Muvhuso Une Wa Ḓo Ḓisa Paradiso

Musi Yesu e kha ḽifhasi, o vhudza vhatevheli vhawe uri vha rabelele Muvhuso wa Mudzimu: “Muvhuso wau u ḓe; zwiné wa funa nga zwi itwe fhano fhasi vhunga zwi tshi itwa ngei ṱaḓulu.” (Mateo 6:9, 10) Nahone nga misi o vha a tshi amba “mafhungo maḓifha a muvhuso wa ṱaḓulu.” (Mateo 4:23) O vhuya o vha a tshi anzela u amba nga Muvhuso u fhira u amba nga tshiṅwe tshithu. Ndi ngani? Ngauri Muvhuso ndi tshishumiswa tshine Mudzimu a ḓo tshi shumisela u piringulula vhuleme vhu itaho uri vhutshilo vhu konḓe ngaurali ṋamusi. Nga Muvhuso, Mudzimu u ḓo ṱuwa a tshi fhelisa dzinndwa, nḓala, vhulwadze, na vhutshinyi, nahone u ḓo ḓisa vhuthihi na mulalo.

Ni a zwi takalela u tshila kha shango ḽo raloho? Arali zwo ralo, ni fanela u vhala heyi bugwana. Ni ḓo guda khayo uri Muvhuso ndi hulumeni, fhedzi u khwine u fhira hulumeni naho u ufhio we wa vhuya wa vhusa vhathu. Ni ḓo vhona na nḓila i nyanyulaho ye Mudzimu a ṱalutshedza ngayo vhashumeli vhawe nga zwiṱuku nga zwiṱuku nga ha ndivho dzawe malugana na Muvhuso. Ni ḓo dovha na vhona nḓila ine Muvhuso wa nga ni thusa ngayo na ṋamusi.

Ni nga ita na u vha mulanda wa Muvhuso wa Mudzimu zwa zwino. Fhedzi musi ni sa athu u nanga ngauralo, ni ḓo fanela u ḓivha zwo engedzeaho nga hawo. Ngauralo ri a ni ṱuṱuwedza u ṱola heyi bugwana. Zwoṱhe zwine ya ḓo ni vhudza nga ha Muvhuso zwo dzhiiwa Bivhilini.

Tsha u thoma, kha ri vhone zwi itaho uri ri ṱoḓe Muvhuso wa Mudzimu ngaurali.

U thomani ha ḓivhazwakale ya muthu, Mudzimu o ita muthu o fhelela a mu vhea paradisoni. Ho vha hu si na ṱhoḓea ya Muvhuso nga tshenetsho tshifhinga.

Naho zwo ralo, Adamu na Eva, vhabebi vhashu vha u thoma, vho thetshelesa Sathane, muruṅwa wa ḽishandukwa. A vha vhudza mazwifhi nga ha Mudzimu a vha ita uri na vhone vha shandukele Mudzimu. Nga zwenezwo vha fanelwa nga u fa, ngauri “mulifho wa zwivhi ndi lufu.”—Vha-Roma 6:23.

Muthu a songo fhelelaho, a re na tshivhi a nga si vhe na vhana vho fhelelaho. Ngauralo vhana vha Adamu vhoṱhe vho bebwa vha songo fhelela, vhe na tshivhi, vha tshi fa.—Vha-Roma 5:12.

U bva tsheetsho, vhathu vho ṱoḓa Muvhuso wa Mudzimu uri u vha thuse u fhola kha samba ḽa tshivhi na lufu. Muvhuso u ḓo ṱanzwa na dzina ḽa Mudzimu mazwifhi e Sathane a ḽi zwifhela ngao.

Yehova Mudzimu o fulufhedzisa uri ho vha hu tshi ḓo bebiwa “mbeu” yo khetheaho (kana ṅwana) u itela u vhofholola vhathu tshivhini. (Genesi 3:15) Heyi “mbeu” yo vha i tshi ḓo vha Khosi ya Muvhuso wa Mudzimu.

O vha a tshi ḓo vha nnyi?

Nga murahu ha miṅwaha ine ya nga vha 2 000 musi Adamu o no tshinya, ho vhuya ha vha na munna a fulufhedzeaho zwihulu a no pfi Abrahamu. Yehova o vhudza Abrahamu uri a ṱuwe muḓini wahawe a yo dzula dzidenndeni shangoni ḽa Palestina.

Abrahamu a ita zwoṱhe zwe Yehova a mu vhudza uri a zwi ite, u katela na tshiṅwe tshithu tshi konḓesaho. Yehova o mu vhudza uri a ite tshidzimu nga Isaka murwa wawe kha aletare.

