Nḓila Ye Tshigwada Tshi Langaho Tsha Dzudzanyea Ngayo

TSHIGWADA TSHI LANGAHO tsha Ṱhanzi dza Yehova tsho vhumbiwa nga vhanna vho ḓiṋekedzaho vhane vha vha vhashumeli vha Mudzimu vho ḓodzwaho. Ndi vhaimeleli vha tshigwada tsha mukoma a fulufhedzeaho na wa vhuṱali, tshine tsha vha na vhuḓifhinduleli ha u ṋea zwiḽiwa zwa muya na u ṋea vhulivhisi na u ita vhungoho ha uri mushumo wa u huwelela nga ha Muvhuso u ḓa u thoma kha Ṱhanzi dza Yehova shangoni ḽoṱhe.—Mat. 24:14, 45-47.

Miṱangano ya Tshigwada tshi Langaho i farwa vhege iṅwe na iṅwe, kanzhi nga Ḽavhuraru. Zwenezwi zwi ita uri vhenevha vhahashu vha shume vhoṱhe nga vhuthihi. (Ps. 133:1) Miraḓo ya Tshigwada tshi Langaho i dovha ya shuma kha komiti dzo fhamba-fhambanaho. U itela u ṱhogomela madzangalelo a Muvhuso, komiti iṅwe na iṅwe i na vhuḓifhinduleli ha miṅwe mishumo i tshimbidzanaho na u huwelela Muvhuso, samusi zwo ambiwa nga u pfufhifhadza afho fhasi.

◼ KOMITI YA VHULAVHELESI: Yeneyi komiti yo vhumbiwa nga mulavhelesi muthihi wa komiti dza Tshigwada tshi Langaho na muṅwaleli ane a dovha a vha muraḓo wa Tshigwada tshi Langaho. I ita vhungoho ha uri komiti dzoṱhe dzi khou shuma nga nḓila yavhuḓi. I dovha ya ṱhogomela mafhungo a shishi, u tovholwa, khombo dza mupo, na maṅwe mafhungo o ṱavhanyiswaho ane a kwama Ṱhanzi dza Yehova shangoni ḽoṱhe.

◼ KOMITI YA VHASHUMI: Vhahashu vha re kha yeneyi komiti vho ṋewa vhuḓifhinduleli ha u ṱhogomela mutakalo na vhumuya na u thusa miraḓo ya muṱa wa Bethele shangoni ḽoṱhe. Yeneyi komiti i lavhelesa u khethiwa na u rambiwa ha miraḓo miswa ya miṱa ya Bethele na u fhindula mbudziso dza malugana na tshumelo yavho ya Bethele.

◼ KOMITI YA VHAGANDISI: Yeneyi komiti i ṱhogomela u gandiswa, u phaḓaladzwa, na u rumelwa ha khandiso dza Bivhili shangoni ḽoṱhe. I lavhelesa mitshini ya u gandisa na zwifhaṱo zwi shumiswaho nga Ṱhanzi dza Yehova zwa ndangulo dzo fhamba-fhambanaho. Yeneyi komiti i lugiselela nḓila ya khwine ya u shumisa miṋeelo ya mushumo wa Muvhuso wa shango ḽoṱhe.

◼ KOMITI YA TSHUMELO: Vhane vha vha kha yeneyi komiti vha lavhelesa mushumo wa u huwelela na mafhungo ane a kwama zwivhidzo, vhavulanḓila, vhahulwane, na vhalavhelesi vha dalelaho. I livhisa kha u lugiselelwa ha Vhuḓinḓa Hashu ha Muvhuso na u ramba vhagudiswa vha Tshikolo tsha Gilead na vha Tshikolo tsha U Gudisela Vhuḓinḓa, nahone nga murahu ya ṋea vho ṱhaphudzaho mishumo yavho.

◼ KOMITI YA U FUNZA: Yeneyi komiti i lavhelesa mafhungo ane a shumiswa maguvhanganoni, mabuthanoni, na miṱanganoni ya zwivhidzo. I lugiselela mbekanyamushumo dza muya dza miraḓo ya muṱa wa Bethele na u ṱhogomela zwikolo zwo fhamba-fhambanaho, zwi ngaho sa Tshikolo tsha Gilead, Tshikolo tsha Tshumelo ya Vhuvulanḓila, na u lugiselela mbekanyamushumo dzine dza vha kha dzikhasethe na dzividio.

◼ KOMITI YA VHUṄWALELI: Ndi vhuḓifhinduleli ha yeneyi komiti uri i lavhelese uri zwiḽiwa zwa muya zwi khou ṅwaliwa kha khandiso na u phaḓaladzwa kha vhatendi ngavho na kha vhomuthumunzhi. Yeneyi komiti i fhindula mbudziso dza Bivhilini na u ṱhogomela mafhungo a maṅwalwa a matambwa na mabammbiri a nyambo. I dovha ya lavhelesa na mushumo wa u ṱalutshedzela une wa khou itwa shangoni ḽoṱhe.

Muapostola Paulo o fanyisa tshivhidzo tsha vho ḓodzwaho na muvhili wa muthu nahone o ombedzela ndeme ya mishumo ine ya itwa nga miraḓo yoṱhe khathihi na u ḓisendeka nga vhaṅwe, lufuno, na u shumisana musi vha tshi ita mushumo we vha ṋewa nga Mudzimu. (Vha-Roma 12:4, 5; 1 Vha-Kor. 12:12-31) Ṱhoho ine ya vha Yesu Kristo, i ṋea miraḓo ya muvhili zwine zwa ṱoḓea u itela uri i shumisane zwavhuḓi, khathihi na zwiḽiwa zwa muya. (Vha-Ef. 4:15, 16; Vha-Kol. 2:19) Nga yeneyi nḓila, Tshigwada tshi Langaho tsho dzudzanyea u itela u ranga phanḓa musi Yehova a tshi tshi livhisa nga muya mukhethwa.