 vha vhakololo na vha 300 vha vhuimo ha fhasi,* nga zwiṱuku nga zwiṱuku vhafumakadzi vhawe vha khelusa mbilu yawe.* 4 Musi Salomo o no kalaha,+ vhafumakadzi vhawe vha khelusa mbilu yawe uri a tevhele miṅwe midzimu,+ o vha a si tsha shumela* Yehova Mudzimu wawe nga mbilu yawe yoṱhe u fana na Davida khotsi awe. 5 Salomo a tevhela Asiterothe+ mudzimukadzi wa Vhasidoni na Milikomo,+ mudzimu a nengisaho wa Vhaamoni. 6 Salomo a ita zwi sa takadzi Yehova, ho ngo tevhela Yehova nga ho fhelelaho* u fana na khotsi awe Davida.+

7 Ndi nga tshenetsho tshifhinga he Salomo a fhaṱela fhethu ha vhurabeli+ Kamosi mudzimu a nengisaho wa Vhamoaba na Molexo+ mudzimu a nengisaho wa Vhaamoni,+ thavhani i re phanḓa ha Yerusalema. 8 Zwenezwo ndi zwe a zwi itela vhafumakadzi vhawe vhoṱhe vha vhatsinda vhe vha dubisa zwiṱhavhelo na u itela midzimu yavho zwiṱhavhelo.

9 Yehova a sinyutshela Salomo, ngauri mbilu yawe yo vha yo mu khelusa kha Yehova Mudzimu wa Isiraele,+ we a ḓivhonadza khae luvhili,+ 10 o vha o mu sevha nga ha zwenezwo zwithu uri a songo tevhela miṅwe midzimu.+ Fhedzi ho ngo thetshelesa zwe Yehova a mu laya. 11 Yehova a amba na Salomo a ri: “Nga nṱhani ha uri wo ita zwenezwo zwithu, u si vhulunge mulanga wanga na maitele anga e nda u laya, ndi ḓo u dzhiela muvhuso nda u ṋea muṅwe wa vhashumeli vhau.+ 12 Naho zwo ralo, ndi tshi itela Davida khotsi au, a thi nga ḓo u dzhiela wone u tshi kha ḓi tshila. Ndi ḓo u dzhiela murwa wau,+ 13 fhedzi a thi nga ḓo u dzhiela muvhuso woṱhe.+ Ndi ḓo ṋea murwa wau lushaka luthihi,+ ndi tshi itela Davida mushumeli wanga na muḓi wa Yerusalema, we nda u nanga.”+

14 Yehova a ita uri Salomo+ a vhe na muhanedzi ane a vha Hadada wa Muedomo, wa vhuhosini ha Edomo.+ 15 Musi Davida a tshi kunda Edomo,+ Yoaba mulangammbi o ya a vhulunga vho vhulawaho, a lingedza u vhulaya vhanna vhoṱhe vha Edomo. 16 (Ngauri Yoaba na Vhaisiraele vhoṱhe vho dzula henefho miṅwedzi ya rathi u swika vha tshi vhulaya vhanna vhoṱhe vha Edomo.) 17 Fhedzi Hadada a shavha na vhaṅwe vhashumeli vha khotsi awe vha Vhaedomo, vha ya Egipita; nga tshenetsho tshifhinga Hadada o vha a tshi kha ḓi vha mutukana muṱuku. 18 Vha takuwa Midiani vha swika Pharani. Vha dzhia vhanna vha Pharani+ vha ṱuwa navho Egipita ha Farao khosi ya Egipita, we a mu ṋea nnḓu, zwiḽiwa na shango. 19 Farao a takalela Hadada lwe a mu ṋea murathu wa mufumakadzi wawe Tahapanese. 20 Nga murahu ha tshifhinga murathu wa Tahapanese a mu bebela murwa, ane a pfi Genubathi, Tahapanese a mu alusa nḓuni ya Farao, Genubathi a dzula nḓuni ya Farao na vharwa vha Farao.

21 Hadada a zwi pfa e Egipita uri Davida o vhulungwa na vhomakhulukuku wawe+ na uri Yoaba mulangammbi o fa.+ Ngauralo, Hadada a amba na Farao a ri: “Ntendele ndi ṱuwe uri ndi ye shangoni ḽa hashu.” 22 Fhedzi Farao a amba nae a ri: “Ndi mini tshine wa tshi shaya u na nṋe lune wa ṱoḓa u ya shangoni ḽa hau?” Hadada a fhindula a ri: “A hu na, fhedzi ndi khou humbela uri u ntendele ndi ṱuwe.”

23 Mudzimu a dovha a ita uri Salomo a vhe na muṅwe muhanedzi,+ ane a pfi Retsoni ṅwana wa Eliada, we a shavha muṋe wawe, Hadadesere+ khosi ya Tsoba. 24 O ḓikuvhanganyela vhanna, a vha murangaphanḓa wa tshigwada tsha mavemu, musi Davida a tshi vha kunda.*+ Vha ya Damaseko+ vha dzula henefho, vha thoma u vhusa Damaseko. 25 A vha muhanedzi wa Isiraele misini yoṱhe ya Salomo, a ṋaṋisa vhuṱungu he ha ḓiswa nga Hadada, o vha a tshi vhenga Vhaisiraele musi a tshi khou vhusa ḽa Siria.

