Naa Ni na Mavhonele a Yehova nga ha Zwithu Zwikhethwa?
‘Ni lavhelese uri . . . hu si vhe na a re phombwe, kana a sa dzhieli nṱha zwithu zwikhethwa.’—VHA-HEBERU 12:15, 16, vhambedzani NW.
1. Ndi mavhonele afhio o ḓoweleaho ane vhashumeli vha Yehova vha sa ṱanganele khao?
SHANGO nga u tou angaredza a ḽi ṱhogomeli zwithu zwikhethwa. Edgar Morin mugudi wa zwa matshilisano wa Mufura o ri: “Mitheo yoṱhe yavhuḓi ya vhuḓifari—ya Mudzimu, mupo, shangohaya, ḓivhazwakale, na zwiṱuṱuwedzi—a i tsha ṱhonifhiwa. . . . Vhathu vha ḓikhethela zwine vha vhona zwi zwa ndeme.” Hezwi zwi sumbedza “muya wa shango,” kana “muya u ḓi-sumbedzaho zwino kha vhana vha u sa pfa.” (1 Vha-Korinta 2:12; Vha-Efesa 2:2) Wonoyu muya wa u sa ṱhonifha a u sumbedzwi nga vhathu vho ḓiṋekedzeho kha Yehova na vhe vha ḓiṱukufhadzela vhuvhusi hawe ho lugaho nga u ḓifunela. (Vha-Roma 12:1, 2) Nṱhani hazwo, vhashumeli vha Mudzimu vha a ṱhogomela nḓila ine vhukhethwa ha vha ha ndeme ngayo, vhurabelini havho kha Yehova. Ndi zwithu zwifhio vhutshiloni hashu zwine zwa fanela u vha zwikhethwa? Heyi thero i ḓo haseledza zwithu zwiṱanu zwine zwa vha zwikhethwa kha vhashumeli vhoṱhe vha Mudzimu. Thero i tevhelaho i ḓo livhisa ṱhogomelo kha vhukhethwa ha miṱangano yashu ya Vhukriste. Fhedzi ipfi “mukhethwa” ḽi amba mini zwa vhukuma?
2, 3. (a) Maṅwalo a ombedzela hani vhukhethwa ha Yehova? (b) Ri dzhia dzina ḽa Yehova sa tshithu tshikhethwa nga nḓila-ḓe?
2 Kha Luheberu lwa Bivhilini, ipfi “mukhethwa” ḽi sumbedza muhumbulo wa u fhambanyisa. Kha vhurabeli, ipfi “mukhethwa” ḽi shuma kha tshithu tsho fhambanaho na tsho ḓoweleaho, kana tshithu tshine tsha dzhiiwa tshi tshikhethwa. Yehova ndi mukhethwa nga muhumbulo wo fhelelaho. U vhidzwa u pfi ndi “Ene Mukhethwa.” (Mirero 9:10; 30:3) Kha ḽa Isiraele ḽa kale, tshifhe muhulu o vha a tshi ambara muṅadzi wo vhofhelelwaho kubaphathi kwa musuku kwo ṅwalwaho maipfi ane a ri “Vhukhethwa ndi ha Yehova.” (Ekisodo 28:36, 37, NW) Vhakerube na vhaserafe vha ṱaḓulu vho imaho tsini na khuluṋoṋi ya Yehova, Maṅwaloni vho ṱaluswa sa vhane vha ḓivhadza u ri: “Mukhethwa, Mukhethwa, Mukhethwa ndi Yehova.” (Yesaya 6:2, 3; Ndzumbululo 4:6-8) U dovhololwa honoho hu sumbedza uri Yehova ndi mukhethwa, o kuna, nahone ndi mukhethwa vhukuma. I ngoho, ndi ene Tshisima tsha vhukhethwa hoṱhe.
