U Sendela Tsini Na Vhahashu Zwi A Ri Vhuyedza

1-2. Ndi mini zwine Yehova a zwi dzhiela nṱha nahone u ṱoḓa ri tshi ita mini?

YEHOVA u dzhiela nṱha nḓila ine ra fara ngayo vhaṅwe. Yesu o ri funza uri ri tea u funa vhahura vhashu vhu nga ri tshi ḓifuna. (Mat. 22:37-39) Zwenezwo zwi katela na u sumbedza vhuthu vhane vha si shumele Yehova. Musi ri tshi ita nga u ralo, ri vha ri tshi khou edzisa Yehova Mudzimu ane a “ṱavhisela ḓuvha vhavhi na vhavhuya na u nisela mvula vho lugaho na vha songo lugaho.”​—Mat. 5:45.

² Naho Yehova a tshi funa vhathu vhoṱhe, u funesa nga maanḓa vhane vha ita zwo lugaho. (Yoh. 14:21) U ṱoḓa na riṋe ri tshi mu edzisa. Ndi ngazwo a tshi ri ṱuṱuwedza uri ri ‘fune vhahashu nga maanḓa’ na uri ri “funane zwi tshi bva mbiluni.” (1 Pet. 4:8; Vharoma 12:10) U funa vhahashu nga yeneyi nḓila, zwi ḓo fana na nḓila ine ra nga funa ngayo shaka kana khonani ya tsini.

3. Ri tea u ita mini uri lufuno lwashu lu engedzee?

³ Ri nga fanyisa lufuno na tshimela tshine muthu a tshi ṱavha ngadeni. Uri tshenetsho tshimela tshi aluwe, tshi tea u ṱhogomeliwa. Muapostola Paulo o vhudza Vhakriste a ri: “Dzulani ni tshi funana sa vharathu na vhakomana.” (Vhahev. 13:1) Yehova u ṱoḓa uri ri bvele phanḓa ri tshi funa vhahashu nga yeneyi nḓila. Kha ino thero, ri ḓo haseledza uri ndi ngani ri tshi tea u sendela tsini-tsini na vhahashu na uri ri nga bvela hani phanḓa ri tshi zwi ita.

NDI NGANI RI TSHI TEA U SENDELA TSINI-TSINI NA VHAHASHU?

4. Ri nga bvela hani phanḓa ri tshi dzhiela nṱha vhuthihi vhune ra vha naho na vhahashu he ha ambiwa kha Phisalema 133:1? (Sedzani zwifanyiso.)

⁴ Vhalani Phisalema 133:1. Ri nga tendelana na muphisalema we a ṅwala uri u konana na vhathu vhane vha funa Yehova “ndi zwavhuḓi” nahone “zwo naka.” Muthu ane a vhona muri muhulu wavhuḓi ḓuvha na ḓuvha, a nga fhedzisela a si tsha u dzhiela nṱha. Samusi na riṋe ri tshi dzula ri tshi vhonana na vhahashu vhege iṅwe na iṅwe, ri nga fhedzisela ri si tsha dzhiela nṱha vhuthihi vhune ra vha naho navho. Ri nga ita hani vhungoho ha uri ri bvele phanḓa ri tshi vha dzhiela nṱha? Nḓila ine ra funa ngayo vhahashu i ḓo engedzea arali ra ḓiṋea tshifhinga tsha u humbulisisa nga ha nḓila ine muṅwe na muṅwe wavho a vha wa ndeme ngayo kha riṋe.

5. Vhaṅwe vha nga kwamea hani musi vha tshi vhona nḓila ine vhathu vha Yehova vha funana ngayo?

⁵ Vhaṅwe vhane vha ḓa miṱanganoni lwa u tou thoma, vha a kwamea nga maanḓa musi vha tshi vhona nḓila ine ra funana ngayo. Musi vha tshi vhona zwenezwi, zwi nga ita uri vha vhe na vhungoho ha uri ri Vhakriste vha vhukuma. Yesu o ri: “Arali ni tshi funana, ndi hone vhathu vhoṱhe vha tshi ḓo ḓivha zwa uri ni vhafunziwa vhanga.” (Yoh. 13:35) Ṱhogomelani zwe zwa itea kha Chaithra ane a vha mugudiswa wa yunivesithi we a vha a tshi khou gudiswa Bivhili nga muṅwe wa Ṱhanzi dza Yehova. O tenda musi a tshi rambiwa uri a ḓe buthanoni. Nga murahu ha ḓuvha ḽa u thoma e buthanoni o vhudza muthu we a vha a tshi khou mu vhalela Bivhili a ri: “Vhabebi vhanga a vha athu vhuya vha nkuvhatedza. Fhedzi musi ndi buthanoni ḽa vhoiwe, ndo kuvhatedziwa lwa 52 nga ḓuvha ḽithihi fhedzi. Ndo zwi vhona uri Yehova o shumisa vhenevha vhathu u itela u ntsumbedza uri u a mpfuna. Na nṋe ndi khou ṱoḓa u vha tshipiḓa tsha wonoyu muṱa.” Chaithra o ita mvelaphanḓa a lovhedzwa nga 2024. Zwenezwi zwi tou sumbedza uri musi vhathu vhaswa vha tshi vhona nḓila yavhuḓi ine ra ḓifara ngayo na nḓila ine ra funana ngayo, kanzhi zwi a vha ṱuṱuwedza uri vha ṱoḓe u thoma u shumela Yehova.​—Mat. 5:16.

