Vhurifhi Ha U Thoma Vhu Yaho Kha Timotheo
6 Vhalanda vha dzule vha tshi ṱhonifha vhaṋe vhavho nga mbilu yoṱhe,+ uri hu si ambiwe luvhi nga ha dzina ḽa Mudzimu na pfunzo yawe.+ 2 Zwiṅwe hafhu, vha re na vhaṋe vha vhatendi vha songo vha nyadza, ngauri ndi vhatendi ngavho. Nṱhani hazwo, vha vha shumele nga mbilu yoṱhe, ngauri vha khou shumela vhatendi ngavho vhane vha vha funa.
Dzula u tshi funza zwenezwi zwithu na u vha ṱuṱuwedza uri vha zwi ite. 3 Ane a funza dziṅwe pfunzo dzi sa tendelani na pfunzo ya ngoho*+ ya Murena washu Yesu Kristo kana pfunzo ine ya ri funza nḓila ine ra fanela u shumela ngayo Mudzimu,+ 4 u a ḓikukumusa, ha pfesesi tshithu.+ U funesa u hanedza na u ṱaṱa khani nga ha maipfi.+ Zwenezwi zwi ita uri hu vhe na vivho, dzinndwa, u tshinya dzina* na u humbulelana vhuvhi. 5 Zwenezwi zwi ita uri vhenevha vhathu vho tshinyalaho muhumbulo+ na vho ṱutshelaho ngoho, vha dzule vha tshi hanedzana nga ha zwithu zwi si na mushumo, vha ṱoḓa u ḓikumedzela kha Mudzimu uri vha ḓivhuyedze.+ 6 Ndi ngoho uri u ḓikumedzela kha Mudzimu zwi a vhuyedza vhukuma,+ tenda ra fushea nga zwine ra vha nazwo. 7 Ngauri a ro ngo ḓa na tshithu shangoni, na musi ri tshi fa a ri ṱuwi na tshithu.+ 8 Arali ri na zwiḽiwa na zwiambaro,* kha ri fushee ngazwo.+
9 Fhedzi vho ḓiimiselaho u pfuma vha wela mulingoni na tshikwekweni+ na nyemuloni nnzhi dza vhutsilu dzi huvhadzaho, zwine zwa ita uri vha fheliswe.+ 10 Ngauri mudzi wa zwithu zwoṱhe zwivhi ndi u funa tshelede, vhaṅwe a vha tshee na lutendo nga nṱhani ha u funa tshelede, vha ḓivhangela maṱungu.*+
11 Iwe mushumeli wa Mudzimu, shavha zwenezwi zwithu. Fhedzi u ite zwoṱhe zwine wa nga kona u itela u sumbedza u luga, u ḓikumedzela kha Mudzimu, lutendo, lufuno, u konḓelela na u vuḓa.+ 12 Ilwa nndwa yavhuḓi ya lutendo, u farelele wo khwaṱha kha vhutshilo vhu sa fheli he wa vhidzelwa hone, wa ṋea vhuṱanzi havhuḓi phanḓa ha ṱhanzi nnzhi.
13 Ndi a u laya phanḓa ha Mudzimu ane a ita uri zwithu zwoṱhe zwi tshile, na phanḓa ha Kristo Yesu we a ṋea vhuṱanzi havhuḓi phanḓa ha Pontio Pilato,+ 14 uri zwe nda u laya u zwi ite nga nḓila yo kunaho na i sa solisei, u swikela Murena washu Yesu Kristo a tshi vhonala.+ 15 Murena wa Maanḓa o fhaṱutshedzwaho u ḓo ḓivhonadza nga zwifhinga zwo vhewaho. Ndi Khosi ya mahosi na Murena wa marena,+ 16 ndi ene e eṱhe a sa fi,+ a dzulaho fhethu hu penyaho* hune muthu a si kone u swika,+ a hu na muthu o no mu vhonaho kana muthu ane a nga mu vhona.+ Ngavhe a tshi huliswa na u vha na maanḓa a sa fheli. Amen.
17 Laya vho pfumaho kha ḽino shango* uri vha si ḓikukumuse* vha fhulufhela lupfumo lwa tshifhinganyana,+ fhedzi vha fhulufhele Mudzimu, ane a ri ṋea zwoṱhe zwine ra ḓiphiṋa ngazwo.+ 18 Vha vhudze uri vha ite zwivhuya, vha ite zwithu zwinzhi zwavhuḓi, vha vhe na mafunda, vha ḓiimisele u kovhela vhaṅwe,+ 19 ndi hone vha tshi ḓo ḓikuvhanganyela lupfumo lu bvaho kha Mudzimu,+ vha vha na vhumatshelo havhuḓi, uri vha farelele vho khwaṱha vhutshilo ha vhukuma.+
20 Timotheo, tsireledza zwe wa ṋewa zwone,+ u songo thetshelesa zwithu zwi si na mushumo, zwi tshinyaho zwithu zwikhethwa kana u thetshelesa mafhungo a vhathu vhane vha humbula u nga vha na “nḓivho,” fhedzi nḓivho yavho i tshi lwisana na ngoho.+ 21 Vhaṅwe a vha tshee na lutendo ngauri vho kungiwa nga yeneyo nḓivho.
Ngavhe u tshi vha na vhuthu vhuhulu ha Mudzimu.