Bugu Ya U Thoma Ya Dzikhosi
12 Rehabeamu a ya Shikeme,+ ngauri Vhaisiraele vhoṱhe vho vha vho ya Shikeme uri vha mu vhee uri a vhe khosi.+ 2 Musi Yerobeamu murwa wa Nebatha a tshi tou zwi pfa (o vha a tshi kha ḓi vha Egipita ngauri Yerobeamu o vha o shavha Khosi Salomo, a tshi dzula Egipita),+ 3 vha ruma muthu a mu vhidza. Nga murahu ha zwenezwo, Yerobeamu na tshivhidzo tshoṱhe tsha Isiraele vha ḓa kha Rehabeamu vha ri: 4 “Khotsi au o vha o ri hwesa dzhogo i lemelaho.+ Arali wa ri fhungudzela mushumo wa khotsi au u konḓaho, wa ri leludzela dzhogo i lemelaho* ye khotsi au a ri hwesa yone, ri ḓo vha vhalanda vhau.”
5 A amba navho a ri: “Tshimbilani ni vhuye kha nṋe nga murahu ha maḓuvha mararu.” Ngauralo, vhathu vha ṱuwa.+ 6 Khosi Rehabeamu a vhudzisa vhakalaha* vhe vha shumela khotsi awe Salomo musi a tshi kha ḓi tshila, a ri: “Ndi nyeletshedzo ifhio ine na nga nṋea yone uri ndi fhindule avha vhathu?” 7 Vha mu fhindula vha ri: “Arali ṋamusi wa vha mushumeli wa avha vhathu, wa tenda khumbelo yavho, wa vha fhindula zwavhuḓi, vha ḓo dzula vhe vhashumeli vhau.”
8 Naho zwo ralo, a si ṱanganedze nyeletshedzo ye vhakalaha* vha mu ṋea yone, a ya a vhudzisa vhaṱhannga vhe a aluwa navho, vho no vhaho vhaḓinḓa vhawe.+ 9 A vha vhudzisa a ri: “Ndi nyeletshedzo ifhio ine na nga nṋea yone uri ndi fhindule avha vhathu vhe vha amba na nṋe vha ri, ‘Leludza dzhogo ye khotsi au a ri hwesa yone’?” 10 Vhaṱhannga vhe a aluwa navho vha amba nae vha ri: “Zwine wa fanela u vhudza avha vhathu vhe vha amba na iwe vha ri: ‘Khotsi au o ri hwesa dzhogo i lemelaho, fhedzi iwe u fanela u ri leludzela yone’; u vha vhudze uri: ‘Munwe wanga muṱuku u ḓo fhira khundu dza khotsi anga nga vhudenya. 11 Khotsi anga o ni hwesa dzhogo i lemelaho, fhedzi nṋe ndi ḓo ni hwesa i lemelesaho. Khotsi anga o vha a tshi ni rwa nga zwimebi, fhedzi nṋe ndi ḓo ni rwa nga zwimebi zwi ṱhavhaho.’”
12 Yerobeamu na vhathu vhoṱhe vha ḓa kha Rehabeamu nga ḓuvha ḽa vhuraru, samusi khosi yo vha yo amba ya ri: “Ni vhuye kha nṋe nga ḓuvha ḽa vhuraru.”+ 13 Fhedzi khosi ya fhindula vhathu nga vhuhali, i si ṱanganedze nyeletshedzo ye ya ṋewa yone nga vhakalaha.* 14 Ya vha fhindula i tshi tevhedza nyeletshedzo ya vhaṱhannga, ya ri: “Khotsi anga o ni hwesa dzhogo i lemelaho, fhedzi nṋe ndi ḓo ita uri dzhogo yaṋu i lemelese. Khotsi anga o vha a tshi ni rwa nga zwimebi, fhedzi nṋe ndi ḓo ni rwa nga zwimebi zwi ṱhavhaho.” 15 Ngauralo, khosi a yo ngo thetshelesa vhathu, ngauri ndi Yehova we a ita uri zwithu zwi vhe nga yeneyo nḓila,+ uri hu khunyelele zwe Yehova a zwi vhudza Yerobeamu murwa wa Nebatha a tshi shumisa Ahia wa Mushiḽo.+
16 Musi Vhaisiraele vhoṱhe vha tshi vhona uri khosi a yo ngo vha thetshelesa, vha fhindula khosi vha ri: “Ri na mukovhe-ḓe na Davida? A ri na ifa kha murwa wa Isai. Hee Isiraele, iyani kha midzimu yaṋu. Zwino iwe Davida ṱhogomela nnḓu yau!” Nga zwenezwo, Vhaisiraele vha vhuyelela mahayani* avho.+ 17 Fhedzi Rehabeamu a bvela phanḓa a tshi vhusa Vhaisiraele vha dzulaho miḓini ya Yuda.+
18 Khosi Rehabeamu a rumela Adoramu,+ we a vha a tshi langa vhane vha ita mushumo wa khombe-khombe, fhedzi Vhaisiraele vhoṱhe vha mu kanḓa nga matombo u swika a tshi fa. Khosi Rehabeamu a ṱavhanya a ṋamela gariki yawe a shavhela Yerusalema.+ 19 Vhaisiraele vha vutshela+ nnḓu ya Davida u swika na ṋamusi.
