Hanna O Rabela Uri A Wane Ṅwana Wa Mutukana

Elikana wa Muisiraele o vha e na vhafumakadzi vhavhili, Hanna na Penina, fhedzi o vha a tshi funesa Hanna. Penina o vha a tshi goḓa Hanna tshifhinga tshoṱhe nga ṅwambo wa uri Hanna o vha e si na vhana nahone Penina o vha e na vhana vhanzhi. Ṅwaha muṅwe na muṅwe, Elikana o vha a tshi ṱuwa na muṱa wawe u yo rabela denndeni ḽikhethwa ngei Shiḽo. Tshiṅwe tshifhinga musi vhe henefho, a ṱhogomela uri mufunwa wawe Hanna o vha o ṱungufhala vhukuma. A ri khae: ‘Ndi humbela uri ni songo lila, Hanna. Nṋe ndi hone. Ndi a ni funa.’

Nga murahu, Hanna a ṱuwa a yo rabela e eṱhe. O vha a tshi khou lila tshifhinga tshoṱhe musi a tshi khou humbela Yehova uri a mu thuse. O fhulufhedzisa a ri: ‘Yehova, arali wa nga mpha ṅwana wa mutukana, ndi ḓo u fha ene nahone a u shumela vhutshilo hawe hoṱhe.’

Tshifhe Muhulu Eli a vhona Hanna a tshi khou femeleka nga u lila a humbula uri o kambiwa. Hanna a fhindula a ri: ‘Hai muṋe wanga, a tho ngo kambiwa. Ndi na thaidzo khulwane, ndi khou amba na Yehova nga hayo.’ Eli a vhona uri o khakha nahone a mu vhudza a ri: ‘U nga ri Mudzimu a nga ni fha zwine na khou zwi ṱoḓa.’ Hanna a ḓipfa e khwine nahone a mbo ḓi ṱuwa. Hu sa athu fhela ṅwaha, a wana ṅwana wa mutukana nahone a ri u pfi Samuele. Naa ni a kona u vhona uri Hanna a nga vha o vha o takala hani?

Hanna ho ngo hangwa zwe a fhulufhedzisa Yehova. Musi a tshi tou litsha u mamisa Samuele, a mu isa uri a yo shuma denndeni ḽikhethwa. A vhudza Eli a ri: ‘Hoyu ndi mutukana we nda mu humbela nga thabelo. Ndi mu fha Yehova vhutshilo hawe hoṱhe.’ Elikana na Hanna vho dalela Samuele ṅwaha muṅwe na muṅwe nahone vha mu ṋea na tshiambaro tshi si na zwanḓa. Yehova o ṋea Hanna vhaṅwe vhana vhararu vha vhatukana na vhasidzana vhavhili.