U Thuswa Nga Vharuṅwa Vha Mudzimu

VHAṄWE vhathu vha amba uri vha tenda zwithu zwine vha zwi vhona fhedzi. Fhedzi zwenezwo ndi vhutsilu. Huna zwithu zwinzhi zwa vhukuma ri sa athu vhuya ra zwi vhona nga maṱo ashu. Ni a ḓivha tshiṅwe tshazwo?—

Hu pfi mini nga muya une ra u fema? Naa ri nga u fara nga tshanḓa?— Imisani tshanḓa tshaṋu ni vhudzedze muya khatsho. Ni pfa mini?— Ni pfa muya, fhedzi a ni koni u u vhona a thi ri?—

Ro no ḓi amba nga ha vhathu vha muya, vhane ra nga si kone u vha vhona. Ro guda uri vhaṅwe ndi vhavhuḓi, fhedzi vhaṅwe ndi vhavhi. Mmbudzeni madzina a vhaṅwe vhathu vhavhuḓi vha muya vhane ra nga si kone u vha vhona.— Ndi Yehova Mudzimu, Yesu, na vharuṅwa vhavhuḓi. Naa huna vharuṅwa vhavhi?— Bivhili i amba uri vha hone. Mmbudzeni zwe na zwi guda nga havho.—

Tshine ra tshi ḓivha ndi uri vharuṅwa vhavhuḓi na vhavhi vha na maanḓa ane a fhira ashu. Mufunzi Muhulu o vha a tshi ḓivha zwinzhi nga ha vharuṅwa. Ndi nga ṅwambo wa uri na ene o vha e muruṅwa musi a sa athu bebwa sa ṅwana kha ḽifhasi. O tshila na vhaṅwe vharuṅwa ṱaḓulu. U ḓivha vha dzimilioni. Naa vhenevha vharuṅwa vhoṱhe vha na madzina?—

Hafhu ro guda uri Mudzimu o ira dziṋaledzi madzina. Nga zwenezwo ri nga vha na vhungoho ha uri na vharuṅwa vhoṱhe vha na madzina. Nahone ri a zwi ḓivha uri vha a amba nga tshavho ngauri Bivhili i ri vhudza uri hu na ‘luambo lwa vharuṅwa.’ (1 Vha-Korinta 13:1) Ni humbula uri vharuṅwa vha amba nga ha mini? Naa vha amba nga riṋe kha ḽifhasi?—

Ri a zwi ḓivha uri vharuṅwa vha Sathane, madimoni, vha khou lingedza u ri ṱuṱuwedza uri ri sa thetshelese Yehova. Nga zwenezwo vha fanela u vha vha tshi amba uri vha nga zwi itisa hani zwenezwi. Vha ṱoḓa uri ri fane navho u itela uri Yehova a sa ri fune-vho. Fhedzi hu pfi mini nga vharuṅwa vha fulufhedzeaho vha Mudzimu? Ni humbula uri na vhone vha amba nga ha riṋe?— Ee. Vha ṱoḓa u ri thusa. Thetshelesani ndi ni vhudze nḓila ye vhaṅwe vharuṅwa Mudzimu vha thusa ngayo vhathu vhane vha funa Yehova na u mu shumela.

Sa tsumbo, ho vha hu na muṅwe munna ane a pfi Daniele ane a dzula Babele. Vhathu vhanzhi vhe vha vha vha tshi dzula kha ḽeneḽo shango vho vha vha sa funi Yehova. Vhenevho vhathu vho ita na u vhea mulayo wa u ṱarafa muṅwe na muṅwe ane a rabela Yehova Mudzimu. Fhedzi Daniele ho ngo litsha u rabela Yehova. Ni a ḓivha zwe vha zwi ita Daniele?—

Ee, vhathu vhavhi vho ita uri Daniele a poswe bakoni ḽa dzindau. Daniele o vha e eṱhe henefho bakoni na ndau dzo farwaho nga nḓala. Ni a ḓivha uri ho itea mini nga murahu ha zwenezwo?— Daniele o ri: “Mudzimu . . . o ruma muḓinḓa wawe, a fara milomo ya dzindau.” Ho ngo huvhala na luthihi! Vharuṅwa vha nga itela vhathu vhane vha shumela Yehova zwithu zwi mangadzaho.—Daniele 6:19-23.

Ho vha na tshifhinga tshe Petro a vha o valelwa khothoni. Hafhu Petro o vha e khonani ya Yesu Kristo, Mufunzi Muhulu. Vhaṅwe vhathu a vho ngo zwi takalela musi Petro a tshi vha vhudza uri Yesu o vha e Murwa wa Mudzimu. Nga zwenezwo vha valela Petro khothoni. Petro o vha o lindwa nga maswole uri a sa shavhe. O vha a tshi ḓo thuswa nga nnyi?—

Petro o vha a tshi eḓela vhukati ha vhalindi vhavhili, nahone o vha o vhofhiwa nga ngeḓane zwanḓani zwawe. Fhedzi Bivhili i ri: ‘Vhonani, muruṅwa wa Yehova a ḓa, tshedza tsha vhonetshela nnḓu yeneyo. A vusa Petro nga u mu kwama kha lurumbu a ri: “Ṱavhanya u vuwe!”’

