Ngudo 9

Vhashumeli Vha Mudzimu Vha Fanela U Kuna

Ndi ngani ri tshi fanela u kuna nga nḓila dzoṱhe? (1)

Zwi amba mini u kuna muyani? (2) u kuna ha vhuḓilisi? (3)

u kuna muhumbuloni? (4) u kuna muvhilini? (5)

Ndi mifuda ifhio ya luambo lu songo ṱambaho ine ra fanela u i iledza? (6)

1. Yehova Mudzimu o kuna nahone ndi mukhethwa. U lavhelela uri vhagwadameli vhawe vha dzule vho kuna—muyani, kha vhuḓilisi, muhumbuloni, na muvhilini. (1 Petro 1:16) Zwi ṱoḓa vhuḓidini vhukuma u dzula wo kuna phanḓa ha Mudzimu. Ri tshila shangoni ḽi songo kunaho. Ri dovha ra lwa na nḓowelo dzashu dza u ita zwo khakheaho. Fhedzi a ro ngo fanela u nyabwa.

2. U Kuna Muyani: Arali ri tshi ṱoḓa u shumela Yehova, ri nga si bvele phanḓa u farelela pfunzo kana masialala a vhurereli ha mazwifhi. Ri fanela u bva vhurerelini ha mazwifhi nahone ri si vhu tikedze nga nḓila naho i ifhio. (2 Vha-Korinta 6:14-18; Ndzumbululo 18:4) Musi ro no guda mafhungo-ngoho nga ha Mudzimu, ri fanela u ita vhungoho ha uri ri si xedzwe nga vhathu vhane vha funza mazwifhi.—2 Yohane 10, 11.

3. U Kuna ha Vhuḓilisi: Yehova u ṱoḓa vhagwadameli vhawe vha tshi ḓifara sa Vhakriste vha ngoho zwifhinga zwoṱhe. (1 Petro 2:12) U vhona zwoṱhe zwine ra ita, naho hu tshiphirini. (Vha-Heberu 4:13) Ri fanela u iledza vhuaḓa ha u ṱangana nga dzimbeu na huṅwe u ḓifara huvhi ha ḽino shango.—1 Vha-Korinta 6:9-11.

4. U Kuna Muhumbuloni: Arali ra ḓadza mihumbulo yashu nga mihumbulo yo kunaho, u ḓifara hashu hu ḓo kuna-vho. (Vha-Filipi 4:8) Fhedzi arali ri tshi dzula ri tshi humbula zwi songo kunaho, zwi ḓo bveledza mishumo mivhi. (Mateo 15:18-20) Ri fanela u iledza mifuda ya u ḓimvumvusa ine ya nga tshinya mihumbulo yashu. Ri nga ḓadza mihumbulo yashu nga mihumbulo yo kunaho nga u guda Ipfi ḽa Mudzimu.

5. U Kuna Muvhilini: Ngauri Vhakriste vha imela Mudzimu, vha fanela u vhulunga mivhili yavho na zwiambaro zwavho zwo kuna. Ri fanela u ṱamba zwanḓa zwashu musi ri tshi bva nḓuni ṱhukhu, nahone ri fanela u ṱamba zwanḓa ri sa athu ḽa kana u fara zwiḽiwa. Arali ni si na tshampungane tsha malaṱwa tsho teaho, tshika ya bungani i fanela u bwelwa. (Doiteronomio 23:12, 13) U dzula ro kuna zwi ita uri ri vhe na mutakalo wavhuḓi. Haya ha Mukriste hu fanela u kuna nga nnḓa na nga ngomu. Hu fanela u vha tsumbo yavhuḓi muḓini woṱhe.

6. Luambo lwo Ṱambaho: Vhashumeli vha Mudzimu vha fanela u amba ngoho zwifhinga zwoṱhe. Vhadzia u zwifha a vha nga dzheni Muvhusoni wa Mudzimu. (Vha-Efesa 4:25; Ndzumbululo 21:8) Vhakriste a vha shumisi luambo luvhi. A vha thetshelesi kana u amba miswaswo kana mafhungo a songo kunaho. Nga ṅwambo wa luambo lwavho lwo ṱambaho, a vha fani na vhaṅwe mushumoni kana tshikoloni na hune vha dzula hone.—Vha-Efesa 4:29, 31; 5:3.

[Pictures on page 19]

Vhashumeli vha Mudzimu vha fanela u kuna kha masia oṱhe