6. U sendela tsini na vhahashu zwi ri tsireledza hani?

⁶ U sendela tsini na vhahashu zwi nga ri tsireledza. Paulo o ṱuṱuwedza Vhakriste ngae a ri: “Ni dzule ni tshi ṱuṱuwedzana ḓuvha ḽiṅwe na ḽiṅwe . . . uri hu si vhe na ane a rindidzwa nga maanḓa a vhufhura a tshivhi.” (Vhahev. 3:13) Arali ra kulea nungo lune ra wana zwi tshi ri konḓela u bvela phanḓa ri tshi ita zwo lugaho, Yehova a nga shumisa vhatendi nga riṋe u itela u ri thusa. (Ps. 73:2, 17, 23) U thusiwa nga yeneyi nḓila zwi a ri vhuyedza.

7. Lufuno lu tshimbidzana hani na vhuthihi? (Vhakolosa 3:13, 14)

⁷ Ri tshipiḓa tsha vhathu vhane vha shuma nga maanḓa uri vha sumbedzane lufuno nahone zwenezwi zwi ita uri ri wane phaṱhutshedzo nnzhi. (1 Yoh. 4:11) Sa tsumbo, lufuno lu ri ṱuṱuwedza uri ri ‘bvele phanḓa ri tshi konḓelelana’ nahone zwenezwi zwi ita uri ri dzule ri na vhuthihi na vhahashu. (Vhalani Vhakolosa 3:13, 14; Vhaef. 4:2-6) Nga zwenezwo, ri a ḓiphiṋa musi ri miṱanganoni u fhira vhathu naho vhe vhafhio.

NI HULISANE

8. Yehova u ri thusa hani uri ri vhe na vhuthihi na vhahashu?

⁸ Yehova ndi ene ane a ri thusa uri ri vhe na vhuthihi na vhahashu u mona na shango ḽoṱhe naho ri na tshivhi. (1 Vhakor. 12:25) Bivhili i amba uri ‘Mudzimu o ri funza uri ri funane.’ (1 Vhathes. 4:9) Zwenezwi zwi amba uri Yehova u shumisa Bivhili u itela u ri vhudza zwine ra tea u zwi ita uri ri sendele tsini na vhahashu. Musi ri tshi guda Bivhili na u shumisa zwine ra zwi guda, ri vha ri tshi khou tendela Mudzimu a tshi ri “funza.” (Vhahev. 4:12; Yak. 1:25) Zwenezwi ndi zwine Ṱhanzi dza Yehova vha lingedza u zwi ita.

9. Ri guda mini kha Vharoma 12:9-13 nga ha u hulisa vhaṅwe?

⁹ Ipfi ḽa Mudzimu ḽi ri gudisa hani u sendela tsini na vhahashu? Ṱhogomelani zwe Paulo a zwi amba nga ha eneo mafhungo, zwo ṅwaliwaho kha Vharoma 12:9-13. (Vhalani.) Paulo o ri “kha u hulisa vhaṅwe ni vhe wa u thoma.” Zwenezwi zwi amba mini? Zwi amba uri ri tea u vha wa u thoma u sumbedza vhaṅwe ‘lufuno lu bvaho mbiluni’ nga u ita zwithu zwi ngaho u vha hangwelwa, u vha ṱanganedza mahayani ashu na u vha sumbedza mafunda. (Vhaef. 4:32) A zwi ṱoḓei uri ri lindele wahashu a tshi sendela tsini na riṋe. Ri nga vha wa “u thoma” kha u ita zwenezwi. Musi ri tshi zwi ita ri ḓo vhona vhungoho ha zwe Yesu a zwi amba musi a tshi ri: “U ṋea zwi a takadza u fhira u ṋewa.”​—Mish. 20:35.

