‘Vhafumakadzi Vha Shumaho Zwinzhi Murenani’
1 Nga maipfi a re afho nṱha, Paulo u ṱalusa Tirifena na Tirifosa, vhahashu vha tshisadzini vhavhili vha re vhashumi vha biko tshivhidzoni tsha Roma. A tshi amba nga muṅwe ane a pfi Peresisi, o ri: ‘O shuma zwinzhi Murenani.’ Nga hu fanaho o dovha a amba zwavhuḓi nga Foivhe a ri ndi “mufarisi wa vhanzhi.” (Vha-Roma 16:2, 12) Maṅwaloni, Doroka o ambiwa sa ane ‘mishumo mivhuya yawe ya vha minzhi, na u kovhela vhatshinyali.’ (Mish. 9:36) Vhukuma vhenevho vhafumakadzi vha muya ndi phaṱutshedzo yavhuḓi lungafhani tshivhidzoni!
2 Naa ri livhuha vhahashu vha tshisadzini vhane vha shuma nga maanḓa tshivhidzoni tshashu? Vha ita mushumo muhulwane wa u huwelela, vha fara vhunzhi ha pfunzo dza Bivhili, nahone vha thusa vhunzhi ha vhaswa ngohoni. Vha dovha vha fhedza tshifhinga tshinzhi vha tshi khou thusa vhana uri vha bvele phanḓa muyani. Vhafumakadzi vha Vhakriste vha ḓadzisa tshipiḓa tshavho nga u ita uri hu vhe na muya wa lufuno, dakalo, mulalo, na u fhisea tshivhidzoni. Vha thusa nga nḓila nnzhi u itela uri vhanna vhavho na miṅwe miraḓo ya muṱa i ite zwo engedzeaho tshumeloni ya Yehova.
3 Vhahashu vha Tshisadzini vha re Tshumeloni ya Tshifhinga Tshoṱhe: Vhukati ha vhane vha shuma nga maanḓa Murenani ndi vhahashu vha tshisadzini vha vharumiwa, vhanzhi vho ṱanganela kha u thoma mushumo mashangoni a sili. Zwivhidzoni zwine zwa dalelwa nga vhanna vhavho, vhafumakadzi vha vhalavhelesi vha dalelaho zwivhidzo vha farakanea vhuḓinḓani ha tsimu, vha tshi ṱuṱuwedza vhunzhi ha vhahashu vha tshisadzini. Ri songo hangwa vhahashu vha tshisadzini vha re Bethele, vhane vha fhisetshela tshumelo khethwa nga u tikedza ndangulo ya Yehova. Na vhahashu vha tshisadzini vha vhavulanḓila vha tshifhinga tshoṱhe, nga vhuḓidini havho ha u fulufhedzea vha tshi renda Mudzimu, vha khou thusa vha zwigidi u guda mafhungo-ngoho.
4 Vhenevha vhafumakadzi vha fulufhedzeaho vha fushea vhukuma nga matshilele avho a u ḓiṋekedza. (1 Tim. 6:6, 8) Ri fanela u vha khoḓa na u vha ṱuṱuwedza na u vha tikedza.
5 Vhafumakadzi vha Vhakriste ndi thuso ya ndeme ndanguloni ya Yehova, vha shuma mushumo wavhuḓi une wa ḓisa phaṱutshedzo kha vhoṱhe. Kha ri bvele phanḓa ri tshi livhuha vhenevho vhafumakadzi na u rabelela uri Yehova a vha fhaṱutshedze musi vha tshi bvela phanḓa vha tshi ‘shuma zwinzhi Murenani.’