Yehova U Fhaṱutshedza Na U Tsireledza Vha Mu Thetshelesaho
“Hone ane a pfa nṋe, u ḓo dzula ó takala; u ḓo fhaṱa á sa ofhi khombo.”—MIRERO 1:33.
1, 2. Ndi ngani zwi zwa ndeme u thetshelesa Mudzimu? Fanyisani.
ZWIKUKWANA zwa muvhala wa tshitopana zwi khou tshela mahatsini mapfufhi, zwi sa vhuyi zwa ṱhogomela lurwanzhivha lune lwa khou fhufha henefho nṱha hazwo. Nga u ṱavhanya mme azwo a lila nga maanḓa u itela u zwi sevha nahone a ṱharamudza phapha. Zwikukwana zwa gidimela kha mme azwo, nahone nga u ṱavhanya zwa khuda nga fhasi ha phapha. Lurwanzhivha lwa mbo ḓi ṱuwa.a Ri guda mini kha zwenezwi? Ri guda uri u thetshelesa zwi nga ri tshidza!
2 Yeneyo gundo ndi ya ndeme vhukuma kha Vhakriste ṋamusi, samusi Sathane a tshi khou ita vhuḓidini vhuhulwane ha u ṱoḓa u “ponda” vhathu vha Mudzimu. (Ndzumbululo 12:9, 12, 17) Tshipikwa tshawe ndi u ṱoḓa u fhelisa vhumuya hashu u itela uri Yehova a si ri ṱanganedze na uri ri sa wane vhutshilo vhu sa fheli. (1 Petro 5:8) Naho zwo ralo, arali ra dzula ri tsini na Yehova nahone ra tevhela vhulivhisi vhune ra vhu wana Ipfini na ndanguloni yawe, ri nga vha na vhungoho ha uri u ḓo ri tsireledza. Mupsalme o ṅwala a ri: “O U pilela nga lufhafha lwawe, wo khuda nga phapha dzawe.”—Psalme ya 91:4.
Lushaka Lu Sa Thetshelesi Lu Vha Tshipondwa
3. U dzulela u sa thetshelesa ha Isiraele ho vha na mvelelo dzifhio?
3 Lushaka lwa Isiraele lwo vha lu tshi vhuyelwa nga ṱhogomelo ya Yehova tshifhinga tshoṱhe musi lu tshi mu thetshelesa. Naho zwo ralo, zwifhinga zwinzhi vhathu vho vha vha tshi ṱutshela Musiki wavho nahone vha rembulutshela kha midzimu i sili ya thanda kana ya tombo—“zwi sili, zwi sá farisi tshithu, zwi sá tshidzi.” (1 Samuele 12:21) Nga murahu ha maḓana a miṅwaha a honoho u vutshela, lushaka lwoṱhe lwo vha lwo dzhenelela tshoṱhe kha vhugunei nga nḓila ine zwa konḓa u vhu ṱutshela. Nga zwenezwo, Yesu o ri: “Hee Yerusalema, Yerusalema! Iwe muvhulahi wa vhaporofita, U kanḓaho nga matombo vho rumiwaho ha iwe! Ndi ka-ngana ndi tshi ri ndi kuvhanganye vhana vhau sa khuhu i tshi kuvhanganya khukhwana dzayo tsini ha phapha dzayo; iwe wa ro hana. Ni ḓo zwi vhona, nnḓu yaṋu i ḓo ṱutshelwa ya vha shubi.”—Mateo 23:37, 38.
4. Nḓila ye Yerusalema a ṱutshela ngayo Yehova yo vhonala hani nga 70 C.E.?
4 Nḓila ye lushaka lwa Isiraele lwo guneaho lwa ṱutshela ngayo Yehova yo sumbedzwa nga nḓila i vhavhaho nga 70 C.E. Nga wonoyo ṅwaha mmbi ya Vharoma, yo fara fulaga dzo oliwaho zwifanyiso zwa goni, yo tsela Yerusalema nga luvhilo u itela u vhulaha vhathu nga nḓila i ofhisaho. Wonoyo muḓi wo vha wo ḓala nga vhathu vho ḓaho u pembelela Paseka. Vhunzhi ha zwiṱhavhelo zwavho zwi kundelwa u ita uri vha ṱanganedzwe nga Mudzimu. Yeneyo yo vha i khumbudzo i vhavhaho ya maipfi a Samuele e a a vhudza Khosi Saulo a sa thetshelesi: “Naa U ri Yehova a nga takalela zwidzimu na zwiṱhavhelo u fhirisa zwiḽa muthu a tshi pfa zwine Yehova a amba? Ngangoho, u pfa hu fhira tshiṱhavhelo; u thetshelesa hu fhira mapfura a thutha.”—1 Samuele 15:22.
