Naa Ni A Humbula U Livhuha?

NAA no ḽa zwiḽiwa ṋamusi?— Ni a ḓivha uri zwo bikwa nga nnyi?— Khamusi zwo bikwa nga mme aṋu kana nga muṅwe muthu, fhedzi ndi ngani ri tshi fanela u livhuha Mudzimu?— Ngauri Mudzimu ndi ene we a ita uri zwi konadzee uri zwiḽiwa zwi mele. Naho zwo ralo, ri fanela u livhuha na we a bika zwiḽiwa kana we a ri avhela zwone.

Nga zwiṅwe zwifhinga ri a hangwa u livhuha musi vhaṅwe vhathu vha tshi ri itela zwithu zwavhuḓi a thi ri? Musi Mufunzi Muhulu a tshee kha ḽifhasi, vhaṅwe vhathu vha re na mapele vho hangwa u mu livhuha.

Ni a ḓivha uri vhulwadze ha mapele vhu ita mini muthu we ha mu fara?— Honoho vhulwadze vhu ita uri ṋama ya muthu i wele fhasi. Musi Yesu a tshee kha ḽifhasi, vhathu vha re na mapele vho vha vha tshi dzula kule na vhaṅwe. Nahone arali muthu a re na mapele a tshi vhona muṅwe muthu a tshi khou ḓa, o vha a tshi fanela u huwelela a mu vhudza uri a si sendele tsini nae. Hezwi zwo vha zwi tshi itelwa uri vhaṅwe vhathu vha sa sendele tsini-tsini u itela uri vha sa ḓo pfukelwa nga mapele.

Yesu o vha a tshi pfela vhuṱungu vhathu vha re na mapele. Ḽiṅwe ḓuvha a tshi khou ya Yerusalema, Yesu o kombetshedza u pfuka nga muḓini muṱuku. Musi a tshi swika tsini na wonoyo muḓi, ha ḓa vhathu vha fumi vha re na mapele khae. Vho vha vho pfa uri Yesu u na maanḓa a bvaho ha Mudzimu a u alafha malwadze oṱhe.

Vhenevho vhathu vha re na mapele a vho ngo sendela tsini ha Yesu. Vho imela kule. Fhedzi vho vha vha tshi tenda uri Yesu a nga fhodza mapele avho. Musi vhenevho vhathu vha re na mapele vha tshi vhona Mufunzi Muhulu, vho huwelela vha ri: ‘Yesu, Mufunzi, ri thuse!’

Naa ni a pfela vhuṱungu vhane vha khou lwala?— Yesu o vha a tshi vha pfela vhuṱungu. O vha a tshi ḓivha uri zwi a ṱungufhadza vhukuma u vha na mapele. Nga zwenezwo a vha fhindula a ri: “Tshimbilani ni yo ḓi-sumbedza kha vho-tshifhé.”—Luka 17:11-14.

Ndi ngani Yesu o vha vhudza uri vha ḓisumbedze kha vhotshifhe? Ndi nga ṅwambo wa mulayo we Yehova a u ṋea vhathu Vhawe malugana na vhathu vha re na mapele. Wonoyu mulayo wo amba uri vhotshifhe vha Mudzimu vha fanela u poṱiela lukanda lwa muthu a re na mapele. Tshifhe o vha a tshi ḓo vhudza muthu a re na mapele musi vhulwadze hawe hoṱhe ho no fhola. Musi o no fhola, o vha a tshi nga dovha a tshila na vhaṅwe vhathu.—Levitiko 13:16, 17.

Fhedzi vhenevha vhathu vha re na mapele vho vha vha sa athu fhola. Nga zwenezwo, naa vho ya kha tshifhe samusi Yesu o vha vhudza?— Ee, vho mbo ḓi ya nga tshenetsho tshifhinga. Vhenevha vhanna vha nga vha vho tenda uri Yesu u ḓo fhodza vhulwadze havho. Ha itea mini?

