Dennde Ḽikhethwa Ḽa Vhurabeli

Musi Mushe e Thavhani ya Sinai, Yehova o mu vhudza uri a fhaṱe dennde ḽo khetheaho, ḽi vhidzwaho thebenekele, hune Vhaisiraele vha ḓo kona u mu gwadamela hone. Vho vha vha tshi ḓo kona u hwala ḽeneḽo dennde musi vha tshi khou bvela phanḓa na lwendo.

Yehova o ri: ‘Vhudzani vhathu uri vha ṋeele nga zwine vha nga kona u itela u fhaṱa dennde.’ Vhaisiraele vha ṋeela nga musuku, siḽiva, khopha, matombo a thengo khulu na dzhuweḽari. Vho dovha vha ṋeela nga malabi, ḽinene, mikumba na zwiṅwe zwithu zwinzhi. Vho ṋeela nga zwinzhi lwe Mushe a vhuya a ri: ‘Zwo no ḓalesa! Ni songo tsha ḓisa zwiṅwe.’

Vhanna na vhafumakadzi vhanzhi vha re na vhutsila vho thusa kha u fhaṱa dennde ḽikhethwa. Yehova o vha ṋea vhuṱali uri vha kone u ita wonoyu mushumo. Vhaṅwe vho luka thambo, u runga malabi kana u a khavhisa. Vhaṅwe vho vhaḓa matombo, u shuma nga musuku kana u vhaḓa thanda.

Vho fhaṱa dennde ḽikhethwa u ya nga he Yehova a vha laedza ngaho. Vho ita na khetheni ḽo nakaho ḽa u fhandekanya dennde, ḽa vha na fhethu Hukhethwa na Hukhethwa-khethwa. Fhethu Hukhethwa-khethwa ho vha hu na mbulungelo ya mulanga, yo itwaho nga thanda dza muunga na nga musuku. Fhethu Hukhethwa ho vha hu na tshiṱomambone tsha musuku, ṱafula na aḽeṱare ya zwioro. Muṱani ho vha hu na sambelo ḽa khopha na aḽeṱare khulwane. Mbulungelo ya mulanga yo vha i tshi humbudza Vhaisiraele zwe vha fhulufhedzisa vha tshi ri vha ḓo thetshelesa Yehova. Ni a ḓivha uri mulanga ndi mini? Ndi fhulufhedziso ḽo khetheaho.

Yehova o khetha Aroni na vharwa vhawe uri vha shume denndeni vhe vhotshifhe. Vho vha vho tea u ḽi ṱhogomela na u itela Yehova zwiṱhavhelo henefho. Ndi Aroni tshifhe muhulwane fhedzi, we a vha o tendelwa u dzhena fhethu Hukhethwa-khethwa. U dzhena henefho luthihi nga ṅwaha u itela u ṋekedza tshiṱhavhelo tsha zwivhi zwawe, zwa muṱa wawe na zwivhi zwa lushaka lwoṱhe lwa Isiraele.

Vhaisiraele vho fhedza u fhaṱa dennde ḽikhethwa nga murahu ha ṅwaha vho bva Egipita. Vho kona u vha na fhethu hune vha nga gwadamela hone Yehova.

Yehova a ḓadza dennde ḽikhethwa nga vhugala hawe ḽa vha na gole nṱha haḽo. Vhaisiraele vho vha vha songo tea u tshimbila arali gole ḽi tshee nṱha ha dennde. Fhedzi musi gole ḽi tshi takuwa, vho vha vha tshi zwi ḓivha uri ndi tshifhinga tsha uri vha ṱuwe. Vho vha vha tshi athulula dennde vha tevhela hune gole ḽa ya hone.