5. Yehova u ṱoḓa u thetsheleswa nga nḓila-ḓe, nahone ri zwi ḓivha hani uri zwi a konadzea u mu thetshelesa nga yeneyo nḓila?
5 Hu sa londwi u ombedzela hawe ṱhoḓea ya u thetshelesa, Yehova u a dzhiela nṱha vhukuma vhushayanungo ha vhathu vha songo fhelelaho. (Psalme ya 130:3, 4) U ṱoḓa mbilu i fhulufhedzeaho na u thetshelesa ho ḓitikaho nga lutendo, lufuno, na u ofha u mu sinyusa. (Doiteronomio 10:12, 13; Mirero 16:6; Yesaya 43:10; Mixa 6:8; Vha-Roma 6:17) U thetshelesa ho raloho hu a konadzea samusi zwo sumbedzwa nga ‘gole ḽihulwane ḽa ṱhanzi dza kale dza Vhakriste,’ vhe vha dzula vha tshi fhulufhedzea musi vho sedzana na milingo mihulwane, u katela na u vhulahwa. (Vha-Heberu 11:36, 37; 12:1) Vhanevho vho takadza lungafhani mbilu ya Yehova! (Mirero 27:11) Naho zwo ralo, vhaṅwe mathomoni vho vha vha tshi fhulufhedzea, fhedzi vha kundelwa u dzula vha tshi mu thetshelesa. Muṅwe wa vhenevho yo vha i Khosi Yoasi wa Yuda ḽa kale.
Khosi Ye Ya Tshinywa Nga U Ḓowelana Na Vhavhi
6, 7. Yoasi o vha e khosi ya mufuda-ḓe musi Yoyada a kha ḓi tshila?
6 Khosi Yoasi o ṱoḓa u vhulawa musi a tshee lutshetshe. Musi Yoasi a tshi vha na miṅwaha ya sumbe, Tshifhe Muhulu Yoyada a mu bvisa nga tshivhindi he a vha o dzumbama hone nahone a mu vhea a vha khosi. Nga ṅwambo wa uri Yoyada a ofhaho Mudzimu o vha a tshi nga khotsi na mueletshedzi wa Yoasi, onoyo muvhusi a kha ḓi vhaho muswa “o ita zwe zwa takadza Yehova misi yoṱhe tshifhé Yoyada á tshee hone.”—2 Koronika 22:10–23:1, 11; 24:1, 2.
7 Mishumo yavhuḓi ya Yoasi yo katela na u vusulusa thembele ya Yehova—mushumo we ‘Yoasi a elekanya ngawo.’ O humbudza Tshifhe Muhulu Yoyada nga ha ṱhoḓea ya u kuvhanganya muthelo wa thembeleni u bva Yuda na Yerusalema, samusi zwo ‘laedzwa nga Mushe,’ u itela u tikedza mushumo wa u vusulusa. Zwi vhonala uri Yoyada o bvelela kha u ṱuṱuwedza khosi i kha ḓi vhaho muswa u guda na u thetshelesa Mulayo wa Mudzimu. Nga ṅwambo wa zwenezwo, mushumo wa thembeleni na thundu dza hone zwa fhela nga u ṱavhanya.—2 Koronika 24:4, 6, 13, 14; Doiteronomio 17:18.
8. (a) Ndi tshithu tshifhio tshihulwane tshe tsha ita uri Yoasi fe muyani? (b) U sa thetshelesa ha khosi ho fheleledza ho i sudzulusela u ita mini?
