Marangaphanḓa

Phindulo Dzi Shumaho!

‘Ndi nga davhidzana hani na vhabebi vhanga?’ ‘Ndi nga ita hani dzikhonani?’ ‘Ndi mini zwo khakheaho nga u ita zwa vhudzekani u songo ḓivhofha nga mafhungo a lufuno?’ ‘Ndi ngani ndi tshi ḓipfa ndo ṱungufhala?’

Arali no no vhuya na ḓivhudzisa mbudziso dzi tevhelaho, a ni noṱhe. Zwi tshi ya nga uri no ya ngafhi u itela u wana vhulivhisi, ni nga kha ḓi vha no wana phindulo dzo fhamba-fhambanaho. U itela u thusa vhaswa u wana nyeletshedzo yavhuḓi ine vha nga i fulufhela, magazini wa Awake! wo gandisa mutevhe wa thero dzo thewaho Bivhilini dzi re na tshiṱoho tshine tsha ri “Vhaswa Vha A Vhudzisa . . . ” nga January 1982. Nga murahu ha mahumi a miṅwaha, vhathu vhanzhi vha kha ḓi vhuyelwa nga dzenedzo thero nahone vha a dzi takalela. Thero iṅwe na iṅwe yo ṱoḓisiswa nga vhuronwane. Zwi re zwone ndi uri u itela u wana nḓila ine vhaswa vha humbula na u ḓipfa ngayo, vhaṅwali vha Awake! vho haseledza na vhaswa vha maḓana shangoni ḽoṱhe! Naho zwo ralo, zwine zwa vha zwa ndeme vhukuma ndi uri nyeletshedzo ine ya vha kha “Vhaswa Vha A Vhudzisa” yo thewa Ipfini ḽa Mudzimu, Bivhili.

Bugu ye na i fara zwino yo gandiswa lwa u thoma nga 1989. Naho zwo ralo, ndima dza hone dza vusuluswa u itela uri dzi haseledze mafhungo a musalauno. Ho shandulwa ndima dza 30 dzi bvaho kha thero dza “Vhaswa Vha A Vhudzisa” dze dza gandiswa vhukati ha 2004 na 2011.

Mbudziso Dzine Vhaswa Vha Dzi Vhudzisa—Phindulo Dzi Shumaho, Volumu 1, i ḓo ni ṋea zwishumiswa zwine na zwi ṱoḓa u itela uri ni vhe mualuwa a re na vhuḓifhinduleli. Ri fulufhela uri musi ni tshi shumisa nyeletshedzo yayo, ni ḓo ṱanganela na vhathu vha dzimilioni, vhaswa na vhalala, “vho gudaho vha fhedza, vha vha na ṱhalukanyo yo ḓowelaho u khethekanya vhuḓi na vhuvhi.”—Vha-Heberu 5:14.

Vhagandisi