Nga murahu ha zwenezwo, ngeḓane dze dza vha dzi zwanḓani zwa Petro dza wela fhasi! Nahone muruṅwa a ri khae: ‘Ambara, u pfuṋele zwienda, nahone u ntevhele.’ Vhalindi a vho ngo kona u vha thivhela ngauri Petro o vha a tshi khou thuswa nga muruṅwa. Musi vha tshi swika getheni ya tsimbi, ha itea tshithu tshi mangadzaho. Gethe ya vulea nga yoṱhe! Onoyo muruṅwa a vhofholola Petro uri a kone u bvela phanḓa a tshi huwelela.—Mishumo 12:3-11.

Naa na riṋe ri nga thuswa nga vharuṅwa vha Mudzimu?— Ee, vha nga ri thusa. Naa izwi zwi amba uri misi yoṱhe vha ḓo ri tsireledza uri ri sa huvhale?— Hai, vharuṅwa vha nga si ri tsireledze arali ra ita zwithu zwine zwa ḓo ri dzhenisa khomboni. Fhedzi ri nga kha ḓi huvhala naho ra sa ita zwithu zwine zwa nga ri dzhenisa khomboni. Vharuṅwa a vho ngo laedzwa uri vha dzule vha tshi ri tsireledza uri ri sa dzhene khomboni. Nṱhani hazwo, Mudzimu o vha ṋea mushumo wo khetheaho uri vha u ite.

Bivhili i amba nga ha muruṅwa ane a vhudza vhathu huṅwe na huṅwe uri vha gwadamele Mudzimu. (Ndzumbululo 14:6, 7) Muruṅwa u vha vhudza hani zwenezwo? Naa u tou huwelela e ṱaḓulu uri muṅwe na muṅwe a mu pfe?— Hai, ndi vhatevheli vha Yesu vhane vha vhudza vhaṅwe vhathu nga ha Mudzimu, nahone vha thuswa nga vharuṅwa uri vha ite mushumo wavho. Vharuṅwa vha ita vhungoho ha uri vhane vhukuma vha ṱoḓa u ḓivha nga ha Mudzimu vha wana tshibuli tsha u pfa mulaedza. Ri nga ṱanganela kha wonoyo mushumo wa u huwelela, nahone vharuṅwa vha ḓo ri thusa.

Fhedzi ri ḓo ita mini arali vhathu vha sa funi Mudzimu nahone vha tshi ri dina? Arali vha ri valela khothoni? Naa vharuṅwa vha ḓo ri vhofholola?— Vha nga ri vhofholola. Fhedzi a vha iti zwenezwo misi yoṱhe.

Paulo, mutevheli wa Yesu o vhuya a valelwa khothoni. O vha o namela tshikepe nga tshifhinga tshee ha vha hu na ḓumbu ḽihulu. Fhedzi vharuṅwa a vho ngo mu vhofholola nga tshenetsho tshifhinga. Ndi nga ṅwambo wa uri ho vha hu na vhaṅwe vhathu vhe vha vha vha tshi fanela u pfa nga ha Mudzimu. Muruṅwa o ri: “Paulo, U songo ofha; ngauri U tsha ḓi ḓo imiswa phanḓa ha Kesare.” Ee, Paulo o vha o fanela u iswa kha Kesare, muvhusi wa shango u itela uri a huwelele khae. Misi yoṱhe vharuṅwa vho vha vha tshi ḓivha he Paulo a vha e hone, nahone vho mu thusa. Na riṋe-vho vha ḓo ri thusa arali vhukuma ra shumela Mudzimu.—Mishumo 27:23-25.

Hu na muṅwe mushumo wa ndeme une vharuṅwa vha ḓo u ita, nahone vha ḓo u ita hu si kale. Tshifhinga tsha uri Mudzimu a fhelise vhathu vhavhi tshi tsini nga maanḓa. Vhoṱhe vhane vha sa gwadamele Mudzimu wa ngoho vha ḓo fheliswa. Vhane vha amba uri a vha tendi uri hu na vharuṅwa nga ṅwambo wa uri a vha vha vhoni vha ḓo ḓisola.—2 Vha-Thesalonika 1:6-8.

Hu ḓo itea mini kha riṋe?— Arali ra ima na vharuṅwa vha Mudzimu, vha ḓo ri thusa. Fhedzi naa ri ima navho?— Ri ima navho arali ri tshi shumela Yehova. Nahone arali ri tshi shumela Yehova, ri ḓo vhudza vhaṅwe vhathu uri vha mu shumele.