8 Zwi ṱungufhadzaho ndi uri u thetshelesa Yehova ha Yoasi ho vha hu ha tshifhinganyana. Ndi ngani? Ipfi ḽa Mudzimu ḽi ri: “Misi Yoyada ó no dzama, vhahulwane vha Yuda vho ḓa vha losha khosi; khosi ya thetshelesa zwine vha amba. Vha shandukela nnḓu ya Yehova Mudzimu wa vho-khotsi-avho, vha losha milagalu na midzimu ya zwifanyiso. Mbiti dza Yehova dza mbo dugela Yuda na Yerusalema nga wonoyu mulandu.” Ṱhuṱhuwedzo i si yavhuḓi ya vhakololo vha Yuda yo ita uri khosi i sa thetshelese vhaporofita vha Mudzimu, muṅwe wavho o vha e murwa Yoyada ane a pfi Sakaria, we a kaidza Yoasi na vhathu o khwaṱha nga ṅwambo wa u sa thetshelesa havho. Nṱhani ha u rembuluwa, Yoasi o laedza uri Sakaria a kanḓiwe nga matombo a fe. Yoasi o vha muthu wa tshiṱuhu na a sa thetshelesi lungafhani—zwoṱhe zwi bveledzwa nga ṅwambo wa u thetshelesa ṱhuṱhuwedzo ya khonani mmbi!—2 Koronika 24:17-22; 1 Vha-Korinta 15:33.
9. Zwe zwa bvelela kha Yoasi na vhakololo zwo ombedzela hani vhutsilu ha u sa thetshelesa?
9 Musi vho no laṱa Yehova, Yoasi na khonani dzawe mmbi dza vhakololo vho bvela hani phanḓa? Mmbi ya Vhasiria ye ya vha “i si khulu,” ya dzhena Yuda nahone ya “vha vhulaha vhoṱhe vhahulwane vha vhathu vhawe.” Maswole vha kombetshedza khosi uri i vha ṋee thundu yawe yoṱhe u katela na musuku na tsimbi-tseṱha zwa nnḓu khethwa. Naho Yoasi o ponya, o sala e si tshee na nungo nahone a tshi khou lwala. Nga u ṱavhanya nga murahu ha zwenezwo, vhafheṱi vha bvaho kha vhaṅwe vha vhashumeli vhawe vha mu vhulaha. (2 Koronika 24:23-25; 2 Dzikhosi 12:17, 18) Maipfi a Yehova e a a vhudza Vhaisiraele ane a ri: ‘Arali wá sa pfa zwine Yehova Mudzimu wau a amba, wá sa tevhedza dzindaelá dzawe dzoṱhe wa ita zwine milayo yawe ya amba . . . , u ḓo welwa nga khombo,’ o vha e a ngoho lungafhani!—Doiteronomio 28:15.
Muṅwaleli We Tshidzwa Nga Ṅwambo Wa U Thetshelesa
10, 11. (a) Ndi ngani zwi tshi thusa u humbula nga ha nyeletshedzo ye Yehova a i ṋea Baruki? (b) Ndi nyeletshedzo ifhio ye Yehova a i ṋea Baruki?
10 Naa nga zwiṅwe zwifhinga ni a fhela maanḓa nga ṅwambo wa uri kha vhathu vhane na ṱangana navho vhuḓinḓani ha Vhukriste ndi vha si gathi fhedzi vhane vha sumbedza dzangalelo kha mafhungo maḓifha? Naa nga tshiṅwe tshifhinga ni ḓipfa ni tshi khou tama u wana lupfumo na nḓila ine na nga ḓiphina ngayo nge na lu wana? Arali zwo ralo, humbulani zwavhuḓi nga Baruki, muṅwaleli wa Yeremia, na kha nyeletshedzo ya lufuno ye a i ṋewa nga Yehova.