3 Dzina ḽa Yehova ndi ḽikhethwa. Mupsalme o ri: “Dzina ḽau ḽihulu ḽi ofhisaho nga ḽi khoḓiwe. Mukhethwa ndi Ene.” (Psalme ya 99:3) Yesu o ri funza u rabela a ri: “Khotsi-ashu wa ṱaḓulu! dzina ḽau ḽi khethwe.” (Mateo 6:9) Mme a Yesu wa kha ḽifhasi, Maria, o amba a ri: “Mbilu yanga i hulisa Murena [Yehova] . . . Wa-Maanḓa o ṋyita zwithu zwihulu, ané ene dzina ḽawe ḽa vha ḽikhethwa.” (Luka 1:46, 49) Sa vhashumeli vha Yehova, ri dzhia dzina ḽawe sa tshithu tshikhethwa nahone ri iledza u ita naho tshi tshini tshine tsha nga ḓisela ḽeneḽo dzina ḽikhethwa samba. Zwiṅwe hafhu, ri na mavhonele a fanaho na a Yehova nga ha zwithu zwikhethwa, zwine zwa amba uri zwithu zwine a zwi dzhia zwi zwikhethwa na riṋe ri zwi dzhia zwi zwikhethwa.—Amosi 5:14, 15.
Zwi Itaho Uri Ri Ṱhonifhe Yesu Nga ho Dzikaho
4. Ndi ngani Bivhili i tshi ṱalusa Yesu sa “Mukhethwa”?
4 Samusi e “murwa mu-bebwa-eṱhe” wa Mudzimu mukhethwa Yehova, Yesu o sikwa e mukhethwa. (Yohane 1:14; Vha-Kolosa 1:15; Vha-Heberu 1:1-3) Nga zwenezwo u vhidzwa “Mukhethwa wa Mudzimu.” (Yohane 6:69, NW) O vha e mukhethwa musi vhutshilo hawe vhu tshi fhiriselwa kha ḽifhasi u bva ṱaḓulu, ndi ngazwo Maria o beba Yesu nga maanḓa a muyamukhethwa. Muruṅwa o mu vhudza a ri: “Muya mukhethwa u ḓo ḓa kha iwe, . . . ndi zwiné ane a ḓo bebiwa nga iwe a ḓo pfi Murwa wa Mudzimu ngazwo’.” (Luka 1:35) Vha tshi rabela Yehova, Vhakriste vha ngei Yerusalema vho amba luvhili nga ha Murwa wa Mudzimu vha ri ndi “Yesu ṅwana wau mukhethwa.”—Mishumo 4:27, 30.
5. Ndi mushumo ufhio mukhethwa we Yesu a u ita kha ḽifhasi, nahone ndi ngani malofha awe e a thengo khulu?
5 Yesu o vha e na mushumo mukhethwa we a vha a tshi fanela u u ita musi e kha ḽifhasi. Nga 29 C.E., musi a tshi lovhedzwa, Yesu o ḓodzwa sa Tshifhe Muhulu wa thembele khulwane ya muya ya Yehova. (Luka 3:21, 22; Vha-Heberu 7:26; 8:1, 2) Zwiṅwe hafhu, o vha a tshi ḓo fa sa tshiṱhavhelo. Malofha awe o shululwaho a ḓo ṋekedza tshiṱhavhelo tshi rengululaho tshine vhaitazwivhi vhoṱhe vha ḓo tshidzwa ngatsho. (Mateo 20:28; Vha-Heberu 9:14) Nga zwenezwo ri dzhia malofha a Yesu sa tshithu tshikhethwa, sa a re a “thengo khulu.”—1 Petro 1:19.
6. Mavhonele ashu ndi afhio malugana na Kristo Yesu, nahone ndi ngani?
6 A tshi sumbedza uri ri a ṱhonifha nga ho dzikaho Khosi yashu na Tshifhe Muhulu, Kristo Yesu, muapostola Paulo o ṅwala a ri: “Mudzimu a simesa u hulisa [Murwa wawe] ngazwo’, a mu tonda nga ḽone dzina ḽi fhiraho madzina oṱhe. Uri dzinani ḽa Yesu magona oṱhe a gwadame, a vha ṱaḓulu na vha fhano fhasi na vha ḓasi ha mavu, ndimi dzoṱhe dzi bvumele zwauri: Yesu Kristo ndi ene Murena, hu vhe u renda Mudzimu Khotsi.” (Vha-Filipi 2:9-11) Ri sumbedza uri ri na mavhonele a fanaho na a Yehova nga ha zwithu zwikhethwa nga u ḓiṱukufhadzela nga dakalo Murangaphanḓa washu na Khosi i vhusaho, Kristo Yesu, Ṱhoho ya tshivhidzo tsha Vhukriste.—Mateo 23:10; Vha-Kolosa 1:18.
