Ndima ya 18
Itani Uri U Shumela Mudzimu Tshoṱhe Zwi Vhe Ndivho Yaṋu
1, 2. Hu ṱoḓea mini nga nnḓa ha u vha na nḓivho ya Mudzimu?
EDZANI u humbula no ima muṋangoni wo hoṋwaho u dzhenaho nḓuni i re na lupfumo luhulu. Kha ri ri muthu a re mulayoni o ni ṋea khoṋololo nahone a ni vhudza uri ni dzhie naho tshi tshini kha zwenezwo zwithu zwa ndeme. Yeneyo khoṋololo a i nga ni thusi arali na sa i shumisa. Zwi ngaho zwenezwo, ni fanela u shumisa nḓivho arali ni tshi ṱoḓa i tshi ni vhuyedza.
2 Hezwi ndi ngoho vhukuma nga ha nḓivho ya Mudzimu. I ngoho, nḓivho yo teaho ya Yehova Mudzimu na Yesu Kristo i amba vhutshilo vhu sa fheli. (Yohane 17:3) Naho zwo ralo, tshenetsho tshilavhelelwa tshi nga si ḓadziswe fhedzi nga u sokou vha na nḓivho. Samusi no vha ni tshi nga shumisa khoṋololo ya ndeme, ni fanela u shumisa nḓivho ya Mudzimu vhutshiloni haṋu. Yesu o amba uri vhane vha ita zwi funwaho nga Mudzimu vha ḓo ‘dzhena muvhusoni.’ Vhenevho vhathu vha ḓo vha na ndugelo ya u shumela Mudzimu u ya nga hu sa fheli!—Mateo 7:21; 1 Yohane 2:17.
3. Ndi mini zwine Mudzimu a funa ri tshi zwi ita?
3 Musi no no guda zwine Mudzimu a zwi funa, ndi zwa ndeme u zwi ita. Ni humbula uri Mudzimu u funa ni tshi ita mini? Zwi nga nweledzwa zwavhuḓi nga haya maipfi: Edzisani Yesu. Petro ya U Thoma 2:21 i a ri vhudza: “No vhidzelwa hone u konḓelela, ngauri na Kristo o shengedzelwa inwi. O sia ó ni edzisela, uri ni ḓo tevhela ṋayo dzawe.” Nga zwenezwo, u ita zwi funwaho nga Mudzimu, ni fanela u tevhela tsumbo ya Yesu nga vhuronwane. Heyo ndi nḓila ine na shumisa ngayo nḓivho ya Mudzimu.
NḒILA YE YESU A SHUMISA NGAYO NḒIVHO YA MUDZIMU
4. Ndi ngani Yesu a tshi ḓivha zwinzhi nga u rali nga ha Yehova, nahone yeneyi nḓivho o i shumisa hani?
4 Yesu Kristo u ḓivhesa Mudzimu nga maanḓa u fhira naho e nnyi. O tshila nahone a shuma na Yehova Mudzimu ṱaḓulu miṅwaha minzhi musi a sa athu ḓa kha ḽifhasi. (Vha-Kolosa 1:15, 16) Nahone Yesu o ita mini nga yeneyo nḓivho yoṱhe? O vha a sa fushei fhedzi nga u sokou vha nayo. Yesu o tshila u tendelana nayo. Ndi ngazwo o vha e na vhulenda, a sa fheli mbilu, nahone e na lufuno musi a tshi tshilisana na vhathu ngae. Nga zwenezwo Yesu o vha a tshi khou edzisa Khotsi awe wa ṱaḓulu nahone a tshi khou ita zwithu u tendelana na nḓivho yawe ya nḓila dza Yehova na vhumuthu hawe.—Yohane 8:23, 28, 29, 38; 1 Yohane 4:8.