26 Ho vha hu na Yerobeamu+ murwa wa Nebatha, wa Muefraimi ane a bva Tsereda, mushumeli wa Salomo,+ we mme awe a vha a tshi pfi Tseruwa, we a vha e tshilikadzi. Na ene a vutshela khosi.+ 27 Zwe zwa ita uri a vutshele khosi ndi hezwi: Salomo o ita Tshikwara*+ u itela u thivha tshivhana tsha Muḓi wa Davida khotsi awe.+ 28 Huno Yerobeamu o vha e munna wa maanḓa. Musi Salomo a tshi vhona uri onoyu muṱhannga ndi mushumi wa biko, a mu ita mulavhelesi+ wa mushumo woṱhe wa khombe-khombe wa vha nnḓu ya Yosefa. 29 Nga tshenetsho tshifhinga, Yerobeamu a ṱuwa Yerusalema, Ahia+ wa Mushiḽo, we a vha e muporofita, a mu wana nḓilani. Ahia o vha o ambara tshiambaro tshiswa, vho vha vhe vhavhili fhedzi henefho masimuni. 30 Ahia a dzhia tshiambaro tshiswa tshe a vha o tshi ambara a tshi kherukanya tsha bva zwipiḓa zwa 12. 31 A amba na Yerobeamu a ri:

“Ḓidzhiele zwipiḓa zwa fumi, ngauri Yehova Mudzimu wa Isiraele u ri: ‘Ndi ḓo dzhiela Salomo muvhuso, nda ṋea iwe tshaka dza fumi.+ 32 Fhedzi ene u ḓo sala na lushaka luthihi+ ndi tshi itela Davida+ mushumeli wanga na muḓi wa Yerusalema, we nda u nanga kha tshaka dzoṱhe dza Isiraele.+ 33 Ndi ḓo ita zwenezwi ngauri vho nṱutshela,+ vha khou gwadamela Asiterothe mudzimukadzi wa Vhasidoni, Kamosi mudzimu wa Moaba, Milikomo mudzimu wa Vhaamoni, a vho ngo tshimbila nḓilani dzanga nga u ita zwo lugaho phanḓa hanga na u tevhedza maitele anga na khaṱhulo dzanga u fana na Davida khotsi awe. 34 Fhedzi a thi nga ḓo mu dzhiela muvhuso, ndi ḓo mu litsha e murangaphanḓa maḓuvha oṱhe a vhutshilo hawe, ndi tshi itela Davida mushumeli wanga we nda mu nanga,+ nga⁠uri o thetshelesa ndaela dzanga na maitele anga. 35 Fhedzi ndi ḓo dzhiela murwa wawe vhuhosi nda vhu ṋea iwe, nda u ṋea tshaka dza fumi.+ 36 Murwa wawe ndi ḓo mu ṋea lushaka luthihi, uri Davida mushumeli wanga a dzule e na luvhone phanḓa hanga Yerusalema,+ une wa vha muḓi we nda ḓinangela uri dzina ḽanga ḽi dzule henefho. 37 Ndi ḓo u dzhia, wa vhusa zwoṱhe zwine wa zwi tama, u ḓo vha khosi kha ḽa Isiraele. 38 Arali wa thetshelesa zwoṱhe zwine nda u laya wa tshimbila nḓilani dzanga, wa ita zwo lugaho phanḓa hanga nga u thetshelesa maitele anga na ndaela dzanga, sa zwe Davida mushumeli wanga a zwi ita,+ ndi ḓo vha na iwe. Ndi ḓo u fhaṱela nnḓu ya lini na lini, vhunga ndo i fhaṱela Davida,+ nda u ṋea Isiraele. 39 Ndi ḓo shonisa vhana vha Davida nga nṱhani ha zwenezwi,+ fhedzi hu si lwa tshoṱhe.’”+

40 Ngauralo, Salomo a lingedza u vhulaya Yerobeamu, fhedzi Yerobeamu a shavhela Egipita, ha Shishaka+ khosi ya Egipita,+ a dzula henefho Egipita u swika Salomo a tshi fa.

41 Mafhungo oṱhe a Salomo na zwoṱhe zwe a ita na vhuṱali hawe, naa a zwo ngo ṅwaliwa buguni ya mafhungo a Salomo?+ 42 Tshifhinga* tshe Salomo a tshi fhedza a tshi vhusa shango ḽoṱhe ḽa Isiraele e Yerusalema, yo vha i miṅwaha ya 40. 43 Salomo a vhulungwa na vhomakhulukuku wawe Muḓini wa Davida khotsi awe; murwa wawe Rehabeamu+ a vha khosi vhudzuloni hawe.