Hu pfi mini arali na pfa u nga musi ni tshi rabela thabelo dzaṋu a dzi bvi mbiluni kana uri a ni tsha ḓiphiṋa nga vhuḓinḓa u fana na nḓila ye na vha ni tshi ḓiphiṋa ngayo mathomoni? Ni songo humbula uri a ni tsheena muya wa Yehova. Samusi ri vhathu vha re na tshivhi, a ri ḓipfi nga nḓila i fanaho tshifhinga tshoṱhe. Arali ni si tsha fhisea u fana na u thomani, humbulisisani nga ha tsumbo ya muapostola Paulo. O vha a tshi zwi ḓivha uri naho o vha a tshi lingedza u edzisa Yesu, nga tshiṅwe tshifhinga o vha a tshi nga ḓipfa a si na mafulufulu a u ita zwo fanelaho. Paulo o vha o ḓiimisela u ita mushumo we a ṋewa hu sa londwi nḓila ye a vha a tshi khou ḓipfa ngayo nga tshenetsho tshifhinga. Nga hu fanaho, ri songo tendela nḓila i si yavhuḓi ine ra ḓipfa ngayo i tshi ṱuṱuwedza phetho dzine ra dzi ita. Ḓiimiseleni u ita zwo lugaho naho ni tshi ḓipfa ni sa ṱoḓi u zwi ita. Arali na dzula ni tshi ita zwo lugaho, nga u ya ha tshifhinga nḓila ine na ḓipfa ngayo i nga shanduka.​—1 Vhakor. 9:16. w24.03 11-12 ¶12-13

Ri nga sumbedza uri ri funa vhahashu nga u vha khonani dzavho na u fhedza tshifhinga ri navho. (2 Vhakor. 6:11-13) Vhunzhi hashu ri ya kha zwivhidzo zwi re na vhahashu vha re na vhubvo ho fhambanaho na vha re na vhumuthu vhu sa fani. Ri nga khwaṱhisa lufuno lwashu khavho nga u livhisa ṱhogomelo kha zwithu zwavhuḓi khavho. Musi ri tshi guda u vhona vhaṅwe nga nḓila ine Yehova a vha vhona ngayo, ri vha ri tshi khou sumbedza uri ri a vha funa. Lufuno lu ḓo vha lu lwa ndeme tshifhingani tsha maṱungu mahulu. Musi maṱungu mahulu a tshi thoma, Yehova u ḓo ri tsireledza hani? Ṱhogomelani zwe Yehova a vhudza vhathu vhawe uri vha zwi ite musi Babele ḽa kale ḽi tshi ṱhaselwa. O ri: “Vhathu vhanga, tshimbilani ni dzhene kamarani dzaṋu dza nga ngomu-ngomu, ni vale miṋango. Ni dzumbame lwa tshifhinganyana u swika mbiti dzi tshi dzika.” (Yes. 26:20) Zwi vhonala u nga eneo maipfi a ḓo shuma na kha riṋe tshifhingani tsha maṱungu mahulu. w23.07 6-7 ¶14-16

Nḓila ine na ḓifara ngayo i tea u sumbedza uri ni muthu ane a humbulela. Ḓivhudziseni uri: ‘Naa vhathu vha ndzhia sa muthu ane a humbulela, ane a pfesesa na ane a konḓelela vhaṅwe? Kana naa vhathu vha ndzhia sa muthu ane a konḓisa na ane a si pfesese? Kana naa ndi a thetshelesa vhaṅwe na u tendelana na mihumbulo yavho musi zwi tshi konadzea?’ Nḓila ine ra humbulela ngayo i nga sumbedza uri ri khou edzisa Yehova na Yesu kana hai. U humbulela zwi katela u tendelana na zwiimo musi hu tshi vha na tshanduko. Tshanduko dzi nga ita uri ri vhe na vhuleme vhu songo lavhelelwaho. Sa tsumbo, ri nga farwa nga vhulwadze vhu shushaho ri songo zwi lavhelela. Kana tshanduko i songo lavhelelwaho ya zwa ikonomi kana kha zwa politiki i nga ita uri vhutshilo hashu vhu konḓe. (Muh. 9:11) Khamusi ri nga wana zwi tshi ri konḓela musi ndangulo i tshi ri humbela uri ri shumele Yehova nga iṅwe nḓila kana ri huṅwe fhethu. Ri nga kona u tendelana na zwiimo arali ra tevhedza zwithu zwiṋa zwi tevhelaho. Tsha u thoma, ṱanganedzani vhuimo haṋu. Tsha vhuvhili, livhisani ṱhogomelo kha zwine na ḓo zwi ita, hu si zwe na zwi ita tshifhingani tsho fhiraho. Tsha vhuraru, ṱhogomelani zwithu zwavhuḓi zwine zwa khou itea vhutshiloni haṋu. Tsha vhuṋa, itelani vhaṅwe zwithu zwavhuḓi. w23.07 21-22 ¶7-8