5. Ndi ngani Yesu o lovhedzwa, nahone o tshila hani u tendelana na zwine ndovhedzo yawe ya amba zwone?
5 Nḓivho ye Yesu a vha e nayo yo ita uri a dzhie vhukando ha ndeme vhukuma. O bva Galilea a ya Mulamboni wa Yorodane, he Yohane a mu lovhedza hone. (Mateo 3:13-15) Ndovhedzo ya Yesu yo fanyisela mini? Sa Muyuda, o bebwa lushakani lwo ḓiṋekedzaho kha Mudzimu. Nga zwenezwo, Yesu o vha o ḓiṋekedza u bva u bebwani. (Ekisodo 19:5, 6) Nga u ya u lovhedzwa, o vha a tshi khou ḓiṋekedzela kha Yehova uri a ite zwi funwaho nga Mudzimu nga tshenetsho tshifhinga. (Vha-Heberu 10:5, 7) Nahone Yesu o tshila u tendelana na zwe ndovhedzo yawe ya vha i tshi amba zwone. O ita vhuḓidini vhuhulwane tshumeloni ya Yehova, a tshi vhudza vhathu nḓivho ya Mudzimu nga tshibuli tshiṅwe na tshiṅwe. Yesu o takalela u ita zwi funwaho nga Mudzimu, a tshi amba na uri zwenezwi zwo vha zwi tshi nga zwiḽiwa khae.—Yohane 4:34.
6. Yesu o ḓilandula nga nḓila-ḓe?
6 Yesu o ṱhogomela vhukuma uri u ita zwine Yehova a zwi funa zwo vha zwi tshi ḓo ṱoḓa zwinzhi—uri zwo vha zwi tshi ḓo ita na u mu vhulahisa. Naho zwo ralo, Yesu o ḓilandula, a tshi ita uri ṱhoḓea dzawe dzi ḓe nga murahu. U ita zwine Mudzimu a zwi funa kanzhi zwo ḓa u thoma. Nga zwenezwo, ri nga tevhela hani tsumbo ya Yesu yo fhelelaho?
VHUKANDO VHU ISAHO VHUTSHILONI VHU SA FHELI
7. Muthu u fanela u dzhia vhuṅwe vhukando vhufhio u itela uri a fanelee u lovhedzwa?
7 U fhambana na Yesu, a ro ngo fhelela nahone ri nga swikelela fhedzi vhuimo vhuhulwane ha ndovhedzo musi ro no dzhia vhuṅwe vhukando ha ndeme. Hezwi zwi thoma nga u dzhenisa nḓivho ya Yehova Mudzimu na Yesu Kristo mbiluni dzashu. U ita hezwi zwi ita uri ri vhe na lutendo na uri ri fune Mudzimu nga ho dzikaho. (Mateo 22:37-40; Vha-Roma 10:17; Vha-Heberu 11:6) U tendelana na milayo ya Mudzimu, maitele, na zwilinganyo zwi fanela u ri sudzulusela u rembuluwa, ri tshi ḓisolela zwivhi zwashu zwa kale nga u ofha Mudzimu. Hezwi zwi isa kha u shanduka, ndi uri, u rembuluwa nahone ra ṱutshela buḓo naho ḽi ḽifhio ḽo khakheaho ḽe ra ḽi tevhela musi ri si na nḓivho ya Mudzimu. (Mishumo 3:19) Nga ho ḓoweleaho, arali ri tshi kha ḓi ita tshiṅwe tshivhi tshiphirini nṱhani ha u ita zwo lugaho, vhukuma a ro ngo rembuluwa, nahone a ro ngo fhura Mudzimu. Yehova u vhona muhoyo woṱhe.—Luka 12:2, 3.
