Yesu Kristo—Mulaedza Wawe wo Kwama Vhathu nga Nḓila-ḓe?

“Zwi re zwone ndi uri muthu wa vhuṱali a bvaho Kapernaume u kha ḓi bvela phanḓa a tshi ṱuṱuwedza dzimbilu na mihumbulo ya vhathu.”a—MUṄWALI GREGG EASTERBROOK.

MAIPFI a na maanḓa. Maipfi o khethiwaho zwavhuḓi a vhuṱali a nga kwama dzimbilu, a ṋea fulufhelo, nahone a shandula vhutshilo. A hu na muthu we a vha a tshi nga amba nga nḓila i re na maanḓa u fhira Yesu Kristo. Muṅwe we a pfa Yesu a tshi khou ṋekedza Pfunzo yawe ya Thavhani nga murahu o ṅwala uri: “Yesu ó fhedza u amba eneo mafhungo, vhathu vha kanuka pfunzo yawe.”—Mateo 7:28.

U swika na ṋamusi, vhunzhi ha zwe Yesu a zwi amba zwo ḓowelea kha vhathu ḽifhasini ḽoṱhe. Ṱhogomelani tsumbo dzi si gathi dza mibulo ya ndeme.

“A ni koni u ri Mudzimu na Mamona na vha shumela vhoṱhe.”—Mateo 6:24.

“Zwoṱhe zwiné na funa vhathu vha tshi ni ita, na inwi ni vha ite zwenezwo.”—Mateo 7:12.

“Khosi i ṋeeni-ha zwi re zwa khosi, Mudzimu ni mu ṋee zwi re zwa Mudzimu!”—Mateo 22:21.

“Mashudu a muṋei a fhira a muṋeiwa.”—Mishumo 20:35.

Yesu ho ngo amba mafhungo a ndeme fhedzi, fhedzi o amba zwe vhathu vha vha vha sa ḓo zwi hangwa. Mulaedza we a u huwelela wo vha u na maanḓa nga ṅwambo wa uri wo vha u tshi amba ngoho nga ha Mudzimu, u tshi funza vhathu nḓila ya u wana ndivho ya vhukuma ya vhutshilo, nahone o bula zwavhuḓi tshipiringululi tsha tshengelo yoṱhe ya vhathu, tshine tsha vha Muvhuso wa Mudzimu. Musi ri tshi ṱolisisa wonoyu mulaedza kha masiaṱari ane a ḓo tevhela, ri ḓo vhona zwo itaho uri Yesu a bvele phanḓa a tshi “ṱuṱuwedza dzimbilu na mihumbulo ya vhathu.”

[Ṱhaluso i re magumoni a siaṱari]