7. Ri sumbedza hani uri ri a ḓiṱukufhadza kha Kristo?
7 U ḓiṱukufhadza kha Kristo zwi katela u ṱhonifha nḓila yo teaho vhanna vhane a vha shumisa u itela u ranga phanḓa mushumo une a khou livhisa zwino. Mushumo wa vho ḓodzwaho nga muya vhane vha vhumba Tshigwada tshi Langaho na wa vhalavhelesi vho vhewaho ngavho madavhini, zwiṱirikini, kha maisela, na zwivhidzoni u fanelwa u dzhiiwa sa vhuḓifhinduleli vhukhethwa. Ngauralo, ri fanela u ṱhonifha yeneyi ndugiselelo nga ho dzikaho khathihi na u ḓiṱukufhadzela yone.—Vha-Heberu 13:7, 17.
Vhathu Vhakhethwa
8, 9. (a) Vhaisiraele vho vha vhe vhathu vhakhethwa nga nḓila-ḓe? (b) Yehova o ombedzela hani maitele a vhukhethwa kha Vhaisiraele?
8 Yehova o vhofha mulanga na Vhaisiraele. Honovhu vhushaka ho ṋea lwonolwo lushaka luswa vhuimo ho khetheaho. Vho vha vhe vhakhethwa, kana vho vha vho fhambana na vhaṅwe. Yehova ene muṋe o vha vhudza a ri: “Ivhani vhakhethwa, ngauri Nṋe Yehova ndi̗ Mukhethwa; ndo ni nanga kha dzitshakha uri ni vhe vhathu vhanga.”—Levitiko 19:2; 20:26.
9 Musi hu tshi bebwa lushaka lwa Isiraele, Yehova o ombedzela kha Vhaisiraele maitele a u vha mukhethwa. Musi vhe vhuṱunguni ha lufu, vho vha vha songo tendelwa u fara thavha ye ha ṋekedzwa khayo Milayo ya Fumi. Nga zwenezwo Thavha ya Sinai yo vha i tshi dzhiiwa sa thavha khethwa. (Ekisodo 19:12, 23) Vhotshifhe, nnḓu ya mulanga, na thundu dza hone zwo vha zwi tshi dzhiiwa zwi zwikhethwa. (Ekisodo 30:26-30) Ndi tshifhio tshiimo tshivhidzoni tsha Vhukriste?
10, 11. Ndi ngani hu tshi nga ambiwa uri tshivhidzo tsha Vhakriste vho ḓodzwaho ndi tshikhethwa, nahone zwenezwi zwi kwama hani vha “dziṅwe nngu”?
10 Tshivhidzo tsha Vhakriste vho ḓodzwaho ndi tshikhethwa maṱoni a Yehova. (1 Vha-Korinta 1:2) Zwi re zwone ndi uri tshigwada tshoṱhe tsha Vhakriste vho ḓodzwaho kha ḽifhasi nga tshiṅwe tshifhinga tshi fanyiswa na thembele khethwa, naho tshi sa vhumbi thembele khulwane ya muya ya Yehova. Yehova u dzula kha yeneyo thembele nga muyamukhethwa wawe. Muapostola Paulo o ṅwala a ri: “[Kristo Yesu] ané tshifhaṱo tshoṱhe tsha aluwa khae’, nga u fhaṱiwa lwa u tou vhofhekanya ya vha nnḓu khethwa Murenani, ye na inwi na tsheṱelwa khayo’-vho, uri i vhe pfamo ya Mudzimu muyani.”—Vha-Efesa 2:21, 22; 1 Petro 2:5, 9.
11 Paulo o bvela phanḓa u ṅwalela Vhakriste vho ḓodzwaho a ri: “A ni zwi ḓivhi naa, zwauri ni nnḓu khethwa ya Mudzimu, na zwauri Muya wa Mudzimu u dzula kha inwi? . . . nnḓu khethwa ya Mudzimu ndi tshiila, vho henenwi hafhu.” (1 Vha-Korinta 3:16, 17) Nga muyamukhethwa wawe, Yehova u “dzula” na u “tshimbila vhukati” ha vhaḓodzwa. (2 Vha-Korinta 6:16) U bvela phanḓa a tshi livhisa “mukoma” a fulufhedzeaho. (Mateo 24:45-47) Vha “dziṅwe nngu” vha takalela ndugelo ya u ṱanganela na vha tshigwada tsha “nnḓu khethwa.”—Yohane 10:16; Mateo 25:37-40.