10. Ri nga vha hani mushumi wa biko musi zwi tshi ḓa kha u thusa vhaṅwe? (Sedzani tshifanyiso.)

¹⁰ Zwi a mangadza uri musi Paulo a tshi tou fhedza u amba nga ha u vha wa thoma u hulisa vhaṅwe, o ri ṱuṱuwedza uri ri ‘shumese, ri songo vha vhabva.’ Muthu ane a shumesa u a fhisea nahone ndi mushumi wa biko. Musi a tshi ṋewa mushumo u u ita nga vhuronwane. Mirero 3:27, 28 i ri ṱuṱuwedza uri: “U songo dzima vhathu zwivhuya zwo vha teaho arali zwi maanḓani au uri u thuse.” Nga zwenezwo, musi ri tshi vhona muṅwe muthu a tshi khou ṱoḓa thuso, ri a ṱavhanya ra ita zwine ra nga kona u itela u mu thusa. A ri thomi ra lindela hu tshi fhela tshifhinga nahone a ri zwi litsheli muṅwe muthu uri hu vhe ene ane a thusa.​—1 Yoh. 3:17, 18.

11. Ndi mini zwine zwa nga ri thusa uri ri sendele tsini na vhahashu?

¹¹ Iṅwe nḓila ine ra nga hulisa ngayo vhaṅwe ndi nga u ṱavhanya ra vha hangwela musi vha tshi ri khakhela. Vhaefesa 4:26 i ri: “Ḓuvha ḽi songo kovhela ni tshee no sinyuwa.” Ndi ngani zwenezwo zwi zwa ndeme? Ndi ngauri ndimana ya 27 i ri vhudza uri arali zwa itea, ri ḓo vha ri tshi khou “ṋea Diabolo vhudzulo.” Yehova u ri vhudza lunzhi-lunzhi Bivhilini uri ri hangwelane. Vhakolosa 3:13 i ri ṱuṱuwedza uri ri ‘bvele phanḓa ri tshi hangwelana zwi tshi bva mbiluni.’ U hangwela vhaṅwe musi vha tshi ri khakhela ndi iṅwe ya nḓila khulwane dzine dza ri sendedza tsini navho. Musi ri tshi hangwela vhaṅwe, ri vha ri tshi khou thusa kha uri ri ‘dzule ri na vhuthihi he ra vhu ṋewa nga muya mukhethwa une wa ita uri ri vhe na mulalo.’ (Vhaef. 4:3) Nga zwenezwo, musi ri tshi hangwela vhaṅwe, ri vha ri tshi khou shela mulenzhe kha uri vhathu vha Yehova vha bvele phanḓa vhe na vhuthihi na mulalo.

12. Yehova u ri thusa hani u hangwela vhaṅwe?

¹² Ndi ngoho uri ri nga wana zwi tshi ri konḓela u hangwela vhathu vhe vha ri khakhela kana vhe vha ri ṱungufhadza. Fhedzi muya mukhethwa wa Mudzimu u nga ri thusa uri ri vha hangwele. Musi Bivhili yo no ri ṱuṱuwedza uri ri “funane zwi tshi bva mbiluni” na uri ri “shumese,” yo dovha ya ri vhudza uri: “Ni tendele muya mukhethwa u tshi ita uri ni fhisee.” (Sedzani study note tsha Vharoma 12:11, fhasi ha “Be aglow with the spirit.”) Nga zwenezwo, muya mukhethwa wa Mudzimu u nga ri thusa uri ri fune vhaṅwe na u vha hangwela zwi tshi bva mbiluni. Ndi ngazwo ri tshi tea u humbela Yehova uri a ri thuse.​—Luka 11:13.

“A NO NGO TEA U FHANDEKANA”

13. Ndi mini zwine zwa nga ita uri ri fhandekane tshivhidzoni?

¹³ Tshivhidzoni hu vha na vhathu vho fhamba-fhambanaho vhane vha vha na vhubvo vhu sa fani. (1 Tim. 2:3, 4) Nga nṱhani ha zwenezwi, roṱhe ri ita phetho dzi sa fani musi zwi tshi ḓa kha zwine ra ḓo zwi ambara, nḓila ine ra ḓilugisa ngayo, nḓila ine ra ḓo ṱhogomela ngayo mutakalo washu kana zwine ra ḓo ḓimvumvusa ngazwo. Arali ra sa ṱhogomela, zwenezwi zwithu zwi nga ri fhandekanya. (Vharoma 14:4; 1 Vhakor. 1:10) Ngauri Mudzimu o ri funza uri ri funane, ri tea u vha na vhulondi uri ri sa kombetshedze vhaṅwe uri vha ite zwe riṋe ra khetha u zwi ita, ri tshi humbula uri zwashu zwi khwine kha zwavho.​—Vhafil. 2:3.