8. Ni fanela u dzhia vhukando vhufhio musi ni tshi tama u ṱanganela kha mushumo wa u huwelela Muvhuso?
8 Samusi zwino ni tshi khou guda nḓivho ya Mudzimu, naa a zwo ngo tea uri ni ṱhogomele mafhungo a muya nga dzaṋu? Khamusi ni khou fhisetshela u vhudza mashaka aṋu, dzikhonani, na vhaṅwe zwine na khou zwi guda. Zwi re zwone ndi uri ni nga kha ḓi vha no vha ni tshi khou ita zwenezwi, samusi na Yesu o vhudza vhaṅwe mafhungo maḓifha nga hu songo dzudzanywaho. (Luka 10:38, 39; Yohane 4:6-15) Zwino ni nga ṱoḓa u ita zwo engedzeaho. Vhahulwane vha Vhakriste vha ḓo takalela u amba na inwi u itela u vhona arali ni tshi fanelea nahone ni tshi kona u ṱanganela kha mushumo wa u huwelela Muvhuso wa misi yoṱhe wa Ṱhanzi dza Yehova. Arali ni tshi fanelea, vhahulwane vha ḓo ita nzudzanyo dza uri ni ye vhuḓinḓani na iṅwe Ṱhanzi. Vhafunziwa vha Yesu vho tevhela ndaela dzawe u itela u vuledza vhuḓinḓa havho nga nḓila yo dzudzanyeaho. (Marko 6:7, 30; Luka 10:1) Ni ḓo vhuyelwa nga thuso i fanaho na yeneyo musi ni tshi ṱanganela kha u phaḓaladza mulaedza wa Muvhuso nnḓu nga nnḓu na nga dziṅwe nḓila.—Mishumo 20:20, 21.
9. Muthu u ḓiṋekedza hani kha Mudzimu, nahone u ḓiṋekedza hu kwama hani vhutshilo ha onoyo muthu?
9 U huwelela mafhungo maḓifha kha mifuda yoṱhe ya vhathu tsimuni ya tshivhidzo ndi nḓila ya u wana vho lugaho nahone ndi muṅwe wa mishumo yavhuḓi ya u sumbedza uri ni na lutendo. (Mishumo 10:34, 35; Yakobo 2:17, 18, 26) U ya miṱanganoni ya Vhukriste misi yoṱhe na u ṱanganela nga vhuḓalo mushumoni wa u huwelela na dzone ndi nḓila dza u sumbedza uri no shanduka na rembuluwa nahone zwino no ḓiimisela u tshila u tendelana na nḓivho ya Mudzimu. Naa vhukando vhu pfalaho vhu tevhelaho ndi vhufhio? Ndi u ḓiṋekedza kha Yehova Mudzimu. Hezwi zwi amba uri nga thabelo i bvaho mbiluni, ni vhudza Mudzimu uri nga u ḓiimisela na nga mbilu yoṱhe ni khou ṋekedza vhutshilo haṋu khae u ita zwine a zwi funa. Heyi ndi nḓila ya u ḓiṋekedza kha Yehova na u ṱanganedza dzhogo ya vhulenda ya Yesu Kristo.—Mateo 11:29, 30.
NDOVHEDZO —ZWINE YA AMBA ZWONE KHA INWI
10. Ndi ngani ni tshi fanela u lovhedzwa musi no no ḓiṋekedza kha Yehova?
10 U ya nga Yesu, vhoṱhe vhane vha vha vhafunziwa vhawe vha fanela u lovhedzwa. (Mateo 28:19, 20) Ndi ngani izwi zwi zwa ndeme musi no no ḓiṋekedza kha Mudzimu? Samusi no ḓiṋekedza kha Yehova, u a zwi ḓivha uri ni a mu funa. Fhedzi a zwi timatimisi uri ni ḓo ṱoḓa u dzhia vhukando u itela uri vhaṅwe vha ḓivhe nga ha uri Mudzimu ni a mu funa. Ee, ndovhedzo i ni ṋea tshibuli tsha uri ni ḓivhadze khagala u ḓiṋekedza haṋu kha Yehova Mudzimu.—Vha-Roma 10:9, 10.