Musi vhe nḓilani vha tshi khou ya kha tshifhe, vhulwadze havho ha mbo ḓi fhola. Zwilonda zwavho zwa mbo ḓi fhola. Ha mbo ḓi vha u fhodzwa havho! U tenda havho kha maanḓa a Yesu ho lambedzwa. Vho vha vho takala vhukuma! Fhedzi vho vha vho tea u ita mini u itela u sumbedza ndivhuwo? No vha ni tshi ḓo vha no ita mini?—

Muṅwe wa vhanna vho fhodzwaho o vhuyelela ha Yesu. A thoma u renda Yehova, a amba zwithu zwavhuḓi nga ha Mudzimu. Zwo vha zwo tea uri a ite zwenezwo ngauri maanḓa e a mu fhodza a bva ha Mudzimu. Onoyo munna o dovha a gwadama milenzheni ya Mufunzi Muhulu nahone a mu livhuha. O takalela vhukuma zwe Yesu a zwi ita.

Fhedzi ho itea mini nga vhaḽa vhaṅwe vhanna vha ṱahe? Yesu o vhudzisa a ri: ‘Naa a ho ngo fhodzwa vhanna vha fumi vha re na mapele kani? Vhaṅwe vha ṱahe vha ngafhi? Naa ndi muthihi fhedzi we a vhuya a renda Mudzimu?’

Ee, ndi ngoho. Ndi muthihi fhedzi kha vha fumi we a renda Mudzimu nahone a vhuya a livhuha Yesu. Nahone onoyu muthu o vha e Musamaria, munna a bvaho kha ḽiṅwe shango. Vhaṅwe vhanna vha ṱahe a vho ngo livhuha Mudzimu na Yesu.—Luka 17:15-19.

Ni fana na ufhio kha vhenevho vhanna? Ri ṱoḓa u fana na munna wa Musamaria a thi ri?— Musi muṅwe muthu a tshi ri itela zwithu zwavhuḓi, ndi mini tshine ra tea u tshi humbula?— Ri tea u livhuha. Kanzhi vhathu vha a hangwa u livhuha. Fhedzi ndi zwavhuḓi uri ri livhuwe. Musi ri tshi ita zwenezwo, Yehova Mudzimu na Murwa wawe Yesu, vha a takala.

Arali na humbula nga haya mafhungo, ni ḓo zwi vhona uri vhathu vhanzhi vho no ni itela zwithu zwinzhi. Sa tsumbo, naa no no vhuya na lwala?— Ni nga kha ḓi vha ni sa athu vhuya na lwala u fana na havhaḽa vhanna vha fumi vhe vha vha vhe na mapele, fhedzi ni nga kha ḓi vha no no farwa nga duda kana no no luṅwa-luṅwa thumbuni. Naa huna vhe vha ni thusa?— Vha nga kha ḓi vha vho ni ṋea mushonga kana vho ni itela zwiṅwe zwithu. Naa a no ngo takalela uri vho ni thusa uri ni fhole?—

Munna wa Musamaria o livhuha nge Yesu a mu fhodza, nahone zwenezwi zwa takadza Yesu. Ni humbula uri mme aṋu kana khotsi aṋu vha ḓo takala arali na livhuha zwe vha ni itela zwone?— Ee, vha ḓo takala.

Vhaṅwe vhathu vha ni itela zwithu ḓuvha ḽiṅwe na ḽiṅwe kana vhege iṅwe na iṅwe. U nga kha ḓivha u mushumo wavho u ita zwenezwi zwithu. Khamusi vha a takalela u zwi ita. Fhedzi ni nga kha ḓi hangwa u vha livhuha. Mudededzi waṋu a nga kha ḓi ḓidina vhukuma u itela u ni thusa uri ni gude. Hoyu ndi mushumo wawe. Fhedzi u ḓo takala arali na mu livhuha nge a ni thusa.

Nga zwiṅwe zwifhinga vhathu vha nga ni itela zwithu zwiṱuku. Naa u hone muthu we a vhuya a ni vulela vothi? Kana we a vhuya a ni ṋekedza zwiḽiwa musi ni tshi khou ḽa ṱafulani? Ndi zwavhuḓi uri ni livhuwe naho zwenezwi zwithu zwi zwiṱuku.

Arali ra humbula u livhuha vhathu vha re kha ḽifhasi, zwi ḓo leluwa vhukuma uri ri humbule u livhuha Khotsi ashu wa ṱaḓulu. Nahone ri na zwiitisi zwinzhi vhukuma zwa u livhuha Yehova! O ri ṋea vhutshilo na zwithu zwavhuḓi zwine zwa ita uri vhutshilo vhu takadze. Nga zwenezwo ri na zwiitisi zwi pfalaho zwa u renda Mudzimu nga u amba zwithu zwavhuḓi nga hae ḓuvha ḽiṅwe na ḽiṅwe.