Yakobo Na Esau Vha A Farelana

Yehova o fhulufhedzisa Yakobo uri u ḓo mu tsireledza samusi o ita nga u ralo kha Abrahamu na Isaka. Yakobo o vha tshi khou dzula Harani, he a vhinga hone, a vha na muṱa muhulwane nahone a pfuma vhukuma.

Nga murahu, Yehova a ri kha Yakobo: ‘Vhuyelelani shangoni ḽa haṋu.’ Nga zwenezwo, Yakobo na muṱa wawe vha fara lwendo lwa u humela murahu. Musi e nḓilani, ha ḓa vhathu khae vha mu vhudza vha ri: ‘Mukomana waṋu Esau u khou ḓa na vhanna vha 400!’ Yakobo a ofha musi a tshi humbula uri Esau u khou ṱoḓa u mu huvhadza na muṱa wawe. A rabela Yehova a ri: ‘Ndi humbela uri u ntsireledze kha mukomana wanga.’ Nga ḓuvha ḽi tevhelaho, Yakobo a rumela Esau zwifhiwa zwinzhi zwa dzinngu, dzimbudzi, dzikholomo, dzigamela na dzidonngi.

Ḓuvha ḽenelo nga madekwana musi Yakobo e eṱhe, a vhona muruṅwa! Muruṅwa a thoma u lwa nae. Vho lwa u vhuya u swika nga matsheloni. Naho Yakobo o huvhala, ho ngo shavha. Muruṅwa a ri: ‘Nnditsheni ndi ṱuwe.’ Fhedzi Yaboko a ri: ‘Ndi nga si ni litshe ni sa athu u mphaṱhutshedza.’

Muruṅwa o fheleledza o fhaṱutshedza Yakobo. Yakobo a mbo ḓi zwi ḓivha uri Yehova a nga si tendele Esau a tshi mu huvhadza.

Nga matsheloni eneo, Yakobo o lavhelesa kule a vhona Esau e na vhanna vha 400. Yakobo a ranga phanḓa muṱa wawe nahone a losha mukomana wawe lwa sumbe. Esau a gidimela kha Yakobo a mu kuvhatedza. Mukomana na murathu vho lila vhukuma nahone vha farelana. Ni humbula uri Yehova o ḓipfa hani nga nḓila ye Yakobo a tshimbidza ngayo enea mafhungo?

Nga murahu, Esau o humela hayani hawe, na Yakobo a ya hayani hawe. Yakobo o vha e na vhana vha vhatukana vha 12. Madzina avho o vha e Rubeni, Simeoni, Levi, Yuda, Dani, Nafutali, Gada, Ashere, Isashara, Sebuloni, Yosefa na Benyamini. Muṅwe wa vhenevho vharwa—Yosefa—o shumiswa nga Yehova u tshidza vhathu vhawe. Ni a ḓivha uri hani? Kha ri vhone.