11. Ndovhedzo i amba mini?
11 Ndovhedzo i fanyisela zwinzhi. Musi ni tshi mbwandamedzwa, kana u “vhulungwa,” maḓini, zwi nga no fa kha buḓo ḽaṋu ḽa vhutshilo ha kale. Musi ni tshi bva maḓini, zwi nga ni khou bvela vhutshiloni vhuswa, vhu langiwaho nga zwi funwaho nga Mudzimu hu si zwine inwi na funa. Vhukuma, hezwo a zwi ambi uri a ni tsha ḓo ita vhukhakhi, ngauri roṱhe a ro ngo fhelela nahone nga zwenezwo ri a tshinya ḓuvha ḽiṅwe na ḽiṅwe. Naho zwo ralo, sa mushumeli wa Yehova o ḓiṋekedzaho, o lovhedzwaho, ni ḓo vha no dzhena kha vhushaka ho khetheaho nae. Nga ṅwambo wa uri no rembuluwa nahone na lovhedzwa nga u ḓiṱukufhadza, Yehova o ḓiimisela u ni hangwela zwivhi zwaṋu nga mutheo wa tshiṱhavhelo tsha Yesu tshi rengululaho. Nga zwenezwo ndovhedzo i ita uri ni vhe na luvalo lwo kunaho phanḓa ha Mudzimu.—1 Petro 3:21.
12. Zwi amba mini u lovhedzwa (a) “dzinani ḽa Khotsi”? (b) ‘dzinani ḽa Murwa’? (c) ‘dzinani ḽa muyamukhethwa’?
12 Yesu o laedza vhatevheli vhawe uri vha lovhedze vhafunziwa vhaswa “dzinani ḽa Khotsi na ḽa Murwa na ḽa Muyamukhethwa.” (Mateo 28:19) Yesu o vha a tshi khou amba mini? U lovhedzwa “dzinani ḽa Khotsi” zwi sumbedza uri muthu ane a khou lovhedzwa u ṱanganedza nga mbilu yoṱhe Yehova Mudzimu sa Musiki na Muvhusi wa fhethu hoṱhe o fanelaho. (Psalme ya 36:9; 83:18; Muhuweleli 12:1) U lovhedzwa ‘dzinani ḽa Murwa’ zwi amba uri muthu u ṱhogomela Yesu Kristo—nahone zwihuluhulu tshiṱhavhelo Tshawe tshi rengululaho—sa yone nḓila i yoṱhe ya u tshidzwa yo lugiselelwaho nga Mudzimu. (Mishumo 4:12) U lovhedzwa ‘dzinani ḽa muyamukhethwa’ zwi amba uri muthu ane a khou lovhedzwa u ṱhogomela muyamukhethwa wa Yehova, kana maanḓa a shumaho, sa tshishumiswa tsha Mudzimu tsha u khunyeledza ndivho Dzawe na tsha u ṋea vhashumeli Vhawe maanḓa u itela uri vha ite zwo lugaho zwine A zwi funa u tendelana na ndangulo Yawe i livhiswaho nga muya.—Genesi 1:2; Psalme ya 104:30; Yohane 14:26; 2 Petro 1:21.
NAA NO LUGELA U LOVHEDZWA?
13, 14. Ndi ngani ri songo fanela u ofha u khetha u shumela Yehova Mudzimu?
13 Samusi u lovhedzwa zwi tshi amba zwinzhi vhukuma nahone vhu vhuimo vhu swayeaho vhukuma vhutshiloni ha muthu, naa ndi vhukando vhune na fanela u vhu ofha? Na kathihi! Naho phetho ya u lovhedzwa i songo fanela u nyadziwa, nga hu sa timatimisi ndi vhuṱali vhukuma uri ni i ite.