A si uri Yehova o vha a tshi khou ṱoḓa tshidzimu tsha muthu. Fhedzi o vha a tshi ṱoḓou ḓivha uri Abrahamu u mu funa lungafhani. Abrahamu o vha a tshi vho ṱoḓou vhulaha Isaka musi Yehova a tshi mu dzivhisa.

Nga ṅwambo wa lutendo luhulwane lwa Abrahamu, Yehova o fulufhedzisa u fha vhana vhawe shango ḽa Palestina nahone a ri Mbeu yo fulufhedziswaho yo vha i tshi ḓo ḓa nga muṱa wawe, na wa Isaka murwa wawe.—Genesi 22:17, 18; 26:4, 5, vhambedzani NW.

Isaka o vha e na vharwa vha mafhaṱa, Esau na Yakobo. Yehova o ri Mbeu yo fulufhedziswaho yo vha i tshi ḓo ḓa nga Yakobo.—Genesi 28:13-15, vhambedzani NW.

Yakobo, we Yehova a dovha a mu vhidza Isiraele, o vha na vharwa vha 12, vhe vha fheleledza vhe na vhana vhoṱhe. Ngauralo vhana vha Abrahamu vha thoma u anda.—Genesi 46:8-27.

Ha ri musi hu na nḓala khulu henefho fhethu, Yakobo na muṱa wawe vha pfulutshela Egipita vho rambiwa nga Farao, muvhusi wa Egipita.—Genesi 45:16-20.

Egipita zwa dzumbululwa uri Mbeu yo fulufhedziswaho yo vha i tshi ḓo vha muḓuhulu wa Yuda murwa wa Yakobo.—Genesi 49:10.

Pheleledzoni Yakobo a lovha, nahone vhana vhawe vha vha vhanzhi u swikela vha tshi nga lushaka. Ndi hone Vhaegipita vha tshi vha ofha vha vha ita dziphuli.—Ekisodo 1:7-14.

Nga murahu Yehova a rumela Mushe, munna a fulufhedzeaho zwihulu, u laya uri Farao wa tshenetsho tshifhinga a litshe vhana vha Isiraele vha ṱuwe vho vhofholowa.—Ekisodo 6:10, 11.

Farao a hana, ngauralo Yehova a ḓisela Vhaegipita ṱhamu dza fumi. Kha ṱhamu ya vhufumi, a ruma muruṅwa wa lufu u vhulaha vharwa vhoṱhe vha matanzhe vha Egipita.—Ekisodo, dzindima 7 u ya kha -12.

Mudzimu a vhudza Vhaisiraele uri arali vha nga vhulaha ngwana ya tshilalelo tshavho vha ḓodza maṅwe a malofha ayo kha mihangammbwa yavho, muruṅwa wa lufu o vha a tshi ḓo pfuka nnḓu dzavho. Matanzhe a Vhaisiraele a tshidzwa ngauralo.—Ekisodo 12:1-35.

Nga zwenezwo, Farao a laya uri Vhaisiraele vha bve Egipita. Fhedzi a vho zwi humbula nga iṅwe nḓila a vha pandamedza uri a vha vhuise.

Yehova a vulela Vhaisiraele nḓila ya u ponyoka vhukati ha Lwanzhe Lutswuku. Nahone musi Farao na mmbi dzawe vha tshi lingedza u vha tevhela, vha kumbiwa.—Ekisodo 15:5-21.

Yehova a isa vhana vha Isiraele thavhani i vhidzwaho Sinai sogani. Henengei, a vha fha Mulayo wawe a vha vhudza uri arali vha u tevhedza, vho vha vha tshi ḓo vha muvhuso wa vhotshifhe na lushaka lukhethwa. Ngauralo, nga u ya ha tshifhinga, Vhaisiraele vho vha vhe na tshibuli tsha u vha tshipiḓa tshihulwane tsha Muvhuso wa Mudzimu.—Ekisodo 19:6; 24:3-8.

Musi Vhaisiraele vho no vha Thavhani ya Sinai hu ṱoḓaho u vha ṅwaha, Yehova a vha dededzela Palestina, shango ḽe a vha o fulufhedzisa Abrahamu makhulu wavho.

Palestina, Mudzimu a tendela Vhaisiraele nga murahu vha tshi vhuswa nga mahosi. Nga tshenetshiḽa tshifhinga, Mudzimu o vha na muvhuso kha ḽifhasi.

Khosi ya vhuvhili ya Isiraele yo vha i Davida, muḓuhulu wa Yuda. Davida o kunda maswina oṱhe a Isiraele, nahone a ita Yerusalema wone musanda wa lushaka.

Zwe zwa itea u vhusani ha Davida zwi sumbedza uri arali Yehova a tshi tikedza khosi, a hu na muvhusi wa kha ḽifhasi ane a nga i kunda.