11 Baruki o vha e mushumoni wawe wa u ṅwala mulaedza wa vhuporofita musi Yehova a tshi thoma u livhisa ṱhogomelo yawe khae. Ndi ngani? Ngauri Baruki o thoma u sa takalela nḓila ye a vha a tshi khou tshila ngayo, nahone a ṱoḓa u wana zwiṅwe zwithu zwa khwine nṱhani ha tshumelo yawe yo khetheaho kha Mudzimu. A tshi vhona u shanduka ha mavhonele a Baruki, Yehova o mu ṋea nyeletshedzo i pfalaho na ya vhulenda musi a tshi ri: “U itela’ni U tshi ḓi-ṱoḓela [“zwithu, NW”]zwihulwane? U songo zwi ṱoḓa. U ḓivhe zwauri ndi ḓisa khombo kha ṋama yoṱhe; . . . á vha iwe ndi U ṋea vhutshilo hau, uri hoṱhe hune nda ḓo U isa U bve wo tou shavha naho’.”—Yeremia 36:4; 45:5.
12. Ndi ngani ri tshi fanela u iledza u ḓiṱoḓela “zwithu zwihulwane” zwa ano maitele a zwithu?
12 Naa ni a kona u vhona ṱhogomelo kha maipfi a Yehova e a a vhudza Baruki, munna muvhuya, we a mu shumela nga u fhulufhedzea na nga tshivhindi khathihi na Yeremia? Nga hu fanaho ṋamusi, Yehova u a vhilaelela vhukuma vhane vha lingea u tovhola zwine vha humbula uri ndi vhutshilo havhuḓi ha ano maitele a zwithu. Zwi takadzaho ndi uri vhunzhi ha vhathu vho raloho vho thetshelesa nyeletshedzo ya lufuno ya vhahashu vho vhibvaho muyani. (Luka 15:4-7) Ee, u nga ri roṱhe ri nga ṱhogomela uri a huna vhumatshelo havhuḓi kha vhane vha ḓiṱoḓela “zwithu zwihulwane” zwa ano maitele. Vhenevho vhathu a vha nga ḓo kundelwa nga u wana dakalo ḽa vhukuma fhedzi, fhedzi zwihulwane vhukuma, hu si kale vha ḓo fheliswa na ḽino shango na nyemulo dzaḽo dza tseḓa.—Mateo 6:19, 20; 1 Yohane 2:15-17.
13. Ndi gundo ifhio ya u ḓiṱukufhadza ine ra i wana kha mafhungo a Baruki?
13 Mafhungo a Baruki a dovha a ri funza ngudo yavhuḓi ya u ḓiṱukufhadza. Ṱhogomelani uri Yehova ho ngo eletshedza Baruki nga ene muṋe, fhedzi o shumisa Yeremia, we Baruki a vha tshi ḓivha vhukuma u sa fhelela hawe na matshilele awe. (Yeremia 45:1, 2) Naho zwo ralo, Baruki ho ngo ḓikukumusa; o humbula nga u ḓiṱukufhadza fhethu hune yeneyo nyeletshedzo ya bva hone—kha Yehova. (2 Koronika 26:3, 4, 16; Mirero 18:12; 19:20) Ngauralo arali ra ‘kanganyiswa ra vhuya ra khakha’ nahone ra wana nyeletshedzo yo teaho i bvaho Ipfini ḽa Mudzimu, kha ri edzise u vhibva ha Baruki, vhuṱali ha zwa muya, na u ḓiṱukufhadza hawe.—Vha-Galata 6:1.
14. Ndi ngani zwi tshi vhuyedza u thetshelesa vhathu vho ri rangaho phanḓa?
14 U vha na mavhonele o raloho a u ḓiṱukufhadza zwi dovha zwa thusa na vhane vha khou ri ṋea nyeletshedzo. Vha-Heberu 13:17 i ri: “Ipfani vha-ranga-phanḓa vhaṋu ni vha tevhele, ngauri vha linda mimuya yaṋu vhe vhone vhane vha ḓo sengiswa zwe vha ni ita; vha pfeni, uri vha shume vhó takala, vhá sa fhihamelwi; izwo a zwi ni farisi tshithu.” Vhahulwane vha tshivhidzo vha rabela lunzhi vhukuma kha Yehova u itela u wana tshivhindi, vhuṱali, na vhutsila zwi ṱoḓeaho u itela u ḓadzisa tshenetshi tshipiḓa tshi konḓaho tsha mushumo wavho wa vhulisa! Ri fanela u “dzhiela nṱha vhanna vho raloho.”—1 Vha-Korinta 16:18, NW.
