Ngudo 2

Mudzimu Ndi Nnyi?

Mudzimu wa ngoho ndi nnyi, nahone dzina ḽawe ndi nnyi? (1, 2)

U na muvhili wa mufuda-ḓe? (3)

Pfaneleo dzawe khulwane ndi dzifhio? (4)

Naa ri nga shumisa zwifanyiso na zwiga musi ri tshi mu rabela? (5)

Ndi dzifhio nḓila mbili dzine ngadzo ra nga guda nga ha Mudzimu? (6)

1. Vhathu vha gwadamela zwithu zwinzhi. Fhedzi Bivhili i ri vhudza uri hu na Mudzimu muthihi fhedzi wa NGOHO. O sika zwoṱhe zwi re ṱaḓulu na kha ḽifhasi. Nge a ri ṋea vhutshilo, ndi Ene e eṱhe ane ra fanela u mu gwadamela.—1 Vha-Korinta 8:5, 6; Ndzumbululo 4:11.

2. Mudzimu u na madzina manzhi, fhedzi u na dzina ḽithihi fhedzi. Ḽeneḽo dzina ndi YEHOVA. Bivhilini nnzhi, dzina ḽa Mudzimu ḽo bviswa nahone vhudzuloni haḽo ha ṅwalwa madzina MURENA kana MUDZIMU. Fhedzi musi hu tshi ṅwaliwa Bivhili, dzina ḽi no ri Yehova ḽo bvelela khayo lu ṱoḓaho u vha 7 000!—Ekisodo 3:15; Psalme ya 83:18.

3. Yehova u na muvhili, fhedzi a u ngi washu. Bivhili i ri: “Mudzimu ndi muya.” (Yohane 4:24) Muya ndi tshivhumbeo tsha vhutshilo vhune ha fhira hashu. A hu na muthu we a vhuya a vhona Mudzimu. Yehova u dzula ṱaḓulu, fhedzi u a kona u vhona zwithu zwoṱhe. (Psalme ya 11:4, 5; Yohane 1:18) Naho zwo ralo, muyamukhethwa ndi mini? A si muthu u fana na Mudzimu. Nṱhani hazwo, ndi maanḓa a Mudzimu a shumaho.—Psalme ya 104:30.

4. Bivhili i ri dzumbululela vhumuthu ha Yehova. I sumbedza uri pfaneleo dzawe khulwane ndi lufuno, khaṱulokwayo, vhuṱali, na maanḓa. (Doiteronomio 32:4; Yobo 12:13; Yesaya 40:26; 1 Yohane 4:8) Bivhili i ri vhudza uri u dovha a vha na tshilidzi, vhuhwavho, u a hangwela, u na mafunda, nahone ha fheli mbilu. Riṋe, u fana na vhana vha thetshelesaho, ri fanela u lingedza u mu edzisa.—Vha-Efesa 5:1, 2.

5. Naa ri nga gwadamela kana ra rabela zwifanyiso, kana zwiga vhurerelini hashu? Hai! (Ekisodo 20:4, 5) Yehova u ri ri fanela u gwadamela ene fhedzi. Ha ṱoḓi vhugala hawe vhu tshi ṋewa muṅwe kana tshiṅwe tshithu. Zwifanyiso a zwi na maanḓa a u ri thusa.—Psalme ya 115:4-8; Yesaya 42:8.

6. Ri nga ḓivha hani Mudzimu zwavhuḓi? Iṅwe nḓila ndi nga u sedza zwithu zwe a zwi sika na u humbula nga ho dzikaho nga ha zwine zwa ri vhudza zwone. Tsiko ya Mudzimu i ri vhudza uri u na maanḓa mahulwane na vhuṱali vhuhulwane. Ri vhona lufuno lwawe kha zwoṱhe zwe a zwi ita. (Psalme ya 19:1-6; Vha-Roma 1:20) Iṅwe nḓila ine ra nga guda ngayo nga ha Mudzimu ndi nga u guda Bivhili. Khayo u ri vhudza zwinzhi nga ha uri u Mudzimu-ḓe. U dovha a ri vhudza nga ha ndivho yawe na zwine a ṱoḓa ri tshi zwi ita.—Amosi 3:7; 2 Timotheo 3:16, 17.

[Pictures on page 5]

Ri guda nga ha Mudzimu kha tsiko na Bivhilini