Yehova a ri Mbeu yo fulufhedziswaho yo vha i tshi ḓo vha muṅwe wa vhaḓuhulu vha Davida.—1 Koronika 17:7, 11, 14.

O vhusaho nga murahu ndi Salomo, murwa wa Davida. O vha e khosi yo ṱalifhaho, nahone Isiraele a vha na mvelaphanḓa musi a tshi vhuswa ngae.

Salomo o fhaṱela Yehova thembele yavhuḓi Yerusalema. Zwiimo zwe zwa vha zwi Isiraele fhasi ha u vhusa ha Salomo zwi ri sumbedza dziṅwe dza phaṱhutshedzo dzine Muvhuso wa Mudzimu u no khou ḓa wa ḓo dzi ḓisela vhathu.—1 Dzikhosi 4:24, 25.

Naho zwo ralo, vhunzhi ha mahosi a nga murahu ha Salomo o vha a sa fulufhedzei.

Fhedzi musi vhaḓuhulu vha Davida vha tshi kha ḓi vhusa Yerusalema, Yehova a shumisa Yesaya muporofita wawe u amba nga ha Murwa wa Davida wa tshifhinga tshi ḓaho we a vha a tshi ḓo vhusa ḽifhasi ḽoṱhe nga u fulufhedzea. Hoyu o vha a tshi ḓo vha ene Mbeu yo fulufhedziswaho.—Yesaya 9:5, 6.

Muporofita Yesaya o dzula o amba uri muvhuso Wawe ndi wa vhugala u fhira wa Salomo.—Yesaya, dzindima 11 na 65.

Zwenezwo, vhashumeli vha Mudzimu vha ḓivhudzisa u fhira naho hu lini, uri iyi Mbeu yo vha i tshi ḓo vha nnyi.

Naho zwo ralo, musi Mbeu i sa athu u ḓa, mahosi a Isiraele o vha mavhi lwe nga 607 B.C.E. Yehova a tendela lwonolwo lushaka lu tshi kundiwa nga Vhababele, nahone vhunzhi ha vhathu vha thubelwa Babele. Fhedzi Mudzimu o vha a songo hangwa fulufhedziso ḽawe. Mbeu yo vha i tshi kha ḓi ḓo bvelela muṱani wa Davida.—Hesekiele 21:30-32.

Zwe zwa itea Isiraele zwo sumbedza uri naho khosi i re muthu yo ṱalifhaho, i fulufhedzeaho yo ḓisa zwivhuya, hezwi zwivhuya zwo vha zwi si zwingana. Vhanna vha fulufhedzeaho vha a lovha nahone zwi nga itea vha vha tevhelaho vha si fulufhedzee. Mushonga wo vha u mini? Mbeu yo fulufhedziswaho.

Pheleledzoni, nga murahu ha miṅwaha ya zwigidi, Mbeu ya bvelela. Yo vha i nnyi?

Muruṅwa a bvaho ha Mudzimu o ṋea phindulo kha musidzana a songo vhingwaho wa Muisiraele a no pfi Maria. A mu vhudza uri u ḓo vha na murwa we dzina ḽawe ḽa vha ḽi tshi ḓo vha Yesu. Khezwi zwe muruṅwa a amba:

“Ngauri u ḓo vha muhulwane, u ḓo pfi Murwa wa Wa-Ṱaḓulu-ṱaḓulu; huno Murena Mudzimu u ḓo mu ṋea khuluṋoni ya Davida, khotsi-awe. U ḓo vhusa.”—Luka 1:32, 33.

Ngauralo Yesu o vha a tshi ḓo vha Mbeu yo fulufhedziswaho nahone a fheleledza e Khosi ya Muvhuso wa Mudzimu. Fhedzi ndi ngani Yesu o vha o fhambana na vhanna vha fulufhedzeaho vhe vha tshila phanḓa hawe?

Yesu o bebwa nga vhuṱolo. Mme awe o vha e musidzana, nahone o vha a si na khotsi wa ṋama. Yesu o vha o no tshila ṱaḓulu nahone muyamukhethwa wa Mudzimu, kana nungo dzi shumaho, wo bvisa vhutshilo ha Yesu ṱaḓulu wa vhu isa mbumbeloni ya Maria. Nga zwenezwo, o vha a songo mamela tshivhi tsha Adamu. Yesu ho ngo vhuya a ita tshivhi vhutshiloni hawe hoṱhe.—1 Petro 2:22.

Musi Yesu e na vhukale ha miṅwaha ya 30, a lovhedzwa.

O vhudza vhathu nga ha Muvhuso wa Mudzimu nahone pheleledzoni a ḓiswikisa sa Khosi ya wonoyo Muvhuso.—Mateo 4:23; 21:4-11.