15. (a) Yeremia o sumbedza hani uri u a fhulufhela Baruki? (b) Baruki o lambedzwa hani nga ṅwambo wa u thetshelesa nga u ḓiṱukufhadza?
15 Zwi vhonala uri Baruki o ita tshanduko, samusi Yeremia o dovha a mu ṋea muṅwe mushumo u konḓaho vhukuma—wa u ya thembeleni nahone a vhalela nṱha mulaedza wa khaṱulo we a tou ṅwala a tshi laedzwa nga Yeremia. Naa Baruki o thetshelesa? Ee, o ita “zwenezwo zwoṱhe zwe muporofita Yeremia a mu vhudza.” Zwi re zwone ndi ri o dovha a vhalela vhakololo vha Yerusalema mulaedza u fanaho, zwithu zwe vhukuma zwa ṱoḓa tshivhindi tshihulwane. (Yeremia 36:1-6, 8, 14, 15) Musi muḓi u tshi fheliswa nga Vhababele nga murahu ha miṅwaha i ṱoḓaho u vha ya 18, edzani u humbula dakalo ḽe Baruki a nga vho o vha e naḽo musi a tshi ponyoka nga ṅwambo wa u thetshelesa tsevho ya Yehova nahone a litsha u ḓiṱoḓela “zwithu zwihulwane.”—Yeremia 39:1, 2, 11, 12; 43:6.
U Thetshelesa Musi Vho Govhelwa Ho Vha Tshidza
16. Yehova o sumbedza hani u pfela Vhayuda vhuṱungu musi Yerusalema wo govhelwa nga Vhababele nga 607 B.C.E.?
16 U pfela vhuṱungu ha Mudzimu vhathu vha thetshelesaho ho dovha ha vhonala musi Yerusalema hu tshi fheliswa nga 607 B.C.E. Musi u govhelwa ho no tou ṋaṋa, Yehova o vhudza Vhayuda a ri: “Nangani, dzinḓila ngedzi; kana ni fara nḓila ya vhutshilo, kana ni fara nḓila ya lufu. Ane a dzula muḓini uno u ḓo vhulahwa nga pfumo, na nga nḓala, na nga dwadze. Hone, ane a bva a luvha Vha-Kaladea vho ni tangaho, u ḓo hanya a bva a tshi tshila.” (Yeremia 21:8, 9) Naho vhadzulapo vha Yerusalema vho vha vho tewa nga u fheliswa, Yehova o pfela vhuṱungu vhe vha mu thetshelesa, na nga tshenetsho tshifhinga tsha u fhedza tshi ofhisaho.b
17. (a) U thetshelesa ha Yeremia ho lingiwa hani musi Yehova a tshi mu laedza uri a vhudze Vhayuda vho govhelwaho uri ‘vha luvhe Vha-Kaladea’? (b) Ri nga vhuyelwa hani nga tsumbo ya Yeremia ya u thetshelesa nga tshivhindi?
17 U vhudza Vhayuda uri vha luvhe a zwi timatimisi uri zwi nga vha zwo linga na u thetshelesa ha Yeremia. Tshiṅwe tshiitisi tshi nga vha tshi tsha uri o vha a tshi fhisetshela dzina ḽa Mudzimu. O vha a sa ṱoḓi ḽi tshi nyadziwa nga maswina vhe vha vha vha tshi ḓo ḓirwa khana uri vho vha kunda nge vha thuswa nga midzimu yavho i sa tshili. (Yeremia 50:2, 11; Zwililo 2:16) Zwiṅwe hafhu, Yeremia o vha a tshi zwi ḓivha uri u vhudza vhathu uri vha luvhe, o vha a tshi khou vhea vhutshilo hawe khomboni khulwane, samusi vhathu vhanzhi vho vha vha tshi ḓo dzhia zwe a amba zwi vhuravhele. Naho zwo ralo, ho ngo dzhenwa nga nyofho, fhedzi o thetshelesa nahone a amba khaṱulo ya Yehova. (Yeremia 38:4, 17, 18) U fana na Yeremia, na riṋe ri vhudza vhathu mulaedza vha sa u takaleli. Ndi mulaedza we na Yesu a vhengelwa wone. (Yesaya 53:3; Mateo 24:9) Nga zwenezwo ri songo “ofha vhathu,” fhedzi u fana na Yeremia, kha ri thetshelese Yehova nga tshivhindi, ri tshi mu fhulufhedza nga vhuḓalo.—Mirero 29:25.
