U Khwinisa Vhutsila Hashu Vhuḓinḓani—U Thoma Nyambedzano U Itela U Ṱanziela Lu Songo Dzudzanywaho

Zwine Zwa Ita Uri Zwi Vhe Zwa Ndeme: Musi ri vhuḓinḓani ha nnḓu nga nnḓu, kanzhi ri wana miḓini hu si na vhathu. Naho zwo ralo, ri ṱangana na vhathu musi ro namela zwiendedzi zwa vhomuthumunzhi, nga tshifhinga tsha u awela mushumoni kana tshikoloni, na huṅwe fhethu. Yehova u ṱoḓa uri vhathu vhoṱhe vha wane tshibuli tsha u pfa mulaedza wa Muvhuso. (1 Tim. 2:3, 4) Kha zwiimo zwinzhi, u itela u huwelela, ri fanela u dzhia vhukando ha u thoma nyambedzano.

Nḓila ine Na Nga Zwi Ita Ngayo:

Sedzani tshiimo. Naa muthu a re tsini na inwi u vhonala e na vhuthu nahone a tshi takalela u amba? Naa zwiimo zwi a tenda uri ni fare nyambedzano no ḓigeḓa? Vhaṅwe vhahuweleli vha thoma nga u sedza muthu nahone vha ṅweṅwela. Arali na onoyo muthu a ṅweṅwela, vha a lingedza u thoma nyambedzano.
Itani thabelo pfufhi i bvaho mbiluni, arali ni si na tshivhindi tsha u amba.—Neh. 2:4; Mish. 4:29.
Thomani nga u amba nga zwithu zwo ḓoweleaho, khamusi ni nga thoma nga u mu lumelisa. Yesu ho ngo thoma nyambedzano yawe na mufumakadzi wa Musamaria nga u amba nga ha Muvhuso. (Yoh. 4:7) Nga zwiṅwe zwifhinga, nyambedzano i nga thomiwa nga u khoḓa muthu: “Vhana vhaṋu vha a tokomelwa!” U vhudzisa mbudziso ndi iṅwe nḓila ya u thoma nyambedzano: “Naa no u vhona muvhigo wa mafhungo madekwe?”
Musi nyambedzano yo no thoma, ṱoḓani tshibuli tsha u ḓivhadza mafhungo maḓifha, fhedzi ni songo ṱavhanyedzela u ita zwenezwo. Tendelani nyambedzano uri i ṱanḓavhuwe nga yone iṋe. Khamusi ni nga amba mbuno i vusaho dzangalelo ḽa u ṱoḓa u ḓivha nahone zwa ita uri muthu a vhudzise mbudziso. Sa tsumbo, arali nyambedzano i ya mafhungo a muṱa ni nga kha ḓi ri, “Ndo wana nyeletshedzo dzi shumaho vhukuma dza malugana na u alusa vhana.” Arali ni tshi khou haseledza thero i bvaho kha mafhungo a shango, ni nga kha ḓi ri, “Ndi kha ḓi tou bva u vhala mafhungo a nyanyulaho a sa fani na mavhi ane ra dzulela u a pfa.” Ni songo kulea nungo arali nyambedzano ya fhela ni sa athu u ṱanziela.
Tshimbilani na zwibammbiri kana dziṅwe khandiso dzine na nga ṋea muthu a re na dzangalelo.

Uno Ṅwedzi Lingedzani Hezwi:

Vhege iṅwe na iṅwe lingedzani u thoma nyambedzano ni na tshipikwa tsha u ṱanziela lu songo dzudzanyaho.