O ita na vhuṱolo vhunzhi.

O fhodza vhalwadze.—Mateo 9:35.

O kanzwa vha re na nḓala nga nḓila ya vhuṱolo.—Mateo 14:14-22.

O ita na u vusa vhafu.—Yohane 11:38-44.

Hovhu vhuṱolo vhu sumbedza zwithu zwine Yesu a ḓo zwi itela vhathu sa Khosi ya Muvhuso wa Mudzimu.

Ni a zwi humbula uri Khosi Davida o vha o ita hani Yerusalema musanda wa muvhuso wawe? Yesu o ṱalutshedza uri Muvhuso wa Mudzimu a u nga vhi kha ḽifhasi, fhedzi u ḓo vha ṱaḓulu. (Yohane 18:36) Ndi ngazwo Muvhuso u tshi vhidzwa “Yerusalema wa ṱaḓulu.”—Vha-Heberu 12:22, 28.

Yesu o sumbedza milayo ine vhane vha ḓo vha vhalanda vha Muvhuso vha ḓo fanela u i tevhedza. Heyi milayo i Bivhilini zwino. Milayo mihulwane kha yoṱhe yo vha i ya uri vhathu vha fanela u funa Mudzimu na u funana.—Mateo 22:37-39.

Yesu o dzumbulula na uri u ḓo vha e si eṱhe a tshi vhusa Muvhusoni wawe. Ho vha hu tshi ḓo vha na vhathu vho nangelwaho u ya ṱaḓulu vha vhusa nae henengei. (Luka 12:32; Yohane 14:3) Vho vha vha tshi ḓo vha vhangana? Ndzumbululo 14:1 i a fhindula: 144 000.

Arali ṱaḓulu hu tshi ya vha 144 000 fhedzi u vhusa na Yesu, vhaṅwe vhathu vha fulufhele mini?

Bivhili i ri: “Vha u ḓo vha vhaṋe vha shango ndi vhavhuya, ndi vhone vha u ḓo dzula khaḽo’ lini na lini.”—Psalme ya 37:29.

Vhane vha ḓo dzula kha ḽifhasi lini na lini vha vhidzwa “dziṅwe nngu.”—Yohane 10:16.

Ngauralo hu na mafulufhelo mavhili. Hu na vha 144 000 vho rambiwaho nga Yehova Mudzimu uri vha ye ṱaḓulu u vhusa na Yesu Kristo. Fhedzi vhaṅwe vha dzimilioni vha na fulufhelo ḽo khwaṱhaho ḽa u tshila kha ḽifhasi lini na lini vhe vhalanda vha Muvhuso wawe.—Ndzumbululo 5:10.

Sathane o vha a tshi vhenga Yesu na u mu pikisa. Musi Yesu o no huwelela miṅwaha miraru na hafu, Sathane a ita uri a fariwe a vhulawe nga u ombelwa kha danda. Ndi ngani Mudzimu o zwi tendela?

Humbulani, nga ṅwambo wa uri ri bva kha Adamu, roṱhe ri a tshinya nahone ro fanelwa nga u fa.—Vha-Roma 6:23.

Humbulani na uri, nga ṅwambo wa nḓila ya vhuṱolo ye Yesu a bebwa ngayo, o vha o fhelela nahone o vha a songo fanelwa nga u fa. Naho zwo ralo, Mudzimu o tendela Sathane u ‘luma Yesu tshirethe,’ u mu vhulaha. Fhedzi Mudzimu o dovha a mu vusela vhutshiloni e muya u sa fi. Samusi o vha a tshi kha ḓi vha na ndugelo ya vhutshilo ho fhelelaho ha muthu, zwino o vha a tshi nga vhu shumisela u phulusa riṋe vhathu kha tshivhi.—Genesi 3:15; Vha-Roma 5:12, 21; Mateo 20:28.

U ri thusa u pfesesa nga vhuḓalo zwine tshidzimu tsha Yesu tsha amba zwone, Bivhili i tshi amba nga zwifanyiso zwa vhuporofita.

Sa tsumbo, ni a zwi humbula uri Yehova o vhudza hani Abrahamu u ita tshidzimu nga murwa wawe, a tshi linga lufuno lwawe?

Zwo vha zwi tshifanyiso tsha vhuporofita tsha tshidzimu tsha Yesu. Zwo sumbedza nḓila ye lufuno lwa Yehova lwa vha lu luhulwane ngayo kha vhathu lwe a tendela Murwa wawe, Yesu, a tshi ri fela uri ri wane vhutshilo.—Yohane 3:16.

Ni a humbula nḓila ye Yehova a vhofholola ngayo Vhaisiraele Egipita a tshidza matanzhe avho nga u ita uri muruṅwa wa lufu a vha pfuke?—Ekisodo 12:12, 13.