Zwithu Zwikhethwa Vhutshiloni Hashu ha Vhukriste
12. Ndi zwithu zwifhio zwine zwa vha zwikhethwa vhutshiloni hashu, nahone ndi ngani?
12 A zwi mangadzi uri zwithu zwinzhi zwi tshimbidzanaho na vhutshilo ha miraḓo ya ḓodzwaho ya tshivhidzo tsha Vhukriste na khonani dzavho zwi dzhiiwa zwi zwikhethwa. Vhushaka hashu na Yehova ndi tshithu tshikhethwa. (1 Koronika 28:9; Psalme ya 36:7) Ndi zwa ndeme kha riṋe uri ri sa tendele naho tshi tshini naho hu nnyi a tshi fhelisa vhushaka hashu na Mudzimu washu, Yehova. (2 Koronika 15:2; Yakobo 4:7, 8) Thabelo ndi ya ndeme nga maanḓa u itela u dzula ri na vhushaka ha tsini na Yehova. Thabelo yo vha i khethwa kha muporofita Daniele lwe a bvela phanḓa na mukhuvha wawe wa u rabela Yehova naho o vha a tshi khou vhea vhutshilo hawe khomboni. (Daniele 6:7-11) “Dzithabelo dza vhakhethwa” kana dza Vhakriste vho ḓodzwaho, dzi fanyiswa na zwioro zwe zwa vha zwi tshi shumiswa thembeleni ya vhurabeli. (Ndzumbululo 5:8; 8:3, 4; Levitiko 16:12, 13) Yeneyi tsumbo i ombedzela vhukhethwa ha thabelo. Ndi ndugelo yavhuḓi lungafhani u kona u amba na Muvhusahoṱhe wa fhethu hoṱhe! Ndi ngazwo ri tshi dzhia thabelo i khethwa vhutshiloni hashu!
13. Ndi maanḓa afhio makhethwa, nahone ri fanela u a tendela uri a shume hani vhutshiloni hashu?
13 Hu na maanḓa vhutshiloni ha Vhakriste vho ḓodzwaho na khonani dzavho ane vha a dzhia e makhethwa nga nḓila khulwane—ane a vha muyamukhethwa. Wonoyo muya ndi maanḓa a Yehova a shumaho, nahone samusi tshifhinga tshoṱhe u tshi shuma u tendelana na zwine Mudzimu mukhethwa a zwi funa, u vhidzwa nga ho teaho uri ndi “muya mukhethwa,” kana “muya wa vhukhethwa.” (Yohane 14:26; Vha-Roma 1:4) A tshi shumisa muyamukhethwa, Yehova u ṋea vhashumeli vhawe maanḓa a u huwelela mafhungo maḓifha. (Mishumo 1:8; 4:31) Yehova u ṋea muya wawe “vha mu pfaho,” vhane vha ‘tshimbila lwa Muya,’ hu si nga nyemulo dza ṋama. (Mishumo 5:32; Vha-Galata 5:16, 25; Vha-Roma 8:5-8) Enea maanḓa mahulwane a ita uri Vhakriste vha kone u vha na “zwiaṋwiwa nga Muya”—pfaneleo dzavhuḓi—na “matshimbilele makhethwa na u ofha Mudzimu.” (Vha-Galata 5:22, 23; 2 Petro 3:11) Arali muyamukhethwa u tshithu tshikhethwa kha riṋe, ri ḓo iledza tshithu tshiṅwe na tshiṅwe tshine tsha nga ṱungufhadza wonoyo muya, kana tshine tsha nga u thivhela uri u sa shume vhutshiloni hashu.—Vha-Efesa 4:30.
14. Ndi ndugelo ifhio ine vho ḓodzwaho vha i dzhia i khethwa, nahone vha dziṅwe nngu vha ṱanganela hani kha yeneyi ndugelo?