14 U lovhedzwa zwi ṋea vhuṱanzi ha khetho yaṋu ya u shumela Yehova Mudzimu. Humbulani nga ha vhathu vhane na vha ḓivha. Nga nḓila dzo fhamba-fhambanaho, naa muṅwe na muṅwe wavho ha khou shumela muṋe? Vhaṅwe vha shumela lupfumo. (Mateo 6:24) Vhaṅwe vha fhisetshela nga maanḓa mishumo yavho ya u ḓitshidza kana vha a ḓishumela nga lwa tseḓa nga u ita uri u fusha lutamo lwavho zwi vhe zwithu zwihulwane vhutshiloni havho. Vhaṅwe vha shumela midzimu ya mazwifhi. Fhedzi no khetha u shumela Yehova, Mudzimu wa ngoho. A hu na muṅwe ane a vha na vhulenda vhungafha, u pfela vhuṱungu hungafha, na lufuno lungafha. Mudzimu u hulisa vhathu nga u vha ṋea mushumo u re na ndivho u vha isaho u tshidzwani. Nahone u ṋea vhashumeli vhawe malamba a vhutshilo vhu sa fheli. Vhukuma, u tevhela tsumbo ya Yesu na u ṋekedza vhutshilo haṋu kha Yehova a zwi ofhisi. Vhukuma, ndi zwone zwi takadzaho Mudzimu nahone zwi a pfala nga maanḓa.—1 Dzikhosi 18:21.
15. Ndi zwifhio zwiṅwe zwikundisi zwo ḓoweleaho zwa ndovhedzo?
15 Naho zwo ralo, u lovhedzwa a si vhukando vhune ha fanela u dzhiiwa nga u tou kombetshedzwa. Ndi mafhungo aṋu na Yehova. (Vha-Galata 6:4) Samusi no bvela phanḓa muyani, ni nga ḓi vha no ḓivhudzisa uri: “Tshi dzivhisaho ndi tshi lovhedzwa tshi nga vha mini?” (Mishumo 8:35, 36) Ni nga ḓivhudzisa uri, ‘Naa u pikiswa nga vha muṱani zwi khou nthivhela? Naa ndi kha ḓi ita zwiṅwe zwithu zwi sa tendelani na maṅwalo kana tshivhi? Kana zwi nga vha hu uri ndi khou ofha uri vhathu vha ḓo mmbenga?’ Hedzi ndi dziṅwe mbuno dzine dza fanela u ṱhogomelwa, fhedzi humbulani nga hadzo nga hu pfalaho.
16. Ni ḓo vhuyelwa hani nga u shumela Yehova?
16 A zwi pfali u humbula nga ha vhuleme u sa ṱhogomeli zwivhuya zwa u shumela Yehova. Sa tsumbo, ṱhogomelani mafhungo a u pikiswa nga muṱa. Yesu o fulufhedzisa uri naho vhafunziwa vhawe vha xelelwa nga mashaka nga ṅwambo wa u mu tevhela, vho vha vha tshi ḓo wana muṱa muhulwane wa muya. (Marko 10:29, 30) Vhenevha vhatendi nga inwi vha ḓo ni funa nga lufuno lwa vhurathu na vhukomana, vha ni thusa u konḓelela u tovholwa, nahone vha ni tikedza nḓilani i yaho vhutshiloni. (1 Petro 5:9) Zwihuluhulu vhahulwane vha tshivhidzo vha nga ni thusa uri ni sedzane na vhuleme nahone ni kunde dziṅwe khaedu nga hu bvelelaho. (Yakobo 5:14-16) Malugana na u vhengwa nga ḽino shango, ni nga ḓivhudzisa zwo tea uri, ‘Ndi mini zwine zwa nga vhambedzwa na u ṱanganedzwa nga Musiki wa fhethu hoṱhe, zwi tshi ita uri a takalele buḓo ḽanga ḽa vhutshilo ḽe nda ḽi khetha?’—Mirero 27:11.