Zwo vha zwi tshifanyiso tsha vhuporofita. Samusi malofha a ngwana o amba vhutshilo kha matanzhe a Vhaisiraele, malofha a Yesu o shululwaho a amba vhutshilo kha vha mu tendaho. Nahone samusi zwiitea zwa honovhuḽa vhusiku zwo amba mbofholowo kha Vhaisiraele, lufu lwa Yesu lu ṋea vhathu mbofholowo kha tshivhi na lufu.

Ndi ngazwo Yesu a tshi vhidzwa ‘Ngwana ya Mudzimu i bvisaho tshivhi tsha shango.’—Yohane 1:29.

Naho zwo ralo, musi Yesu e kha ḽifhasi o kuvhanganya na vhafunziwa a vha gudisa u huwelela mafhungo maḓifha a Muvhuso, na nga murahu ha lufu lwawe.—Mateo 10:5; Luka 10:1.

Vho vha vhe vhone vhathu vha u thoma vho nangiwaho nga Mudzimu u vhusa na Yesu Muvhusoni wawe.—Luka 12:32.

Ni a zwi humbula uri Mudzimu o fulufhedzisa Vhayuda uri arali vha vhulunga Mulayo, vho vha vha tshi ḓo vha ‘muvhuso wa vhotshifhe’? Zwino vho vha vhe na tshibuli tsha u vha tshipiḓa tsha Muvhuso wa Mudzimu vha shuma sa vhotshifhe vha ṱaḓulu arali vha ṱanganedze Yesu. Fhedzi vhunzhi havho vho landula Yesu.

Ngauralo u bva tsheetsho, Vhayuda a vho ngo tsha vha lushaka lwa Mudzimu lwo nangiwaho; Palestina a ho ngo tsha vha shango ḽo Fulufhedziswaho.—Mateo 21:43; 23:37, 38.

U bva misini ya Yesu u swika ṋamusi, Yehova o vha a tshi khou ḓi kuvhanganya havha vhane vha ḓo vhusa na Yesu ṱaḓulu. Hu kha ḓi vha na vha zwigidi zwavho zwi si zwingana vhane vha khou tshila kha ḽifhasi ṋamusi. Ri vha vhidza masalela o ḓodzwaho.—Ndzumbululo 12:17.

Zwino, ni khou thoma u zwi vhona zwine Muvhuso wa Mudzimu wa vha zwone. Ndi hulumeni a re ṱaḓulu, Khosi yawo ndi Yesu Kristo, nahone u vhusa na vhathu vha 144 000 vha bvaho kha ḽifhasi. U ḓo vhusa vhathu vha fulufhedzeaho kha ḽifhasi nahone u ḓo vha na maanḓa a u ḓisa mulalo kha ḽifhasi.

Nga murahu ha lufu lwawe, Yesu o vuswa vhafuni a ya ṱaḓulu. E henengei, a lindela uri Mudzimu a mu vhudze musi tsho no vha tshifhinga tsha uri a thome u vhusa sa Khosi ya Muvhuso wa Mudzimu. (Psalme ya 110:1) Zwo vha zwi tshi ḓo vha lini?

Nga zwiṅwe zwifhinga Yehova o vha a tshi rumela vhathu miloro u itela u vha vhudza zwiṅwe zwithu nga ha Muvhuso wawe.

Misini ya Daniele, Yehova o rumela muloro wo raloho kha Nebukadanetsara, khosi ya Babele. Wo vha u wa muri mulapfu.—Daniele 4:10-37.

Muri wa remiwa nahone tshiguthe tsha vhofhiwa miṅwaha ya sumbe.

Muri wo vha u tshi imela Nebukadanetsara. Samusi tshiguthe tsho vhofhiwa miṅwaha ya sumbe, Nebukadanetsara o xelelwa nga ṱhalukanyo yawe miṅwaha ya sumbe. Ṱhalukanyo yawe ya konou vhuelela.

Hezwi zwoṱhe zwo vha zwi tshifanyiso tsha vhuporofita. Nebukadanetsara o vha a tshi fanyisela vhuvhusi ha Yehova ha shango ḽoṱhe. U rangani, ho vha vhu tshi vhusa nga vhaḓuhulu vha Khosi Davida Yerusalema. Musi Babele ḽi tshi kunda Yerusalema nga 607 B.C.E., honoho u tevhekana ha mahosi ha thithiswa. Ho vha hu sa tsha ḓo vhuya ha vha na iṅwe khosi muṱani wa Davida ‘u swikela hu tshi ḓa we zwa mu fanela.’ (Hesekiele 21:32) Onoyo o vha e Yesu Kristo.