14 Ndugelo ine ra vha nayo ya u vhidzwa nga dzina ḽa Mudzimu mukhethwa, Yehova, na u vha Ṱhanzi dzawe ndi tshiṅwe tshithu tshine ra fanela u tshi dzhia tshi tshikhethwa. (Yesaya 43:10-12, 15) Yehova ndi ene we a ita uri Vhakriste vho ḓodzwaho vha fanelee “u vha [vhaḓinḓa] vha mulanga muswa.” (2 Vha-Korinta 3:5, 6) Nga ṅwambo wa zwenezwo vho ṋewa mushumo wa u huwelela “mafhungo-maḓifha aya a muvhuso” na u “ita vhathu vhoṱhe vhafunziwa.” (Mateo 24:14; 28:19, 20) Vha khou bvela phanḓa vha tshi ita wonoyu mushumo nga u fulufhedzea, nahone vhathu vha dzimilioni vhane vha nga dzinngu vha khou aravha, nga lwa pfanyisedzo vha amba na vhaḓodzwa vha ri: “Litsha ri tshimbile na vho-inwi, ngauri ro zwi pfa zwauri Mudzimu u na inwi.” (Sakaria 8:23) Nga lwa muya vhenevha vha shuma nga dakalo sa ‘vhalimi’ na ‘vhasimi vha miṱokola’ vha tshi itela vhaḓodzwa vhane vha vha “vhaḓinḓa vha Mudzimu [washu].” Nga yeneyo nḓila, vha dziṅwe nngu vha thusa vhaḓodzwa nga nḓila khulwane kha u khunyeledza vhuḓinḓa havho shangoni ḽoṱhe.—Yesaya 61:5, 6.
15. Ndi mushumo ufhio we muapostola Paulo a u dzhia u mukhethwa, nahone ndi ngani na riṋe ri na mavhonele a fanaho?
15 Sa tsumbo, muapostola Paulo o dzhia vhuḓinḓa hawe ha khagala sa tshithu tshikhethwa. O amba uri u ‘muḓinḓa wa Kristo kha vha-nnḓa, ane a ita mushumo mukhethwa wa Mafhungo-maḓifha a Mudzimu.’ (Vha-Roma 15:16) Musi a tshi ṅwalela Vhakriste vha Korinta, Paulo o ambela kha vhuḓinḓa hawe sa “dzánga.” (2 Vha-Korinta 4:1, 7) Nga vhuḓinḓa hashu ha khagala, ri ḓivhadza “maipfi a Mudzimu.” (1 Petro 4:11) Nga zwenezwo, hu sa londwi uri ri vhaḓodzwa kana ri vha dziṅwe nngu, ri zwi dzhia zwi ndugelo khethwa u ṱanganela kha mushumo wa u huwelela.
“Ri Khunyeledze Vhukhethwa Hoṱhe Rí Tshi Ofha Mudzimu”
16. Ndi mini tshine tsha nga ri thusa u iledza u vha vhathu vhane vha sa ‘dzhiele nṱha zwithu zwikhethwa’?
16 Muapostola Paulo o sevha Vhakriste ngae nga ha u vha vhathu vhane vha sa ‘dzhiele nṱha zwithu zwikhethwa.’ Nṱhani hazwo, o vha eletshedza u ‘ṱoḓa zwikhethwa,’ na u ‘lavhelesa . . . uri hu si simuwe mudzi u kalakataho wa u ni fhiriṱanya, wa vhó ḓo shata vhanzhi dzitshika.’ (Vha-Heberu 12:14-16) Mubulo une wa ri “mudzi u kalakataho” u ambela kha vha si gathi tshivhidzoni tsha Vhukriste vhane vha sasaladza nḓila ine zwithu zwa itwa ngayo. Sa tsumbo, vha nga kha ḓi sa tendelana na mavhonele a Yehova nga ha vhukhethwa ha mbingano kana ṱhoḓea ya u kuna kha vhuḓifari. (1 Vha-Thesalonika 4:3-7; Vha-Heberu 13:4) Kana vha nga kha ḓi ṱanganela kha u phaḓaladza pfunzo dza vhagunei, “zwiamba-amba zwi sí na zwa Mudzimu” zwine zwa ṋekedzwa nga “vho khakhaho nḓila ya mafhungo-ngoho.”—2 Timotheo 2:16-18.
17. Ndi ngani hu tshi ṱoḓea uri vhaḓodzwa vha ite vhuḓidini tshifhinga tshoṱhe u itela u sumbedza mavhonele a Yehova nga ha vhukhethwa?