U TSHILA U TENDELANA NA U ḒIṊEKEDZA NA NDOVHEDZO YAṊU
17. Ndi ngani ni tshi fanela u dzhia u lovhedzwa sa mathomo nṱhani ha magumo?
17 Ndi zwa ndeme u humbula uri ndovhedzo a si magumo a mvelaphanḓa yaṋu ya muya. Zwi swaya u thoma u shumela Mudzimu vhutshilo hoṱhe sa muḓinḓa o nangiwaho na muṅwe wa Ṱhanzi dza Yehova. Naho u lovhedzwa zwi zwa ndeme vhukuma, a zwi themendeli u tshidzwa. Yesu ho ngo ri: ‘Muṅwe na muṅwe a lovhedzwaho u ḓo tshidzwa.’ Nṱhani hazwo, o ri: “Ane a ḓo konḓelela u swika vhufheloni ndi ene ane a ḓo tshidzwa.” (Mateo 24:13) Nga zwenezwo, ndi zwa ndeme uri ni ṱoḓe Muvhuso wa Mudzimu u thoma nga u u ita tshithu tsha ndeme vhukuma vhutshiloni haṋu.—Mateo 6:25-34.
18. Nga murahu ha ndovhedzo, ndi zwifhio zwiṅwe zwipikwa zwine zwa fanela u tovholwa?
18 U itela uri ni konḓelele musi ni tshi shumela Yehova, ni ḓo ṱoḓa u ḓivhetshela zwipikwa zwa muya. Tshiṅwe tshipikwa tsha ndeme ndi u engedza nḓivho yaṋu ya Mudzimu nga u ḓigudisa Ipfi ḽawe misi yoṱhe. Dzudzanyani u vhala Bivhili ḓuvha ḽiṅwe na ḽiṅwe. (Psalme ya 1:1, 2) Iyani miṱanganoni ya Vhukriste misi yoṱhe, ngauri vhukonani vhune na vhu wana henefho vhu ḓo thusa u ni ṋea nungo dza muya. Nga dzaṋu, ndi ngani ni sa ḓivhetsheli tshipikwa tsha u fhindula miṱanganoni ya tshivhidzo nahone nga zwenezwo na renda Yehova na u fhaṱa vhaṅwe? (Vha-Roma 1:11, 12) Tshiṅwe tshipikwa tshi nga vha u khwinisa thabelo dzaṋu.—Luka 11:2-4.
19. Ndi dzifhio pfaneleo dzine muyamukhethwa wa nga ni thusa uri ni dzi sumbedze?
19 Arali ni tshi ṱoḓa u tshila u tendelana na zwine ndovhedzo yaṋu ya amba zwone, ni fanela u dzula ni tshi ṱhogomela zwine na ita, ni tshi tendela muyamukhethwa wa Mudzimu u tshi bveledza kha inwi pfaneleo dzi ngaho lufuno, dakalo, mulalo, u sa fhela mbilu, vhulenda, vhuthu, lutendo, u vuḓa, na u konḓelela. (Vha-Galata 5:22, 23; 2 Petro 3:11) Humbulani uri Yehova u ṋea muyamukhethwa vhoṱhe vhane vha u humbela na u mu thetshelesa sa vhashumeli vhawe vha fulufhedzeaho. (Luka 11:13; Mishumo 5:32) Ngauralo rabelani Mudzimu uri a ni ṋee muya wawe nahone ni mu humbele uri a ni thuse u sumbedza pfaneleo dzine dza mu takadza. Dzenedzo pfaneleo dzi ḓo vhonala zwavhuḓi kha maambele na u ḓifara haṋu musi ni tshi tendela u ṱuṱuwedzwa nga muya wa Mudzimu. Vhukuma, muthu muṅwe na muṅwe tshivhidzoni tsha Vhukriste u khou lwela u bveledza “muthu muswa” u itela uri a fane vhukuma na Kristo. (Vha-Kolosa 3:9-14) Muṅwe na muṅwe washu u sedzana na khaedu dzo fhamba-fhambanaho kha u ita zwenezwi nga ṅwambo wa uri ri vhuimoni ho fhamba-fhambanaho ha u bvela phanḓa muyani. Samusi ni songo fhelela, ni fanela u shuma vhukuma u itela uri ni vhe na vhumuthu vhu ngaho ha Kristo. Fhedzi ni songo vhuya na fulufhuwa malugana na zwenezwi, ngauri zwi a konadzea nga thuso ya Mudzimu.