Tsho vha tshi tshi ḓo vha tshifhinga tshingafhani u bva nga 607 B.C.E. u swikela Yesu a tshi ḓo thoma u vhusa? Miṅwaha ya sumbe ya vhuporofita. Ndi uri, miṅwaha ya 2 520. (Ndzumbululo 12:6, 14) Nahone miṅwaha ya 2 520 u bva nga 607 B.C.E. i ri ḓisa kha 1914 C.E.

Ngauralo Yesu o thoma u vhusa ṱaḓulu nga 1914. Zwo amba mini?

Bivhili i a ri vhudza nga nḓila ya bono ḽo vhonwaho nga muapostola Yohane.

O vhona musadzi ṱaḓulu a tshi beba ṅwana wa mutuka.—Ndzumbululo 12:1-12.

Musadzi o vha a tshi fanyisela ndangulo ya Mudzimu ya ṱaḓulu, yo vhumbwaho nga vhashumeli vha Mudzimu vha re vharuṅwa ṱaḓulu. Ṅwana wa mutuka u fanyisela Muvhuso wa Mudzimu. Wo ‘bebwa’ nga 1914.

Ha dovha ha itea mini? Tshithu tsha u thoma tshe Yesu a tshi ita e Khosi ho vha u bvisa Sathane ṱaḓulu, na vharuṅwa vhe vha shandukela nae, vha poswa kha ḽifhasi.—Ndzumbululo 12:9.

Bivhili i ri vhudza mvelelo yazwo: “Takalani-ha inwi maṱaḓulu na vho dzulaho hone! Yawee! ḽifhasi na lwanzhe! Ngauri Diabolo o tsela henengeo ha vho inwi e na mbiti khulu, a tshi zwi ḓivha zwauri o salelwa nga tshifhinga tshiṱuku.”—Ndzumbululo 12:12.

Ngauralo musi Yesu a tshi thoma u vhusa ṱaḓulu, maswina awe o vha na mafulufulu mahulu kha ḽifhasi. Samusi Bivhili yo dzula yo zwi amba, o thoma u vhusa vhukati ha maswina awe.—Psalme ya 110:1, 2.

Izwi zwo vha zwi tshi ḓo amba mini nga vhathu?

Yesu o ri vhudza: dzinndwa, dzinḓala, malwadze, na midzinginyo.—Mateo 24:7, 8; Luka 21:10, 11.

Hezwi zwithu ro vhona zwi tshi itea u bva nga 1914, zwine zwa vha tshiṅwe tshiitisi tsha uri ri ḓivhe uri Muvhuso wo thoma u vhusa nga tshenetsho tshifhinga.

Bugu ya Ndzumbululo i ri vhudza uri vhathu vho vha vha tshi ḓo vha vha “tshinyadzaho shango.” (Ndzumbululo 11:18) Ro zwi vhona na zwenezwo, zwihuluhulu u bva nga 1914.

Muapostola Paulo o engedza nga uri vhathu vha ḓo vha “vha funaho hu tshi naka zwavho fhedzi, vhatami vha mali, . . . vhanyadzi vha vhabebi, . . . vha sa vhofhiwi navho’ fhungo ḽa vha hone, vha sá ḓi-vhofhi, vha u sokou penga naḽo’.”—2 Timotheo 3:1-5.

Zwino ni vho zwi ḓivha zwi itaho uri vhutshilo vhu konḓe ngaurali ṋamusi. Sathane u khou shuma nga maanḓa. Fhedzi Muvhuso wa Mudzimu u khou shuma-vho.

Nga murahunyana ha 1914, masalela a vhane vha fulufhela u vhusa na Yesu ṱaḓulu a thoma u amba mafhungo maḓifha a uri Muvhuso wo tikiwa. Hoyu mushumo zwino wo phaḓalala kha ḽifhasi ḽoṱhe, samusi Yesu o ri wo vha u tshi ḓo ralo.—Mateo 24:14.

Ndivho ya uyu mushumo wa u huwelela ndi ifhio?

Ya u thoma, ndi u itela u vhudza vhathu nga ha Muvhuso wa Mudzimu.

Ya vhuvhili, ndi u itela u thusa vhathu u ḓiphethela arali vha tshi funa u vha vhalanda vha Muvhuso.

Yesu o ri misini yashu vhathu vhoṱhe vho vha vha tshi ḓo khethekanywa vha vha vhathu vha ngaho nngu na vha ngaho mbudzi.—Mateo 25:31-46.

“Nngu” dzo vha dzi tshi ḓo vha vha funaho ene na vharathu vhawe. “Mbudzi” dzo vha dzi tshi ḓo vha vha sa vha funiho.

“Nngu” dzi ḓo wana vhutshilo vhu sa fheli nahone “mbudzi” a dzi nga vhu wani.