14. Ri tea u dzula ri tshi lingedza u ita mini nahone ndi ngani?

¹⁴ Ri nga dovha ra ita uri hu si vhe na u fhandekana tshivhidzoni nga u lingedza u vha vhathu vhane vha ṱuṱuwedza vhaṅwe tshifhinga tshoṱhe. (1 Vhathes. 5:11) Zwifhingani zwa zwenezwino, hu na vhathu vho vhalaho vhe vha vha vho bviswa tshivhidzoni kana vhe vha vha vho fhola vhe vha vhuyelela. Ri a vha ṱanganedza nga lufuno. (2 Vhakor. 2:8) Ṱhogomelani zwe zwa itea kha muṅwe wahashu wa tshifumakadzini we a vhuyelela nga murahu ha u fhola lwa miṅwaha ya fumi. O ri: “Vhathu vhoṱhe vho nkhaḓa na u nndumelisa vho takala.” (Mish. 3:19) Zwenezwi zwithu zwo kwama hani onoyu wahashu wa tshifumakadzini? O ri: “Zwo ita uri ndi zwi vhone uri Yehova u khou nthusa uri ndi dovhe ndi takale.” Arali ra lingedza u vha vhathu vhane vha ṱuṱuwedza vhaṅwe, Kristo a nga ri shumisa u homolosa ‘vho netaho na vhane vha khou lemelwa.’​—Mat. 11:28, 29.

15. Ndi ifhio iṅwe nḓila ine ra nga ita ngayo uri hu vhe na vhuthihi tshivhidzoni? (Sedzani tshifanyiso.)

¹⁵ Ri nga dovha ra ita uri tshivhidzoni hu vhe na vhuthihi nga zwine ra zwi amba. Yobo 12:11 i ri: “Naa nḓevhe a si ya u thetshelesa zwine zwa ambiwa u fana na lulimi lu tshi thetshela zwiḽiwa?” Samusi muthu ane a khou bika zwiḽiwa a tshi thoma a zwi thetshela uri a vhe na vhungoho ha uri zwi khou ḓifha musi a sa athu zwi avhela vhaṅwe, na riṋe ri fanela u humbulisisa nga ha zwine ra ḓo zwi amba musi ri sa athu zwi amba. (Ps. 141:3) Tshipikwa tshashu tshi tea u vha tshi tsha uri zwine ra zwi amba zwi vhe zwi fhaṱaho, zwi homolosaho na zwine zwa ḓo ‘vhuyedza vho thetshelesaho.’​—Vhaef. 4:29.

16. Ndi vhonnyi vhane vha tea u lingedza nga maanḓa u amba nga nḓila i ṱuṱuwedzaho?

¹⁶ Vhanna vho vhingaho na vhabebi ndi vhone vhane nga maanḓa vha tea u lwela u amba nga nḓila i ṱuṱuwedzaho. (Vhakol. 3:19, 21; Tito 2:4) Vhahulwane na vhone vha tea u lwela u homolosa na u khuthadza nngu dza Yehova. (Yes. 32:1, 2; Vhagal. 6:1) Muṅwe murero u re Bivhilini u ri humbudza uri: “Ndi zwavhuḓi musi fhungo ḽi tshi ambiwa nga tshifhinga tsho teaho!”​—Mir. 15:23.

SUMBEDZANI LUFUNO “NGA MISHUMO NA NGA NGOHO”

17. Ri nga vha hani na vhungoho ha uri ri khou funa vhahashu zwi tshi bva mbiluni?

¹⁷ Muapostola Yohane o ri ṱuṱuwedza uri ri songo ‘sokou amba uri ri na lufuno, fhedzi ri lu sumbedze nga mishumo na nga ngoho.’ (1 Yoh. 3:18) Ri ṱoḓa u funa vhahashu zwi tshi bva mbiluni. Zwenezwo ri nga zwi ita hani? Musi ri tshi fhedza tshifhinga na vhahashu, zwi ḓo ri sendedza tsini navho, zwa ita uri nḓila ine ra funana ngayo i engedzee. Nga zwenezwo, wanani zwibuli zwa u fhedza tshifhinga na vhahaṋu musi ni miṱanganoni na tsimuni. Ni ite ni tshi vha dalela. Musi ri tshi ita zwenezwi zwithu, ri ḓo vha ri tshi khou sumbedza uri ‘Mudzimu o ri funza uri ri funane.’ (1 Vhathes. 4:9) Nahone ri ḓo bvela phanḓa ri tshi vhona “uri ndi zwavhuḓi na uri zwo naka hani musi murathu na mukomana vho dzula vhoṱhe vhe vhathihi!”​—Ps. 133:1.