20 Musi Vhaisiraele vha tshi tou pfa uri Yerobeamu o vhuya, vha mu vhidza uri a ḓe tshitshavhani, vha mu vhea uri a vhe khosi ya ḽoṱhe ḽa Isiraele.+ A hu na vhe vha tevhela vha nnḓu ya Davida nga nnḓa ha lushaka lwa Yuda.+
21 Musi Rehabeamu a tshi swika Yerusalema, a ṱavhanya a kuvhanganya vha nnḓu yoṱhe ya Yuda na lushaka lwa Benyamini na vhahali vho gudiswaho* vha 180 000, uri vha lwe na vha nnḓu ya Isiraele, uri vha vhuyedzedze vhuhosi kha Rehabeamu murwa wa Salomo.+ 22 Mudzimu wa ngoho a amba na Shemaya+ mushumeli wa Mudzimu wa ngoho, a ri: 23 “Amba na Rehabeamu murwa wa Salomo khosi ya Yuda na vha nnḓu yoṱhe ya Yuda na ya Benyamini na vhathu vhoṱhe u ri, 24 ‘Zwe Yehova a zwi amba ndi hezwi: “Ni songo ya u lwa na Vhaisiraele vhahaṋu. Muṅwe na muṅwe nga a vhuyelele nḓuni yawe, ngauri zwo itwa nga nṋe.”’”+ Vha thetshelesa zwe Yehova a zwi amba, vha vhuyelela mahayani samusi Yehova o amba navho.
25 Yerobeamu a fhaṱa* Shikeme+ dzinguni ḽa thavhani dza Efuraimi a dzula henefho. A ṱuwa henefho a ya a fhaṱa* Penuele.+ 26 Yerobeamu a elekanya mbiluni yawe a ri: “Zwino muvhuso u ḓo vhuyelela kha vha nnḓu ya Davida.+ 27 Arali vhenevha vhathu vha bvela phanḓa vha tshi gonya u ṋekedza zwiṱhavhelo nḓuni ya Yehova ngei Yerusalema,+ vha ḓo dovha vha vhuyelela ha muṋe wavho, Khosi Rehabeamu wa Yuda. Vha ḓo mmbulaya vha vhuyelela ha Khosi Rehabeamu wa Yuda.” 28 Musi yo no amba na vhaeletshedzi vhayo, khosi ya ita ṋamana+ mbili dza musuku ya amba na vhathu ya ri: “Zwi ḓo ni netisa u gonya Yerusalema. Mudzimu waṋu khoyo inwi Vhaisiraele, we a ni bvisa shangoni ḽa Egipita.”+ 29 A vhea iṅwe Bethele,+ iṅwe a i vhea ngei Dani.+ 30 Zwenezwo zwa ita uri vha ite tshivhi,+ vhathu vha tshimbila vha vhuya vha swika Dani u itela u gwadamela ṋamana henefho.
31 A fhaṱa nnḓu dza u rabela zwikwarani, a nanga vhotshifhe kha vhathu zwavho, vhane vha si vhe Vhalevi.+ 32 Yerobeamu a dovha a ita vhuṱambo nga ṅwedzi wa vhumalo nga ḓuvha ḽa vhu 15 ḽa ṅwedzi, vhune ha fana na vhuṱambo ha Yuda.+ Kha aḽeṱare ye a i ita ngei Bethele+ a itela zwiṱhavhelo ṋamana dze a dzi vhumba, ngei Bethele a vhea vhotshifhe fhethu ha vhurabeli he a hu ita. 33 A thoma u ṋekedza zwifhiwa aḽeṱareni ye a i fhaṱa ngei Bethele nga ḓuvha ḽa vhu 15 nga ṅwedzi wa vhumalo we a u vhea ene muṋe, a itela vhathu vha Isiraele vhuṱambo, a gonya kha aḽeṱare uri a ṋekedze zwifhiwa na zwiṱhavhelo zwa u dubiswa.