Hoyu mushumo wa u khethekanya u khou khunyeledzwa nga u huwelelwa ha mafhungo maḓifha a Muvhuso.

Vhuporofita ha muporofita Yesaya ngovhu.

“Vhufheloni ha maḓuvha thavha ya nnḓu ya Yehova i ḓo vha yó dzudzwa ṱaḓulu ha dzithavha, yó vhewa hune ya fhira mivhundu yoṱhe. Ndi hone dzitshakha dzoṱhe dzi tshi ḓo i kuvhanganela.”—Yesaya 2:2.

Vhathu zwino vho livhana na ‘vhufhelo ha maḓuvha.’

“Nnḓu” ya Yehova ya vhurabeli “yó vhewa hune ya fhira” vhutendi ha mazwifhi.

“Mirafho minzhi i ḓo ya hone i tshi ri: Nḓarieni ri gonye ri ye nḓuni ya Mudzimu wa Yakobo, a ri funze nḓila dzawe, uri ri tshimbile nga gondo ḽawe!”—Yesaya 2:3.

Ngauralo, vhanzhi vha bvaho kha tshaka dzoṱhe vha ḓa u rabela Yehova nahone vha ramba vhaṅwe uri vha ṱanganele navho. Vha guda nḓila ya u shuma nga maitele ane Yehova a a funa.

“Vha ḓo dzhia mafumo vha fula malembe ngao’, na dzinthi dzavho vha ḓo dzi ita khwea. A hu nga vhi na lushaka lune lwa ḓo bvela luṅwe lushaka pfumo; a vha tsha ḓo guda u lwa.”—Yesaya 2:4.

Vha rabelaho Yehova vha na vhuthihi nahone vha na mulalo.

Mvelelo ya hoyu mushumo wa Muvhuso wa Mudzimu ndi ya uri zwino hu na vhathu vha dzimilioni nnzhi shango ḽoṱhe vhane vha vha vhalanda vha Muvhuso.

Vho tanga masalela, vho salaho vha vhane fulufhelo ḽavho ḽa vha u ya ṱaḓulu vha vhusa na Kristo.

Vha ṱanganedza zwiḽiwa zwa muya nga ndangulo ya Mudzimu.—Mateo 24:45-47.

Ndi vharathu na vhakomana vha tshaka dzoṱhe vha Vhakriste vha funanaho nangoho.—Yohane 13:35.

Vha ḓiphiṋa nga mulalo wa ngelelo, nga fulufhelo ḽa vhumatshelo.—Vha-Filipi 4:7.

Hu si kale, mafhungo maḓifha a ḓo vha o ḓivhadzwa. “Nngu” dzi ḓo vha dzo kuvhanganywa. Muvhuso wa konou itani?

Ni a zwi humbula uri Khosi Davida a fulufhedzeaho o kunda maswina oṱhe a vhathu vha Mudzimu? Ee, Khosi Yesu u ḓo ita zwenezwo.

Khosi Nebukadanetsara o vhuya a lora tshifanyiso tshihulu tshe tsha fanyisela mivhuso yoṱhe ya shango u bva misini yawe u swikela ṋamusi.

A vhona tombo ḽi tshi bva thavhani ḽa pwashekanya tshifanyiso. Tombo ḽo vha ḽi tshi imela Muvhuso wa Mudzimu.

Hezwi zwi amba u fheliswa ha maitele mavhi a zwithu a re hone.—Daniele 2:44.

Zwiṅwe zwithu zwine Muvhuso wa ḓo zwi wisa ngezwi.

Vhutendi ha mazwifhi vhu ḓo ngalangala, sa guyo ḽi tshi poswa lwanzheni.—Ndzumbululo 18:21.

Ndi ngazwo vhoṱhe vha funaho Mudzimu vha tshi ṱuṱuwedzwa u bva kha vhutendi ha mazwifhi ZWINO.—Ndzumbululo 18:4.

Zwi tevhelaho Khosi Yesu u ḓo ‘dia dzitshaka nahone a dzi lisa nga lubaḓa lwa tsimbi.’—Ndzumbululo 19:15.

Nga zwenezwo, naho Ṱhanzi dza Yehova vha tshi thela mithelo yavho na u tevhedza milayo ya shango, a vha ṱanganeli kha zwa politiki.

Tsha u fhedza, Sathane nga dzawe, “ḽigweṋa” ḽihulu, u kudzwa dindini.—Ndzumbululo 20:2, 3.

Vhane vha ḓo ponyoka haya maṱungu ndi “nngu” fhedzi, vha ḓiṱukufhadzaho kha Yesu sa Khosi.—Mateo 25:31-34, 41, 46.

Muapostola Yohane o vhona bono ḽa “nngu” dzi ponyokaho maṱungu.