U Thetshelesa Ro Sedzana Na U Vutshelwa Nga Gogo
18. Ndi milingo ifhio ya u thetshelesa ine vhashumeli vha Yehova vha ḓo sedzana nayo tshifhingani tshi ḓaho?
18 Hu si kale, maitele oṱhe mavhi a Sathane a ḓo fheliswa musi “vhuṱungu vhuhulu” vhu sa athu vhuya ha vha hone vhu tshi swika. (Mateo 24:21) A zwi timatimisi uri nga phanḓa ha zwenezwo na tshifhingani tshazwo, vhathu vha Mudzimu vha ḓo lingiwa vhukuma lutendo na u thetshelesa havho. Sa tsumbo, Bivhili i ri vhudza uri Sathane, e mushumoni wawe sa “Gogo kha ḽa Mágogo,” u ḓo vutshela tshoṱhe vhashumeli vha Yehova, a tshi lugiselela mmbi u itela u ita zwo ṱaluswaho sa ‘mmbi khulu . . . i ngoho gole ḽo tibedzaho shango.’ (Hesekiele 38:2, 14-16) Naho vhe vhanzhi nahone vhe si na zwiṱhavhane, vhathu vha Mudzimu vha ḓo ṱoḓa u khuda nga fhasi ha “phapha” dza Yehova, dzine a dzi ṱharamudza u itela u tsireledza vha mu thetshelesaho.
19, 20. (a) Ndi ngani u thetshelesa ha Vhaisiraele ho vha hu ha ndeme vhukuma musi vhe Lwanzheni Lutswuku? (b) U elekanya zwavhuḓi nga thabelo mafhungo a Lwanzhe Lutswuku zwi ri vhuyedza hani ṋamusi?
19 Hovhu vhuimo vhu ri humbudza ha Vhaisiraele musi vha tshi Pfuluwa Egipita. Nga murahu ha u rwa Vhaegipita nga ṱhamu dza fumi dzi vhavhaho, Yehova o ranga phanḓa vhathu vhawe nga nḓila ya kule i yaho Shangoni ḽo Fhulufhedziswaho, nḓila i bvaho nga Lwanzheni Lutswuku, he vha vha vha tshi nga kundiwa na u vutshelwa nga hu leluwaho. Yeneyo nḓila yo vha i na khombo musi ri tshi sedza mmbi yavho. Arali ni vhe ni henefho, naa no vha ni sa nga si thetshelese ipfi ḽa Yehova ḽe a ḽi vhudza Mushe nahone na tshimbila ni tshi ya Lwanzheni Lutswuku ni na fhulufhelo, naho ni tshi zwi ḓivha uri Shango ḽo Fulufhedziswaho ḽi thungo yo fhambanaho na ine ya khou ya hone?—Ekisodo 14:1-4.
20 Musi ri tshi vhala Ekisodo ndima ya 14, ri vhona nḓila ye Yehova a tshidza ngayo vhathu vhawe a tshi shumisa maanḓa mahulwane vhukuma. Eneo mafhungo a khwaṱhisa lutendo lwashu lungafhani musi ri tshi a guda nga vhuronwane nahone ra elekanya ngao! (2 Petro 2:9) Nga hu fanaho, lutendo lwo khwaṱhaho lu ita uri ri thetshelese Yehova, naho milayo yawe i tshi vhonala i sa tendelani zwine ra zwi humbula. (Mirero 3:5, 6) Ngauralo ḓivhudziseni hezwi, ‘Naa ndi khou lwela u khwaṱhisa lutendo lwanga nga u guda Bivhili nga vhuronwane, nga u rabela, na u elekanya, khathihi na u konana na vhathu vha Mudzimu misi yoṱhe?’—Vha-Heberu 10:24, 25; 12:1-3.
