Vhurifhi Ha U Thoma Vhu Yaho Kha Vhakorinta

5 Ndo pfa nga ha munna ane a ḓifara luvhi nga zwa vhudzekani*+ na mufumakadzi wa khotsi awe.+ Honoho u ḓifara luvhi nga zwa vhudzekani* hu fhira na ha dzitshaka. 2 Naa ni a ḓihudza ngazwo? A si khwine ni tshi ṱungufhala,+ na bvisa o itaho tshenetsho tshivhi vhukati haṋu?+ 3 Naho ndi siho henefho, ndi humbula nga ha vhuimo haṋu, ndo no haṱula onoyo munna we a ita zwenezwo, u tou nga ndi henefho. 4 Musi no kuvhangana dzinani ḽa Murena washu Yesu, ndi vha ndi na inwi khathihi na maanḓa a Murena washu Yesu, 5 ni fanela u kumedzela onoyo munna kha Saṱhane+ uri hu fheliswe ṱhuṱhuwedzo mmbi ye a i ḓisa tshivhidzoni, uri tshivhidzo tshi dzhie tshivhi nga nḓila yo teaho nga ḓuvha ḽa Murena.+

6 Zwine na zuwa ngazwo a si zwavhuḓi. Naa a ni zwi ḓivhi uri mbiliso ṱhukhu i kukumusa fuḽauru yoṱhe?+ 7 Bvisani fuḽauru ya kale i re na mbiliso, uri ni vhe fuḽauru ntswa i si na mbiliso, samusi Kristo ngwana yashu ya Paseka+ o itwa tshiṱhavhelo.+ 8 Kha vhuṱambo+ vhu tevhelaho ri songo shumisa fuḽauru ya kale i re na mbiliso, ri songo shumisa na mbiliso ya tshivhi na vhuvhi. Fhedzi ri shumise vhurotho vhu si na mbiliso, vhune ha imela u fhulufhedzea na ngoho.

9 Kha vhurifhi hanga ndo ni ṅwalela uri ni litshe u konana na vhane vha ḓifara luvhi nga zwa vhudzekani,* 10 ndo vha ndi sa khou ri ni litshe tshoṱhe u konana na vhane vha ḓifara luvhi nga zwa vhudzekani* vha ḽino shango+ kana vha re na tseḓa, mavemu kana vhane vha gwadamela midzimu ya zwifanyiso. Ngauri no vha ni tshi ḓo tea u pfuluwa fhano shangoni.+ 11 Fhedzi ndi khou ni ṅwalela uri ni litshe u konana+ na wahaṋu ane a ḓifara luvhi nga zwa vhudzekani* kana a re na tseḓa,+ a gwadamelaho midzimu ya zwifanyiso kana ane a semana, tshidakwa+ kana wa ḽivemu,+ ni songo ḽa na muthu o raloho. 12 A si mushumo wanga u haṱula vha re nnḓa ha tshivhidzo. Fhedzi inwi haṱulani vha re tshivhidzoni, 13 Mudzimu u ḓo haṱula vha re nnḓa ha tshivhidzo.+ “Bvisani muvhi vhukati haṋu.”+