20. Ni nga edzisa Yesu vhuḓinḓani nga nḓila dzifhio?
20 Tshiṅwe tsha zwipikwa zwaṋu zwa muya tshi fanela u vha tshipikwa tsha u edzisa nga vhuronwane tsumbo ya Yesu ya dakalo. (Vha-Heberu 12:1-3) O vha a tshi funa vhuḓinḓa. Arali ni na ndugelo ya u ṱanganela mushumoni wa u huwelela Muvhuso, nga zwenezwo, ni songo tenda zwi tshi sokou vha mushumo zwawo. Lwelani u fushea nga u funza vhaṅwe nga ha Muvhuso wa Mudzimu u fana na Yesu. Shumisani ndaela dzi ṋekedzwaho nga tshivhidzo u itela u ni thusa uri ni khwinise sa mugudisi. Nahone ivhani na vhungoho ha uri Yehova a nga ni ṋea nungo dza u vuledza vhuḓinḓa haṋu.—1 Vha-Korinta 9:19-23.
21. (a) Ri zwi ḓivha hani uri Yehova u dzhiela nṱha vhathu vho lovhedzwaho vha fulufhedzeaho? (b) Ndi mini tshi sumbedzaho uri ndovhedzo ndi ya ndeme u itela uri ri ponyoke musi Mudzimu a tshi haṱula ano maitele mavhi a zwithu?
21 Muthu o ḓiṋekedzaho, o lovhedzwaho ane nga u fulufhedzea a khou lwela u tevhela Yesu o khethea kha Mudzimu. Yehova u ṱolisisa mbilu dzoṱhe dza zwigidi zwa dzimilioni nahone u a ḓivha uri vhathu vho raloho a vha sokou wanala. U vha dzhia vhe lupfumo, “madzanga.” (Hagai 2:7) Vhuporofita ha Bivhili vhu sumbedza uri Mudzimu u dzhia vhenevho vhathu sa vho swayelwaho u ponyoka khaṱulo ine hu si kale ya ḓo ḓela ano maitele mavhi a zwithu. (Hesekiele 9:1-6; Maleaxi 3:16, 18) Naa no “vhetshelwa vhutshilo vhu sá fheli”? (Mishumo 13:48) Naa ni a tama vhukuma u swaiwa sa muṅwe a shumelaho Mudzimu? U ḓiṋekedza na ndovhedzo ndi tshipiḓa tsha lwonolwo luswayo, nahone ndi zwa ndeme u itela u tshidzwa.
22. Vha “gogo ḽihulu” vha nga vha na zwilavhelelwa zwifhio?
22 Nga murahu ha Maḓi Mahulu a khungulu yoṱhe, Noaxe na muṱa wawe vho bva gungwani vha dzula ḽifhasini ḽo kunakiswaho. Nga hu fanaho ṋamusi, vha “gogo ḽihulu” vhane vha shumisa nḓivho ya Mudzimu vhutshiloni havho nahone vha wana thendelo ya Yehova vha na tshilavhelelwa tsha u ponyoka vhufhelo ha ano maitele mavhi a zwithu na u ḓiphina nga vhutshilo vhu sa fheli ḽifhasini ḽo kunakiswaho tshoṱhe. (Ndzumbululo 7:9, 14) Honoho vhutshilo vhu ḓo tou vha hani?
LINGANI NḒIVHO YAṊU
Yehova u ṱoḓa ni tshi shumisa hani nḓivho yaṋu nga hae?
Ndi vhufhio vhuṅwe vhukando vhu isaho ndovhedzoni?
Ndi ngani ndovhedzo i si magumo, fhedzi i mathomo?
Ri nga tshila hani u tendelana na u ḓiṋekedza na ndovhedzo yashu?
[Picture on page 172]
Naa no no ḓiṋekedza kha Mudzimu nga thabelo?
[Picture on page 174]
Ndi mini tshi ni thivhelaho uri ni lovhedzwe?