U Thetshelesa Hu Ṋea Fhulufhelo
21. Vhathu vhane vha thetshelesa Yehova vha ḓo wana phaṱhutshedzo dzifhio ṋamusi khathihi na tshifhingani tshi ḓaho?
21 Vhathu vhane vha thetshelesa Yehova vhutshiloni havho vha vhona u ḓadzea ha Mirero 1:33 ṋamusi, ine ya ri: “Hone ane a pfa nṋe, u ḓo dzula ó takala; u ḓo fhaṱa á sa ofhi khombo.” Enea maipfi a khuthadzaho a ḓo shuma nga nḓila i mangadzaho lungafhani nga ḓuvha ḽa Yehova ḽine ḽa khou ḓa ḽa u lifhedza! Vhukuma, Yesu o vhudza vhafunziwa vhawe a ri: “Zwauralo zwi tshi thoma u vhonala, ni lilale, ni imise dziṱhóho dzaṋu, ngauri tshifhinga tshaṋu tsha u rengululwa tshi khou sendela.” (Luka 21:28) Zwi khagala uri ndi vha thetshelesaho Mudzimu fhedzi vhane vha ḓo vha na fhulufhelo ḽa u thetshelesa enea maipfi.—Mateo 7:21.
22. (a) Vhathu vha Yehova vha na tshiitisi tshifhio tsha u vha na fhulufhelo? (b) Ndi mafhungo afhio ane a ḓo haseledzwa theroni i tevhelaho?
22 Tshiṅwe tshiitisi tsha u vha na fhulufhelo ndi tsha uri “Muṋe wa vhoṱhe Yehova ha nga iti tshithu, á songó ranga a vhudza vhaḓinḓa vhawe vha vhaporofita.” (Amosi 3:7) Ṋamusi, Yehova ha tsha hevhedza vhaporofita u fana na kale; nṱhani hazwo, o laedza tshigwada tsha mukoma a fhulufhedzeaho uri tshi ṋee vha nnḓu yawe zwiḽiwa zwa muya nga tshikhathi tshazwo. (Mateo 24:45-47) Nga zwenezwo, ndi zwa ndeme lungafhani uri ri thetshelese onoyo “mukoma”! Samusi thero i tevhelaho i tshi ḓo sumbedza, honohu u thetshelesa hu dovha ha sumbedza nḓila ine ra dzhia ngayo Yesu, muṋe wa “mukoma.” Ndi Ene o ‘tewaho nga u pfiwa nga dzitshakha.’—Genesi 49:10.
[Ṱhaluso dzi re magumoni a siaṱari]
a Iṅwe bugu ya dzangano ḽa u tsireledza zwipuka i amba uri naho a tshi vhonala o tshuwa, “mme anga nga lwa u swika a tshi fa u itela u tsireledza zwikukwana uri zwi sa huvhadziwe.”
b Yeremia 38:19 i sumbedza uri vhunzhi ha Vhayuda vho “luvha” Vhakaladea nahone vha iswa vhuthubwani nṱhani ha u vhulahwa. A ro ngo vhudzwa arali vho luvha nge vha thetshelesa maipfi a Yeremia. Naho zwo ralo, u ponya havho ho khwaṱhisedza maipfi a muporofita.
Naa Ni A Zwi Humbula?
• U sa thetshelesa lunzhi-lunzhi ha Vhaisiraele ho vha na mvelelo ifhio?
• Khosi Yoasi o kwamea hani nga khonani dzawe, musi a tshee muṱuku na musi o no aluwa?
• Ri guda mini kha Baruki?
• Ndi ngani vhathu vha Yehova vha thetshelesaho vha songo fanela u ofha musi ano maitele e tsini na u fheliswa?
[Tshifanyiso kha siaṱari 13]
Musi a tshi khou livhiswa nga Yoyada, Yoasi we a vha a kha ḓi vha muswa o thetshelesa Yehova
[Tshifanyiso kha siaṱari 15]
Khonani mmbi dzo ṱuṱuwedza Yoasi uri a vhulahe vhaporofita vha Mudzimu
[Tshifanyiso kha siaṱari 16]
Naa no vha ni tshi ḓo thetshelesa Yehova nahone na vhona maanḓa awe mahulwane a u tshidza?