Shumisani Bivhili Sa Tshivhoni

Mufunziwa Yakobo o vhambedza Bivhili na tshivhoni tshine tsha ri thusa u vhona zwine ra vha zwone nga ngomu. (Yak. 1:22-25) Ri nga shumisa hani Bivhili sa tshivhoni?

Vhalani nga vhuronwane. Arali ra nga ḓisedza kha tshivhoni lwa tshifhinganyana, zwi nga ita uri ri si kone u vhona hune ra tea u lugisa hone. Nga nḓila i fanaho, u itela uri ri kone u vhona zwine ra vha zwone nga ngomu, ri tea u vhala Ipfi ḽa Mudzimu nga vhuronwane.

Livhisani ṱhogomelo kha hune inwi na khou tea u khwinisa hone, hu si hune vhaṅwe vha tea u khwinisa hone. Nga zwiṅwe zwifhinga musi ri tshi sedza kha tshivhoni, ri nga kha ḓi vhona na vhaṅwe vhathu kha tshenetsho tshivhoni nahone ra vhona na hune vha tea u khwinisa hone. Nga nḓila i fanaho, ri nga kha ḓi shumisa Bivhili u itela u vhona hune muṅwe muthu a tea u khwinisa hone. Fhedzi arali ra ita nga u ralo, zwi nga kha ḓi ita uri riṋe vhaṋe ri si vhone hu ne ra tea u khwinisa hone.

Linganyiselani. Arali ra livhisesa ṱhogomelo kha zwine ra khou tea u zwi shandula, zwi nga ita uri ri kulee nungo. Musi ni tshi vhala Bivhili, ni tea u linganyisela nga u sa lavhelela zwinzhi kha inwi muṋe u fhira zwine Yehova a zwi lavhelela kha inwi.​—Yak. 3:17.