Ri Nga Gwadamela Hani Mudzimu Nga Nḓila Ine A I Ṱanganedza?

Samusi ro zwi haseledza kha ngudo yo fhiraho, a si vhurereli hoṱhe vhune Mudzimu a vhu ṱanganedza. Fhedzi ri nga gwadamela Musiki washu nga nḓila ine ya mu takadza. Ndi vhufhio “vhurabeli” vhune ha mu takadza? (Yakobo 1:​27) Vhonani zwine Bivhili ya zwi funza.

1. Ri nga guda hani u gwadamela Mudzimu nga nḓila ine a i ṱanganedza?

Ri nga guda zwenezwo Bivhilini. Yesu o vhudza Mudzimu a ri: “Mafhungo au ndi a ngoho.” (Yohane 17:​17) Vhuṅwe vhurereli a vhu shumisi ngoho i re Ipfini ḽa Mudzimu ḽine ḽa vha Bivhili, fhedzi vhu tevhedza pfunzo dza vhathu na masialala. Yehova u sinyuswa nga vhane vha “nyadza mulayo” wawe. (Vhalani Marko 7:9.) Ri takadza Mudzimu musi ri tshi mu gwadamela u tendelana na zwine Bivhili ya zwi funza na u tevhedza nyeletshedzo dzi re Bivhilini.

2. Ri fanela u gwadamela Yehova nga nḓila-ḓe?

Ri fanela u gwadamela Yehova fhedzi ngauri ndi ene o ri Sikaho. (Nzumbululo 4:​11) Hezwi zwi amba uri ri fanela u mu funa na u gwadamela ene fhedzi, ri sa shumisi tshifanyiso kana tshiṅwe tshithu.​—Vhalani Yesaya 42:8.

Nḓila ine ra gwadamela ngayo Yehova i tea u vha ‘khethwa na i ṱanganedzeaho’ khae. (Vharoma 12:1) Hezwi zwi amba uri ri tea u tevhedza milayo yawe. Sa tsumbo, vhane vha funa Yehova vha funa na u tevhedza milayo yawe i ambaho nga ha mbingano. Vha iledza u ita zwithu zwi re na khombo zwi ngaho u daha fola kana u shumisa luvhi zwidzidzivhadzi kana halwa.a

3. Ndi ngani ri tshi tea u gwadamela Yehova ri na vhatendi nga riṋe?

Musi ri tshi ya tshivhidzoni vhege iṅwe na iṅwe, ri vha ri tshi khou “renda Yehova . . . tshivhidzoni.” (Phisalema 111:​1, 2) Iṅwe nḓila ine ra nga zwi ita ngayo ndi nga u imba nyimbo dza u renda Mudzimu. (Vhalani Phisalema 104:​33.) Yehova u ṱoḓa ri tshi ya tshivhidzoni ngauri u a ri funa nahone u a zwi ḓivha uri zwi ḓo ri thusa uri ri ḓiphine nga vhutshilo lwa tshoṱhe. Ri a ṱuṱuwedzana musi ri tshi kuvhangana roṱhe tshivhidzoni.

GUDANI ZWO ENGEDZEAHO

4. A ro ngo fanela u shumisa zwifanyiso musi ri tshi gwadamela Yehova

VIDIO: Naa Mudzimu U A Ṱoḓa Ri Tshi Mu Gwadamela Ri Tshi Shumisa Zwifanyiso? (3:26)

• Ho itea mini musi vhaṅwe vhashumeli vha Mudzimu vha tshifhingani tsha Bivhili vha tshi mu gwadamela vha tshi shumisa zwifanyiso?

Vhaṅwe vhathu vha vhona u nga u gwadamela Mudzimu vha tshi shumisa zwifanyiso zwi ita uri vha vhe tsini nae. Naa u ita zwenezwo zwi nga ita uri a si ṱoḓe u vha tsini navho? Vhalani Ekisoda 20:​4-6 na Phisalema 106:​35, 36, ni kone u fhindula mbudziso dzi tevhelaho:

• No no vhona vhathu vha tshi khou shumisa zwithu kana zwifanyiso zwifhio kha vhurabeli havho?

• Yehova u ḓipfa hani musi vhathu vha tshi mu gwadamela vha tshi shumisa zwifanyiso?

• Ni ḓipfa hani nga ha u shumisa zwifanyiso kha vhurabeli?

5. U gwadamela Yehova fhedzi zwi ri tsireledza kha mazwifhi

VIDIO: Ngoho Yo Mmbofholola (5:16)

Vhalani Phisalema 91:​14, ni kone u fhindula mbudziso i tevhelaho:

• Yehova o fhulufhedzisa uri u ḓo ri itela mini arali ra sumbedza uri ri a mu funa nga u gwadamela ene fhedzi?

6. Ri gwadamela Mudzimu ri tshivhidzoni

Ri renda Yehova na u ṱuṱuwedza vhaṅwe musi ri tshi imba na u fhindula tshivhidzoni. Vhalani Phisalema 22:​22, ni kone u fhindula mbudziso dzi tevhelaho:

• Naa no ḓiphina nga u pfa vhathu vha tshi fhindula tshivhidzoni?

• Naa ni nga takalela u lugiselela zwine na nga zwi fhindula?

7. Yehova u a takala musi ri tshi vhudza vhaṅwe zwine ra zwi guda

Hu na nḓila nnzhi dzine ra nga vhudza ngadzo vhaṅwe zwine ra zwi guda Bivhilini. Vhalani Phisalema 9:1 na 34:​1, ni kone u fhindula mbudziso i tevhelaho:

• Ndi zwifhio zwe na zwi guda Bivhilini zwine na nga takalela u zwi vhudza muṅwe muthu?

NO GUDA MINI?

Ri takadza Musiki washu musi ri tshi gwadamela ene fhedzi, u mu renda ri tshivhidzoni na u vhudza vhaṅwe zwine ra zwi guda.

Ni Kha Ḓi Zwi Humbula?

• Ri nga guda hani u gwadamela Mudzimu nga nḓila ine a i ṱanganedza?

• Ndi ngani ri tshi fanela u gwadamela Yehova fhedzi?

• Ndi ngani ri tshi fanela u gwadamela Mudzimu ri na vhaṅwe vhane vha ṱoḓa u mu takadza?

WANANI ZWO ENGEDZEAHO

Vhalani nga ha muṅwe mufumakadzi we a takala nge a litsha u gwadamela midzimu ya zwifanyiso.

“A Thi Tsha Gwadamela Midzimu Ya Zwifanyiso” (Tshiingamo, 1 October 2011)

Gudani nga ha zwine zwa nga ni thusa uri ni kone u fhindula musi ni tshivhidzoni.

“Rendani Yehova Musi Ni Tshivhidzoni” (Tshiingamo, January 2019)

Vhonani uri muṅwe muṱhannga o vhuyelwa hani nga u ya tshivhidzoni naho zwo vha zwi songo leluwa.

Yehova O Nṱhogomela (3:​07)

Vhathu vhanzhi vha tenda uri tshifhambano tshi tshimbidzana na Vhukriste, fhedzi naa ri fanela u tshi shumisa kha vhurabeli hashu?

“Ndi Ngani Ṱhanzi Dza Yehova Vha Sa Shumisi Tshifhambano Kha Vhurabeli?” (Thero i re kha jw.org)