Ngudo 6
Muvhuso wa Mudzimu Ndi Mini?
Muvhuso wa Mudzimu u ngafhi? (1)
Khosi yawo ndi nnyi? (2)
Naa vhaṅwe vha a ṱanganela kha u vhusa na yeneyo Khosi? Arali zwo ralo, ndi vhangana? (3)
Ndi mini zwi sumbedzaho uri ri khou tshila maḓuvhani a vhufhelo? (4)
Muvhuso wa Mudzimu u ḓo itela mini vhathu tshifhingani tshi ḓaho? (5-7)
1. Musi e kha ḽifhasi, Yesu o funza vhafunziwa vhawe u rabelela Muvhuso wa Mudzimu. Muvhuso ndi hulumeni u rangwaho phanḓa nga khosi. Muvhuso wa Mudzimu ndi hulumeni wo khetheaho. Wo tikwa ṱaḓulu nahone u ḓo vhusa ḽifhasi. U ḓo khetha dzina ḽa Mudzimu. U ḓo ita uri zwine Mudzimu a funa zwi itwe kha ḽifhasi samusi zwi tshi itwa ngei ṱaḓulu.—Mateo 6:9, 10.
2. Mudzimu o fulufhedzisa uri Yesu o vha a tshi ḓo vha Khosi ya Muvhuso Wawe. (Luka 1:30-33) Musi Yesu e kha ḽifhasi, o sumbedza uri o vha a tshi ḓo vha Muvhusi wa vhuhwavho, o lugaho, na o fhelelaho. Musi a tshi vhuyelela ṱaḓulu, ho ngo vhewa khuluṋonini sa Khosi ya Muvhuso wa Mudzimu nga tshenetsho tshifhinga. (Vha-Heberu 10:12, 13) Nga 1914, Yehova o ṋea Yesu maanḓa e A vha o mu fulufhedzisa one. U bva nga tshenetsho tshifhinga, Yesu o vhusa e ṱaḓulu sa Khosi yo vhewaho nga Yehova.—Daniele 7:13, 14.
3. Yehova o ita na u nanga vhaṅwe vhanna na vhafumakadzi vha fulufhedzeaho fhano kha ḽifhasi uri vha ye ṱaḓulu. Vha ḓo vhusa vhathu vhe na Yesu sa mahosi, vhahaṱuli, na vhotshifhe. (Luka 22:28-30; Ndzumbululo 5:9, 10) Yesu o vhidza vhenevha vhavhusi nae Muvhusoni wawe uri ndi “sambi ḽiṱuku.” Tshivhalo tshavho ndi 144 000.—Luka 12:32; Ndzumbululo 14:1-3.
4. Musi Yesu a tshi tou vha Khosi, o pandela Sathane na vharuṅwa vhawe vhavhi ngei ṱaḓulu nahone a vha pandelela fhano kha ḽifhasi. Ndi ngazwo zwithu zwo vhifha nga u rali fhano kha ḽifhasi u bva nga 1914. (Ndzumbululo 12:9, 12) Dzinndwa, dzinḓala, malwadze, vhuvhi vhune ha khou engedzea—hezwi zwoṱhe ndi “tshiga” tshi sumbedzaho uri Yesu u khou vhusa na uri ano maitele a maḓuvhani ao a vhufhelo.—Mateo 24:3, NW, Mt 24:7, 8, 12; Luka 21:10, 11; 2 Timotheo 3:1-5.
5. Zwenezwino Yesu u ḓo haṱula vhathu, a tshi vha fhandekanya sa mulisa a tshi khethekanya nngu kha mbudzi. Vha re “nngu” ndi vhane vha ḓo vha vho ḓisumbedza vhe vhalanda vhawe vha fulufhedzeaho. Vha ḓo wana vhutshilo vhu sa fheli kha ḽifhasi. Vha re “mbudzi” ndi vhane vha ḓo vha vho landula Muvhuso wa Mudzimu. (Mateo 25:31-34, 46) Hu si kale, Yesu u ḓo fhelisa vhoṱhe vha ngaho mbudzi. (2 Vha-Thesalonika 1:6-9) Arali ni tshi ṱoḓa u vha muṅwe wa “nngu” dza Yesu, ni fanela u thetshelesa mulaedza wa Muvhuso nahone ni shume u tendelana na zwine na zwi guda.—Mateo 24:14.
6. Zwino ḽifhasi ḽo fhandekanywa ḽa vha mashango manzhi-manzhi. Ḽiṅwe na ḽiṅwe ḽi na muvhuso waḽo. Kanzhi hedzi tshaka dzi a lwa. Fhedzi Muvhuso wa Mudzimu u ḓo dzhiela vhudzulo mivhuso yoṱhe ya vhathu. U ḓo vhusa u woṱhe ḽifhasi ḽoṱhe. (Daniele 2:44) Zwenezwo a hu tsha ḓo vha na nndwa, vhuvhi, na vhuvemu. Vhathu vhoṱhe vha ḓo tshila vhoṱhe nga mulalo na vhuthihi.—Mixa 4:3, 4.
7. Tshifhingani tsha U Vhusa ha Yesu ha Miṅwaha ya Tshigidi, vhathu vha fulufhedzeaho vha ḓo fhelela, nahone ḽifhasi ḽoṱhe ḽi ḓo vha paradiso. Vhufheloni ha miṅwaha ya tshigidi, Yesu u ḓo vha o ita zwoṱhe zwe Mudzimu a mu humbela uri a zwi ite. Zwenezwo u ḓo vhuyisela Muvhuso ha Khotsi awe. (1 Vha-Korinta 15:24) Ndi ngani ni sa vhudzi khonani dzaṋu na vhafunwa vhaṋu nga ha zwine Muvhuso wa Mudzimu wa ḓo zwi ita?
[Picture on page 13]
Nga fhasi ha vhuvhusi ha Yesu, a hu tsha ḓo vha na vengo kana luvhengelambiluni