Mbudziso Dzi Bvaho Ha Vhavhali

Naa zwo tea uri wahashu wa tshisadzini a fukedze ṱhoho musi a tshi khou ṱalutshedzela nyambo dza Bivhili u ya kha luambo lwa zwanḓa miṱanganoni ya Vhukriste, maguvhanganoni, kana mabuthanoni?

Kanzhi mufumakadzi wa Mukriste u fanela u fukedza ṱhoho musi a tshi ḓadzisa vhuḓifhinduleli vhune kanzhi ha itwa nga munna wawe kana nga wahashu wa tshinnani tshivhidzoni. Zwenezwi zwi tendelana na maitele o bulwaho nga muapostola Paulo ane a ri “huno musadzi ané a tshi rabela, namusi a tshi porofita, a si fúkedze ṱhóho, u nyadzisa ṱhóho yawe,” nga ṅwambo wa uri “ṱhóho ya musadzi ndi munna.” (1 Vha-Kor. 11:3-10) Musi wahashu wa tshisadzini a tshi fukedza ṱhoho kha zwiimo zwenezwo, zwi sumbedza uri u ḓiṱukufhadzela ndugiselelo ya lwa ṱaḓulu tshivhidzoni tsha Vhukriste.—1 Tim. 2:11, 12.a

Hu pfi mini nga zwiimo zwine wahashu wa tshisadzini a ṱalutshedzela nyambo ya wahashu wa tshinnani u ya kha luambo lwa zwanḓa? Ndi ngoho uri wahashu wa tshisadzini u khou tou fhirisela mulaedza wa tshiambi kha vhathetshelesi. Zwine zwa amba uri a si ene ane a khou funza, fhedzi u khou tou ṱalutshedzela zwine zwa khou ambiwa nga wahashu wa tshinnani. Naho zwo ralo, u ṱalutshedzela luambo lwa zwanḓa zwo fhambana vhukuma na u ṱalutshedzela luambo lune lwa sa vhe lwa zwanḓa. Kha nyambo dzine dzi sa vhe dza zwanḓa, vhathetshelesi vha livhisa ṱhogomelo kha tshiambi nahone vha ḓi dovha vha thetshelesa na muṱalutshedzeli. Zwiṅwe hafhu, u fhambana na u ṱalutshedzelwa ha luambo lwa zwanḓa, vhahashu vha tshisadzini vhane vha ṱalutshedzela luambo lu si lwa zwanḓa kanzhi vha vha vhe vhuimoni vhune ha sa livhiswe nga maanḓa ṱhogomelo khavho. Nga zwiṅwe zwifhinga, vha nga kha ḓi khetha u ṱalutshedzela vho dzula fhasi kana vho ima, nahone vho livhana na tshiambi nṱhani ha vhathetshelesi. Ngauralo, a zwi ṱoḓei uri wahashu wa tshisadzini ane a khou ṱalutshedzela luambo lu si lwa zwanḓa a fukedze ṱhoho.

Zwiṅwe hafhu, nga ṅwambo wa tshanduko dza thekinolodzhi dzine dza shumiswa musi nyambo dzi tshi ṱalutshedzelwa u ya kha luambo lwa zwanḓa, kanzhi vhathetshelesi vha livhisa ṱhogomelo kha muṱalutshedzeli. Muthu ane a khou ṱalutshedzela nga luambo lwa zwanḓa ndi ene ane vhathetshelesi vha mu vhona kha tshikirini tshihulwane, ngeno vha sa koni u vhona tshiambi. Nga zwenezwo, zwi ḓo vhonala zwo tea uri wahashu wa tshisadzini ane a khou ṱalutshedzela kha luambo lwa zwanḓa a ṱhogomele vhuḓifhinduleli hawe nga u fukedza ṱhoho yawe.

Honovhu vhulivhisi ho vusuluswaho vhu kwama hani u ṱalutshedzela dzinyambo u ya kha luambo lwa zwanḓa Tshikoloni Tsha Vhuḓinḓa Ha Lwa Ṱaḓulu, kha misumbedzo, na musi hu tshi fhindulwa kha Pfunzo ya Bivhili ya Tshivhidzo, kha Muṱangano wa Tshumelo, na kha Pfunzo ya Tshiingamo? Naa wahashu wa tshisadzini ane a khou ṱalutshedzela u ya kha luambo lwa zwanḓa u fanela u fukedza ṱhoho yawe kha zwiitea zwo raloho? Zwi vhonala u nga a zwi ṱoḓei uri wahashu wa tshisadzini a fukedze ṱhoho kha zwiṅwe zwiitea, samusi vhathetshelesi vhoṱhe vha tshi ḓo zwi pfesesa uri a si ene ane a khou fara yeneyo miṱangano. Sa tsumbo, zwenezwi zwi ḓo fana na musi a tshi khou ṱalutshedzela phindulo dza vhathetshelesi, nyambo dzine dza ṋekedzwa nga vhahashu vha tshisadzini, kana misumbedzo. Naho zwo ralo, musi a tshi ṱalutshedzela nyambo dza vhahashu vha tshinnani kha miṱangano yeneyi, musi a tshi ṱalutshedzela mufari wa Pfunzo ya Tshiingamo kana mufari wa Pfunzo ya Bivhili ya Tshivhidzo, kana musi a tshi ranga phanḓa kha u imba nyimbo dza luambo lwa zwanḓa, u fanela u fukedza ṱhoho. Zwi nga kha ḓi ṱoḓea uri tshifhingani tsha muṱangano, wahashu wa tshisadzini a ṱalutshedzele vhahashu vha tshinnani, vha tshisadzini, vhana na vhahulwane. Malugana na zwenezwi, zwi nga kha ḓi vhuyedza vhukuma uri a fukedze ṱhoho yawe tshifhingani tsha muṱangano.

[Ṱhaluso i re magumoni a siaṱari]