“Nda vhona gogo ḽihulu, ḽi sa koni u vhalwa nga muthu, ḽa tshaka na khoro, na mbeu na ndimi dzoṱhe ḽó ima ḽó livhana na khuluṋoni na Ngwana. Vho vha vhó ambara khanzu tshena vhó fara maṱari a mitshevho zwanḓani zwavho.”—Ndzumbululo 7:9.

“Gogo ḽihulu” ḽo vhumbwa nga vhoṱhe vha aravhaho u huwelelwa ha mafhungo maḓifha.

Vha ‘bva maṱunguni mahulu.’—Ndzumbululo 7:14.

“Maṱari a mitshevho” a sumbedza uri vha ṱanganedza Yesu sa Khosi yavho.

U ambara havho “khanzu tshena” hu fanyisela uri vha na lutendo kha tshidzimu tsha Yesu.

“Ngwana” ndi Yesu Kristo.

Vha ḓiphiṋa nga phaṱhutshedzo dzifhio zwenezwo? Ni a humbula dakalo ḽe ḽa vha ḽi Isiraele musi hu tshi khou vhusa Khosi Salomo a fulufhedzeaho? Zwo ita tshifanyiso tshiṱuku tsha dakalo kha ḽifhasi nga fhasi ha Khosi Yesu.

Hu ḓo vha na mulalo wa vhukuma kha vhathu na vhukati ha vhathu na zwipuka, samusi Yesaya o dzula o zwi amba.—Psalme ya 46:9; Yesaya 11:6-9.

Samusi Yesu o fhodza vhalwadze musi e kha ḽifhasi, u ḓo bvisa vhulwadze kha vhathu vhoṱhe.—Yesaya 33:24.

Samusi o kanzwa magogo, u ḓo fhelisa u ṱahela ha zwiḽiwa kha vhathu vhoṱhe.—Psalme ya 72:16.

Samusi o vusa vhafu, u ḓo vusa vhafu vhe vha si vhe na tshifhinga tsho ḓalaho tsha u ḓiṱukufhadza kha Muvhuso wa Mudzimu.—Yohane 5:28, 29.

Nga zwiṱuku nga zwiṱuku u ḓo vhuedzedza vhathu kha u fhelela ho xedzwaho nga Adamu.

A si vhumatshelo vhu takadzaho honoho? Ni a funa u vhu vhona? Arali zwo ralo, ḓidineni uri ni ḓiṱukufhadze kha Muvhuso wa Mudzimu zwino nahone ni vhe muṅwe wa “nngu.”

Gudani Bivhili ni ḓivhe Yehova Mudzimu na Yesu Kristo.—Yohane 17:3.

Ṱanganelani na vhaṅwe vhane na vhone vha vha fhasi ha wonoyo Muvhuso.—Vha-Heberu 10:25.

Gudani milayo ya Muvhuso ni i tevhedze.—Yesaya 2:3, 4.

Ṋekedzani vhutshilo haṋu kha u shumela Yehova, ni lovhedzwe.—Mateo 28:19, 20.

Ilani zwithu zwivhi, zwi ngaho u tswa, u zwifha, vhuyaḓa, na vhudakwa, zwi sa takadzi Yehova Mudzimu.—1 Vha-Korinta 6:9-11.

Ṱanganelani kha u huwelela mafhungo maḓifha a Muvhuso.—Mateo 24:14.

Nga thuso ya Mudzimu, ndi hone ni tshi ḓo vhona Paradiso ye Adamu a i xedzela vhaḓuhulu vhawe i tshi vhuedzedzwa, nahone ni ḓo vhona u ḓadzea ha heḽi fulufhedziso: “Nda pfa ipfi ḽihulu ḽi tshi bva kha khuluṋoni ḽi tshi ri: Asiyo, thumba ya Mudzimu vhukati ha vhathu! Ene u ḓo fhaṱa mushasha vhukati havho, vhone vha vha vhathu vhawe, huno ene nga eṱhé, Mudzimu, u ḓo vha kha vhone, Mudzimu wavho. U ḓo fhuluṱa maṱodzi oṱhe maṱoni avho, lufu a lu tsha ḓo vha hone, na vhuṱungu na zwililo na tshengelo a zwi tsha ḓo vha hone, ngauri zwa kale zwo fhela.”—Ndzumbululo 21:3, 4.

[Chart on page 20]

(For fully formatted text, see publication)

607 B.C.E. 1914 C.E.

B.C.E.  C.E.

500 1 000 1 500 2 000 2 520

[Pictures on page 11]

Abrahamu

Isaka

Yakobo

Yuda

Davida

[Picture on page 14]

144 000

[Pictures on page 16]

Adamu

Yesu