Vhalavhelesi vha Endaho—Vhashumisani na Vhaṅwe kha Mafhungo-ngoho

Tshivhidzoni tsha Vhukriste tsha ḓana ḽa u thoma ḽa miṅwaha, ho vha hu na vhalavhelesi vha endaho vhe vha vha vha tshi dalela zwivhidzo u itela u zwi fhaṱa. Vho vha vha tshi ḓikumedza, vha sa ḓiṱoḓeli bindu, uri vha kone u thusa vha re zwivhidzoni u bvela phanḓa vha tshi tshimbila lwo fanelaho Mudzimu.—Mishumo 11:23, 24; 14:21, 22; 15:32; 20:2, 31-35; Vha-Filipi 2:20-22, 29; 1 Vha-Thesalonika 2:5-12.

Ṋamusi na zwivhidzo zwa Ṱhanzi dza Yehova zwi ṱanganedza zwivhuya zwa vhalavhelesi vha endaho. Havha vhanna vha na miṅwaha minzhi ya tshenzhelo kha mishumo ya u huwelela ya Ṱhanzi dza Yehova nahone vhe vhalavhelesi. Vho ḓivhofholola kha mushumo wa u ḓitshidza na kha vhuḓifhinduleli ha muṱa uri vha ḓiṋekedze kha vhuḓinḓa ha tshifhinga tshoṱhe. Kha vho vhingaho, kanzhi vhafumakadzi vhavho vha ṱanganela na vhanna vhavho kha vhuḓinḓa ha tshifhinga tshoṱhe.

Mulavhelesi wa ḽiisela u laedzwa u ṱhogomela ḽiisela ḽi re na zwivhidzo zwine zwa nga vha 18 u ya kha 25. U dalela tshivhidzo tshiṅwe na tshiṅwe kha ḽeneḽo ḽiisela lune lwa nga lingana luvhili nga ṅwaha nahone nga murahu ha miṅwaha mivhili kana miraru u rumelwa kha ḽiṅwe ḽiisela. Nga nḓila yeneyi zwivhidzo zwi a kona u vhuelwa nga tshenzhelo na vhukoni zwo fhamba-fhambanaho zwa vhalavhelesi vha ḽiisela vho fhambanaho.

Mulavhelesi wa ḽiisela u sedzulusa tshiimo tsha muya tsha tshivhidzo na mushumo watsho. U ṋea tshivhidzo nyambo dzo vhalaho a dovha a ṱangana na vhahulwane na vhashumeli u humbulela nḓila ine vha nga khwinisa ngayo tshumelo yavho kha tshivhidzo.

Vhukati ha vhege ene na mufumakadzi wawe, arali o vhinga, vha tshimbila na Dziṱhanzi dza henefho, vha tshi vha thusa u khwinisa vhuḓinḓa havho ha nnḓu nga nnḓu. Ene na mufumakadzi wawe vha ḓo dalela na vhathu vhane vha kha ḓi bva u takalela uri vha vha khuthadze lutendoni. Ni nga humbela u dalelwa ho raloho.

Mulavhelesi wa tshiṱiriki u na pfaneleo dza muya na vhubvo ha tshenzhelo zwi ngaho zwa o bulwaho afho nṱha. U endela maisela, a tshi a shumela vhege iṅwe na iṅwe malugana na maguvhangano a ḽiisela. Ene na mufumakadzi wawe vha dovha vha shuma kha vhuḓinḓa ha tsimu na Dziṱhanzi dza tshiṅwe tsha zwivhidzo zwa ḽiisela ḽe a ḽi dalela. U lavhelesa ndugiselo dza u fhedza dza progireme ya guvhangano ḽa ḽiisela na u ṋea nyambo dzo vhalaho vhukatini ha guvhangano, u katela na nyambo ya khagala.

Musi vhalavhelesi vha endaho vho no khunyeledza lwendo lwavho kha tshivhidzo kana kha ḽiisela, vha bvela phanḓa u dalela zwiṅwe, vha tshi tevhela maitele mathihi, u swikela musi zwivhidzo zwoṱhe kana maisela oṱhe zwo dalelwa nga miṅwedzi ine ya nga vha rathi; vha konou dovholola nga huswa.

Mashangoni manzhi vhalavhelesi vha endaho vha enda nga moḓoro kana vha shumisa vhuendedzi ha nnyi na nnyi. Kha maṅwe mashango vha nga shumisa baisigiri kana vha tou tshimbila. Sosaithi i a lifha dzitshinyalelo dza mulavhelesi a endaho dza zwa vhuendedzi na u ṋea ene na mufumakadzi wawe tshelede ṱhuku ya zwine vha zwi shaya. Kanzhi mulavhelesi a endaho na mufumakadzi wawe vha ṋewa zwiḽiwa na vhulalo nga miraḓo ya tshivhidzo tshiṅwe na tshiṅwe.

Heyi tshumelo i ṱoḓa muya wa u ḓikumedza. Vhalavhelesi vha endaho na vhafumakadzi vhavho vho ḓiimisela u shumela zwivhidzo vha sa zwi hwedzi muhwalo u ḓuraho.—1 Vha-Thesalonika 2:9.

• Ndivho ya vhalavhelesi vha endaho vha tshivhidzo tsha Vhukriste tsha ḓana ḽa u thoma ḽa miṅwaha yo vha i ifhio?

• Vhalavhelesi vha endaho ṋamusi vho vha vha faneleaho na u wanala u itela uvhu vhuḓinḓa hani?

• Ṱalusani tshumelo ya mulavhelesi wa ḽiisela na wa tshiṱiriki na nḓila ine vha tshila ngayo.

[Picture on page 20]

Mulavhelesi wa tshiṱiriki u amba guvhanganoni ḽa ḽiisela

[Pictures on page 21]

Vhalavhelesi vha ḽiisela vha ṋea ndayo ya u huwelela nnḓu nga nnḓu, vha amba na vhahulwane vha tshivhidzo, vha dalela ngudo ya Bivhili i no khou itwa na vhavhili vho vhinganaho vhane vha kha ḓi bva u takalela, vha amba na tshivhidzo