Kha Vhahevheru

9 Mulanga wa kale wo vha u na milayo ine ya fanela u tevhelwa musi hu tshi rabelwa fhethu hukhethwa+ kha ḽifhasi. 2 Ngauri dennde ḽo vha ḽi na zwipiḓa zwivhili. Tshipiḓa tsha u thoma tsho vha tshi tshi pfi Fhethu Hukhethwa,+ hu na tshiṱomambone,+ ṱafula na vhurotho ho ṋekedzwaho Mudzimu.*+ 3 Fhedzi khetheni+ ḽa vhuvhili ḽo vha ḽo thivha tshipiḓa tsha vhuvhili tshine tsha pfi fhethu Hukhethwa-khethwa.+ 4 Henefho ho vha hu na mudzio wa musuku+ wa u fhisela zwioro na mbulungelo ya mulanga+ yo ḓodzwaho musuku hoṱhe,+ ye ya vha i na thonga ya Aroni ye ya bva maluvha,+ mbaba dza matombo+ dza mulanga na mvuvhelo ya musuku i re na mana;+ 5 nga nṱha ha mbulungelo ho vha hu na vhakerube vha vhugala vho tsira mutibo*+ nga phapha dzavho. Fhedzi zwino a si tshifhinga tsha u amba nga vhuḓalo nga ha zwenezwi zwithu.

6 Musi zwenezwi zwithu zwo no itwa nga yeneyi nḓila, vhotshifhe vho vha vha tshi dzhena tshifhinga tshoṱhe kha tshipiḓa tsha u thoma tsha dennde uri vha ite mishumo mikhethwa;+ 7 fhedzi tshifhe muhulu o vha a tshi dzhena e eṱhe luthihi nga ṅwaha kha tshipiḓa tsha vhuvhili,+ e na malofha,+ ane a a ṋekedza a tshi itela ene muṋe+ na zwivhi zwe vhathu+ vha zwi ita vha sa zwi ḓivhi. 8 Nga zwenezwo, muya mukhethwa wo zwi bvisela khagala uri a hu na we a dzumbululelwa nḓila ya u dzhena fhethu hukhethwa musi hu kha ḓi vha na dennde ḽa kale.+ 9 Ḽeneḽi dennde ḽi fanyisela tshenetshi tshifhinga,+ u swika zwino zwenezwo zwifhiwa na zwiṱhavhelo zwi kha ḓi ṋekedzwa.+ Naho zwo ralo, zwenezwo zwithu a zwi iti uri vhane vha gwadamela Mudzimu vha vhe na luvalo lwo kunaho nga ho fhelelaho.+ 10 Zwi tshimbidzana na zwiḽiwa na zwinwiwa na nḓila dzo fhambanaho dza u ḓikunakisa na u kunakisa thundu.*+ Ndi zwe mulayo wa zwi amba nga ha muvhili,+ zwo vha zwi tshi tea u tevhedzwa u swika nga tshifhinga tsho vhewaho tsha u lugisa zwithu.

11 Musi Kristo a tshi ḓa sa tshifhe muhulu wa zwivhuya zwo no vhaho hone, o dzhena denndeni ḽa ndeme vhukuma na ḽa khwine, ḽi songo itwaho nga zwanḓa nahone a si ḽa fhano kha ḽifhasi. 12 Ho ngo dzhena fhethu hukhethwa nga malofha a mbudzi na a mbohwana, fhedzi o dzhena nga malofha awe+ luthihi nahone lwa tshoṱhe, a ri tshidza* nga hu sa fheli.+ 13 Vhotshifhe vha shumisa malofha a mbudzi na a mboho,+ vha hasha vha re na tshika miḽora ya ṋamana, zwa ita uri vha vhe vho kunaho phanḓa ha Mudzimu.+ 14 Malofha a Kristo+ a ḓo ita zwi fhiraho zwenezwi. Muya mukhethwa wo ita uri Kristo a ḓiṋekedzele kha Mudzimu sa tshiṱhavhelo tsho fhelelaho. Malofha awe a kunakisa mvalo dzashu, ra litsha mishumo i sa vhuyedzi,+ uri ri itele Mudzimu a tshilaho mushumo mukhethwa.+

15 Ndi ngazwo e mupfumedzanyi wa mulanga muswa.+ O vha mupfumedzanyi u itela uri vhe vha vhidzwa vha kone u wana phaṱhutshedzo dza tshoṱhe dze vha fhulufhedziswa dzone.+ Zwenezwi zwo konadzea nga lufu lwawe, lwe lwa ita uri tshirengululi+ tshi vha vhofholole kha vhutshinyi he vha vhu ita kha mulanga wa kale. 16 Ngauri hune ha vha na mulanga, muthu o itaho mulanga u fanela u fa. 17 Ngauri hu fanela u thoma ha vha na tshine tsha fa* uri mulanga u kone u shuma, samusi u sa shumi arali muiti wawo a tshi kha ḓi tshila. 18 Ndi ngazwo na mulanga wa kale wo thoma u shuma nge ha shululwa malofha. 19 Musi Mushe o no vhudza vhathu vhoṱhe zwoṱhe zwine zwa ambiwa nga Mulayo, o dzhia malofha a mbohwana na a mbudzi na maḓi na labi ḽitswuku na tshimela tsha muhisopo, a shasha bugu* na vhathu vhoṱhe, 20 a ri: “Haya ndi malofha a mulanga we Mudzimu a amba uri ni u vhulunge.”+ 21 O shasha malofha+ kha dennde na kha midzio yoṱhe ine ya shumiselwa u ita mushumo mukhethwa. 22 U ya nga Mulayo, zwithu zwinzhi zwo vha zwi tshi ṱanzwiwa nga malofha.+ Ha sa shululwa malofha, ho vha hu sa hangwelwi.+

23 Ndi ngazwo zwo vha zwo tea uri zwithu zwine zwa fanyisela+ zwithu zwa ṱaḓulu zwi kunakiswe nga yeneyi nḓila,+ fhedzi zwithu zwa ṱaḓulu zwi ṱoḓa zwiṱhavhelo zwi fhiraho zwenezwi. 24 Ngauri Kristo ho ngo dzhena fhethu hukhethwa ho itwaho nga zwanḓa,+ hune ha fanyisela fhethu hukhethwa ha vhukuma,+ fhedzi o dzhena ṱaḓulu,+ uri a vhonale phanḓa ha Mudzimu a tshi itela riṋe.+ 25 Ho ngo dzhena ṱaḓulu uri a dzule a tshi ḓiṋekedzela, u fana na musi tshifhe muhulu a tshi dzhena fhethu hukhethwa ṅwaha muṅwe na muṅwe+ e na malofha a si awe. 26 Arali zwi vhe zwo ralo, o vha a tshi ḓo tea u tambudzwa lunzhi u bva tshee shango ḽa sikwa. Fhedzi o ḓivhonadza luthihi nahone lwa tshoṱhe vhufheloni ha shango,* uri a fhelise tshivhi nga u vha tshiṱhavhelo ene muṋe.+ 27 Samusi vhathu vha tshi fa luthihi nahone lwa tshoṱhe, fhedzi nga murahu ha zwenezwo vha haṱulwa, 28 na Kristo o ḓiṋekedzela luthihi nahone lwa tshoṱhe uri a hwale zwivhi zwa vhanzhi.+ Musi a tshi vhonala lwa vhuvhili, u ḓo vha a songo ḓela u fhelisa tshivhi, fhedzi u ḓo vhonwa nga vhane vha mu ṱoḓa zwi tshi bva mbiluni uri vha tshidzwe.+