17 Paulo o ṅwalela vhahawe vho ḓodzwaho a ri: “Vhafunwa, nga ri ṱambe dzitshika dzoṱhe dza kha ṋama na kha muya, ri khunyeledze vhukhethwa hoṱhe rí tshi ofha Mudzimu.” (2 Vha-Korinta 7:1) Enea mafhungo a sumbedza uri Vhakriste vho ḓodzwaho, vho “vhidzwa[ho] ngei ṱaḓulu,” vha fanela u ita vhuḓidini tshifhinga tshoṱhe u itela u sumbedza uri vha edzisa nḓila ine Yehova a dzhia ngayo vhukhethwa kha masia oṱhe a vhutshilo havho. (Vha-Heberu 3:1) Zwi ngaho zwenezwo, muapostola Petro o ṱuṱuwedza vharathu vhawe vho ḓodzwaho nga muya a ri: “Ni vhe vhana vha u thetshelesa, ni songo vha vha dovhaho vha ḓi-vhambedza na dzinyemulo dza kale kha u-sa-ḓivha haṋu; Aiwa, vhunga ó ni vhidzaho e mukhethwa, na inwi ivhani vhakhethwa kha kutshimbilele kwaṋu kwoṱhe.”—1 Petro 1:14, 15.
18, 19. (a) Miraḓo ya vha “gogo ḽihulu” i sumbedza hani uri i na mavhonele a Yehova nga ha zwithu zwikhethwa? (b) Ndi tshifhio tshiṅwe tshithu tshikhethwa vhutshiloni hashu ha Vhukriste tshine tsha ḓo haseledzwa theroni i tevhelaho?
18 Hu pfi mini nga miraḓo ya vha “gogo ḽihulu,” vhane vha ḓo ponyoka “maṱungu mahulu”? Na vhone vha fanela u sumbedza uri vha tikedza mavhonele a Yehova nga ha zwithu zwikhethwa. Buguni ya Ndzumbululo vha vhidzwa sa vhane vha itela Yehova ‘tshumelo khethwa’ kha ḽifhasi muṱani wa thembele yawe ya muya. Vha na lutendo kha tshiṱhavhelo tsha Kristo tshi rengululaho, nga lwa pfanyisedzo “vho ṱanzwa vho tshenisa nguvho dzavho nga malofha a Ngwana.” (Ndzumbululo 7:9, 14, 15) Hezwi zwi vha ita vho kunaho phanḓa ha Yehova nahone zwi ita uri vha vhe na vhuḓifhinduleli ha uri vha “ṱambe dzitshika dzoṱhe dza kha ṋama na kha muya, [vha] khunyeledze vhukhethwa hoṱhe [vha] tshi ofha Mudzimu.”
19 Tshithu tsha ndeme vhutshiloni ha Vhakriste vho ḓodzwaho na khonani dzavho ndi u kuvhangana tshifhinga tshoṱhe u itela u gwadamela Yehova na u guda Ipfi ḽawe. Yehova u dzhia u kuvhangana ha vhathu vhawe sa tshithu tshikhethwa. Theroni i tevhelaho ri ḓo haseledza uri ndi ngani na uri ri nga vha hani na mavhonele a Yehova nga ha zwithu zwikhethwa kha enea masia a ndeme.
Nga Nḓila Ya U Vusulusa
• Ndi mavhonele afhio a shango ane vhashumeli vha Yehova vha si ṱanganele khao?
• Ndi ngani Yehova e Tshisima tsha zwoṱhe zwine zwa vha zwikhethwa?
• Ri zwi sumbedza hani uri ri ṱhonifha vhukhethwa ha Kristo?
• Ndi zwithu zwifhio zwine ra fanela u zwi dzhia zwi zwa ndeme vhutshiloni hashu?
[Tshifanyiso kha siaṱari 23]
Kha ḽa Isiraele ḽa kale, tshigwada tsha vhotshifhe, nnḓu ya mulanga, na thundu dzayo zwo vha zwi tshi dzhiiwa zwi zwikhethwa
[Tshifanyiso kha siaṱari 24]
Vhakriste vho ḓodzwaho vha vhumba thembele khethwa ya kha ḽifhasi
[Zwifanyiso kha siaṱari 25]
Thabelo na vhuḓinḓa hashu ha khagala ndi ndugelo khethwa